ފާފަކުރެވެމުން ގޮސް އެކަމުން ސަލާމަތް ނުވެވޭ ޙާލަތަށް އިންސާނުން ވެއްޓިގެން މިދާ އެންމެ ބޮޑު ސަބަބަކީ ޝައިޠޯނާއާއިއެކު ވަގުތު ހޭދަކުރެވުން ގިނަވުމެވެ. އެއިގެ މާނައަކީ ޝައިޠޯނާ އާއި ސީދާ އެކުގައި ވުމެއް ނޫނެވެ. ޝައިޠޯނާ ކުރަންވަސްވާސްދޭ ނުބައި ޢަމަލުތައް ކުރުމުގައި ގިނަ ވަޤުތުތައް ހޭދަކުރުމެވެ. 
މިޘާލަކަށް ބުނާނަމަ އެންމެ ގިނައިން ވަޤުތުހޭދަކުރެވޭ ކަންކަމުގެ ތެރޭގައި ބަލަން ނުވާ ފިލްމުތައް ބެލުމާއި މިޔުޒިކްޝޯތަކަށް ދިއުމާއި ސޯޝަލް މީޑިއާގައި ނުބައި އަމަލުތައް ކުރުން ފަދަ ކަންކަމުގައި ވަގުތު ހޭދަކުރެވޭ މިންވަރު އިތުރުވެގެންދިއުން ހިމެނެއެވެ. 
މައްސަލައަކަށްވަނީ އެފަދަ ކަމެއްގައި ކިތަންމެ ގިނަ ވަޤުތުތަކެއް ހޭދަކުރެވޭއިރުވެސް އެވަގުތުތަކުގައި ﷲ ތަޢާލާގެ މަތިން ހަނދުމަ ނުކުރެވޭތީއެވެ. ޝައިޠޯނާ ޒީނަތްތެރިކޮށް ދައްކައިދޭ ކަންކަމަށް ސަމާލުކަންދެވި އެހެން ހުރިހާ ކަމެއްގެ މަތިން ހަނދާން ނައްތައިލެވޭތީއެވެ. 
މިފަދަ ހުރިހާ ކަމެއްގެ ޙައްލުކަމުގައި ﷲ ތަޢާލާ ވަޙިކުރައްވަވާފައިވަނީ ﷲ ތަޢާލާ ހަނދުމަކުރުން ގިނަކުރުމެވެ. ނަމަވެސް އަމަލު މިކުރެވެނީ ދިމާ އިދިކޮޅަށެވެ. އެކަމުގެ ސަބަބުން މީހާގެ އަމަލުތައް ގުދުގުދުވެ ދެދުނިޔެ ގެއްލިގެންދަނީއެވެ. 
ލޮބުވެތި އަޚުންނާއި އުޚުތުންނޭވެ! ޙަޔާތް ބަދަލުކުރަން އެދޭމީހާ ނުވަތަ ޙައްޤުމަގުގައި ސާބިތުވާން އެދޭމީހާ ﷲ ތަޢާލާ ހަނދުމަކުރުން ގިނަކުރާށެވެ! އެމީހަކު ﷲ ތަޢާލާ ހަނދުމަކުރުން ގިނަކުރާވަރަކަށް ﷲ ތަޢާލާ އެމީހަކު ހަނދުމަކުރެއްވެވުން ގިނަކުރައްވަވާނެތެވެ! އެއިރުން ހިތުގައި ﷲ ތަޢާލާއަށް ލޯތްބާއި ބިރުވެތިކަން އުފެދޭނެއެވެ! ފާފަތަކަށް އަރައިގަތުން މުޅިން ހުއްޓިގެންދާނެއެވެ! ﷲ ތަޢާލާއަށް އަޅުކަންކުރެވުން އިތުރުވެގެންދާނެއެވެ. ފަރުޟުތަކަށް ރައްކައުތެރިވެވޭނެއެވެ. 
މިބުނެދިނީ ހަމަ އެންމެ ކަމަކުން ހުރިހާ ފާފަތަކެއް ކުރެވުން ހުޓާލެވި ﷲ ތަޢާލާގެ މަގުގައި ސާބިތުވެވޭނެ ކަންތަކެވެ. ތަކުރާރުކޮށްލާނަމެވެ. އެކަމަކީ ﷲ ތަޢާލާ ހަނދުމަކުރުން ގިނަކުރުމެވެ! 
- އިސްލާމީ ތިލަފަތުގެ ދަރުސަކުން