ކުންފުނިތަކުން ދައުލަތުގެ ޕްރޮޖެކްޓުތަކުގެ އެޑްވާންސް ފައިސާ ނަގަނީ ވިޔަފާރިކުރަން ކަމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު މުއްތަލިބް ވިދާޅުވީ ދައުލަތުގެ ޕްރޮޖެކްޓުތަކުގެ އެޑްވާންސް ފައިސާ ކުންފުނިތަކުން ނަގަނީ ވިޔަފާރިކުރަން ކަމަށާއި، ގިނަ މަޝްރޫއުތައް ހުއްޓެނީ މިފަދަ ސަބަބުތަކާ ގުޅިގެން ކަމަށެވެ. މުއްތަލިބް ވިދާޅުވީ ޕްރޮޖެކްޓުގެ އެޑްވާންސް ފައިސާ ނަގައިގެން މިފަދަ ކުންފުނިތަކުން އެއްވެސް މަސައްކަތެއް ނުކުރާ ކަމަށާއި، އޭގެ ބަދަލުގައި އެ ފާއިސާއިން ވިޔަފާރިކޮށް ފައިދާ ހޯދައިގެން އަނެއްކާވެސް 5 އަހަރު ނުވަތަ 10 އަހަރު ފަހުން އާ ޕްރޮޖެކްޓުތަކަށް ބިޑް ކުރާ ކަމަށެވެ.
މިނިސްޓަރ ވިދާޅުވީ ކުންފުނިތަކުގެ މަޝްރޫއުތައް ނަގައިގެން މި ގޮތަށް އަމަލުކުރުމުގެ ސަބަބުން، ދައުލަތަށް ވަރަށް ބޮޑަށް ގެއްލުންވާ ކަމަށެވެ. މީގެ އިތުރުން މިދިޔަ 2023 ވަނަ އަހަރާއި، އޭގެ ކުރިން ވެސް ބައެއް ޕްރޮޖެކްޓުތަކުގެ އެޑްވާންސް ފައިސާ ނަގައިގެން ކުންފުނިތަކުން ފިލާފައިވާ ކަމަށެވެ.
"ގިނަ މަޝްރޫއުތައް ހުއްޓެނީ މިފަދަ ސަބަބުތަކާ ގުޅިގެން.އި ޕްރޮޖެކްޓުގެ އެޑްވާންސް ފައިސާ ނަގައިގެން މިފަދަ ކުންފުނިތަކުން އެއްވެސް މަސައްކަތެއް ނުކުރޭ" މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ ކުރީ ސަރުކާރުގައި ކޮންސްޓްރަކްޝަން މިނިސްޓްރީގައި އެކަނިވެސް 39 ބިލިއަން ރުފިޔާގެ މަޝްރޫއުތަކުގައި ސޮއިކޮށްފައި ހުރި ކަމަށާއި އެއީ ދައުލަތުގެ އެއްވެސް ބަޖެޓަކުން ޚަރަދުކުރެވޭ ވަރުގެ އަދަދެއްގެ މަސައްކަތްތަކެއް ނޫން ކަމަށެވެ.