ރާއްޖޭގެ ތިން ސަރަހައްދެއްގައި ކުރޫޒް ލައިނާތަކަށް ހާއްސަ ޖެޓީތަކެއް ތަރައްގީ ކުރުމަށް ނިންމައި އެކަމާއި ގުޅޭ މަސައްކަތް ކުރަމުންދާ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ދައުލަތުގެ މީޑިޔާ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުންނެވެ. އެ ޕްރޮގްރާމްގައި މިނިސްޓަރު ވިދާޅުވީ ރާއްޖެއަށް އަންނަ ކުރޫޒް ޝިޕްތަކުގެ އަދަދު އިތުރުކޮށް މިދާއިރާ ތަރައްގީކޮށް ފުޅާކުރުމަށް މަސައްކަތްތަކެއް ކުރުމަށް ރާވާފައިވާ ކަމަށާއި އެގޮތުން ރާއްޖޭގެ ތިން ސަރަހައްދެއްގައި ކުރޫޒު ލައިނާތަކަށް ހާއްސަ ބަނދަރުތަކެއް ތަރައްގީކުރުމަށް މަސައްކަތް ކުރަމުންދާ ކަމަށެވެ.
ކުރޫޒު ލައިނާތަކަށް ހާއްސަކޮށް ޖެޓީ ތަރައްގީ ކުރުމަށް އައްޑޫ، ލާމު އަތޮޅު ކަހަލަ ތިން ސަރަހައްދެއް ބަލައި ފާސްކުރަމުން ދާކަމަށާއި އެފަދަ ޖެޓީތައް ތަރައްގީކޮށް ކުރޫޒް ލައިނާތައް އެ ހިސާބުތަކަށް ގެންދިޔުމަށް، ވަރަށް ބޮޑު ކުރިއެރުމަކަށް މިކަން ވާނެ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ކުރީ ސަރުކާރުން ހަދާފައޮތް ގަވާއިދެއްގެ ދަށުން ކުރޫޒު ލައިނާތައް ރާއްޖެއަށް އައުމަށް ވަރަށް ދަތިވެފައި އޮތް ކަމަށާއި މާޔާއިން މިކަމުގައި ވަރަށް ބޮޑަށް ޝަކުވާކުރި ކަމަށެވެ. އެ ގަވާއިދު މިހާރު ވަނީ އިސްލާހުކޮށްފައި ކަމަށް ވެސް ވިދާޅުވިއެވެ.
ރާއްޖެއަށް މިދުވަސްވަރު ގިނަ ކުރޫޒް ލައިނާތައް އަންނަމުންދާއިރު މިދިޔަ އަހަރާއި އަހަރުގެ މިހާތަނަށް 600 އަށް ވުރެ ގިނަ ފަތުރުވެރިން ކުރޫޒް ލައިނާތަކުގައި ރާއްޖެއަށް އައިސްފައިވާއިރު މާޔާއިން ބުނީ ރާއްޖޭގެ ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކްރޫޒް ލައިނާއެއް އައުމަށް ތާވަލުކޮށްފައިވާކަމަށެވެ.