ކިއުބާ، ޓެރަރިޒަމަށް އެހީތެރިވާ ގައުމުތަކުގެ ލިސްޓުން އުނިކުރުމަށް އެމެރިކާގެ ރައީސް ޖޯ ބައިޑެން ނިންމައިފިއެވެ. ވައިޓް ހައުސްއިން މިކަން އިއުލާނު ކުރުމާއެކު، ކިއުބާއިން ވަނީ 553 ސިޔާސީ ގައިދީން މިނިވަން ކުރާނެކަން އަންގާފައެވެ.
އެމެރިކާގެ އިސް އޮފިޝަލެއް ވިދާޅުވި ގޮތުގައި، ކިއުބާއަކީ ޓެރަރިޒަމަށް އެހީތެރިވާ ގައުމެއްކަން ސާބިތުކޮށްދޭ އެއްވެސް ހެއްކެއް ނެތެވެ.
ނަމަވެސް، މިއަންނަ ހަފްތާގައި ވެރިކަމާ ހަވާލުވާން ހުންނެވި ރިޕަބްލިކަން ރައީސް ޑޮނަލްޑް ޓްރަމްޕް މި ނިންމުން ބަދަލުކުރައްވާނެކަމަށް ބެލެވެއެވެ. 2021 ގައި އޭނާގެ ފުރަތަމަ ދައުރު ނިމުމުގެ ކުރިން ކިއުބާ މި ލިސްޓުގައި ހިމެނުމަކީ ވެސް ޓްރަމްޕްގެ ނިންމުމެކެވެ.
ނިންމުމާއެކު އެމެރިކާއިން ކިއުބާގެ މައްޗަށް އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް ވެސް ލުއިކުރާނެއެވެ. އަދި 2017 ގައި ޓްރަމްޕް ސަރުކާރުން ނެރުނު، ކިއުބާއާ ދެކޮޅު މެމޮރަންޑަމް ވެސް މިހާރު ބަދަލުކުރާނެއެވެ.
ކިއުބާގެ ރައީސް މިގުއެލް ޑިއަޒް-ކަނެލް ވިދާޅުވީ، އެމެރިކާގެ ދަތިކުރުންތަކަކީ ހަނގުރާމައިގެ ޖަރީމާއެއް ކަމަށެވެ. އަދި ޓްރަމްޕްގެ އިންތިޚާބީ ކާމިޔާބާއެކު އިތުރު ދަތިތަކަކަށް ތައްޔާރުވާން ޖެހޭނެ ކަމަށް ވިދާޅުވިއެވެ. ނަމަވެސް އައު ސަރުކާރާއެކު މަޝްވަރާކުރުމަށް ތައްޔާރަށް ތިބިކަން ވެސް އެ މަނިކުފާނު ފާހަގަކުރެއްވިއެވެ.
ކިއުބާއަށް 60 އަހަރަށްވުރެ ގިނަ ދުވަހު އެމެރިކާގެ ދަތިކުރުންތަކާއި ކުރިމަތިލާން ޖެހިފައިވެއެވެ. ކިއުބާގެ ސަރުކާރުން ބުނާ ގޮތުގައި، މިހާރު އެ ގައުމަށް ދިމާވެފައިވާ އިގްތިސާދީ ހީނަރުކަމުގެ އަސްލަކީ މި ދަތިކުރުންތަކެވެ. މީގެ ސަބަބުން ތެލާއި، ކާބޯތަކެއްޗާއި، ބޭހާއި އަދި ކަރަންޓުގެ ދަތިކަން ވަނީ ކުރިމަތިވެފައެވެ.
ގާތްގަނޑަކަށް ތިން އަހަރު ކުރިން، ކާބޯތަކެތީގެ އަގު މައްޗަށް ދިއުމާއި ކަރަންޓު ނެތުމުގެ ސަބަބުން ސަރުކާރާ ދެކޮޅަށް އާދަޔާ ޚިލާފު އިހުތިޖާޖުތަކެއް ކުރެވުނެވެ. އިންސާނީ ޙައްޤުތަކުގެ ޖަމާއަތްތަކުން ބުނާ ގޮތުގައި، މި އިހުތިޖާޖުތަކުގައި ސަތޭކަ އެތައް ބައެއް ހައްޔަރުކުރެވި، ބައެއް މީހުންނަށް ދިގު މުއްދަތުގެ ޖަލު ޙުކުމްތައް ވަނީ އިއްވާފައެވެ.