ގދ ގައްދޫގައި 18 އަހަރު ނުވާ ކުޑަކުއްޖެއް އޭނާގެ ކޮއްކޮގެ ބޮލަށް ވަޅިހަރައިފިއެވެ.
މި ހާދިސާ ހިނގާފައިވަނީ މިއަދު ހަވީރު 5:30 އެހާކަށްހާއިރު ކަމަށާއި، އުމުރުން 17 އަހަރުގެ މި ކުއްޖާ އަކީ ނަފްސާނީ ގޮތުން ބަލިކުއްޖެއްކަމަށް މައުލޫމާތު ލިބެއެވެ.
މިކުއްޖާ، އޭނާގެ 9 އަހަރުގެ ކޮއްކޮގެ ބޮލަށް ވަޅިން ހަމަލާ ދިނުމުގެ ކުރިން އޭނާގެ ބައްޕައަށްވެސް ހަމަލާ ދީފައިވާކަމަށް މައުލޫމާތުލިބެއެވެ.
މިހާދިސާގައި ޒަޚަމްވި ކުއްޖާއަށް ގދ ގައްދޫ ސިއްހީ މަރުކަޒުގައި ފަރުވާދެމުން އަންނައިރު، 17 އަހަރުގެ ކުއްޖަ މިހާރުވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
އާއިލާގެ ފަރާތުން "ވަގުތަށް" މައުލޫމާތު ދިން މީހަކު ބުނިގޮތުގައި ނަފްސާނީ ބަލި ހުންނަ އުމުރުން 17 އަހަރުގެ ކުއްޖާގެ އަމަލުތައް އާއިލާގެ ފަރާތުން މީގެ ތިން ހަފްތާ ކުރިން ވަނީ ޖެންޑާއަށް ހުށައަޅައިފައެވެ. ޖެންޑާއަށް މައްސަލަ ހުށައެޅުމުން ނަފްސާނީ ބަލި ހުންނަ މިކުއްޖަ ހަފްތާއެއްގެ ތެރޭ އެމީހުންގެ ބެލުމުގެ ދަށަށް ގެންދާނެ ކަމަށް ބުނިނަމަވެސް، އެގޮތަށް އަމަލުކޮށްފައި ނުވާކަމަށްްވެސް އާއިލާގެ ފަރާތުން ވާހަކަދެއްކި މީހާ ބުންޏެވެ.
ވަޅިން ހަމަލާދިނުމުގެ ސަބަބުން ޒަޚަމްވި ކުއްޖާގެ ބޮލުއް އިންޗިއެއް ވަރުގެ ތަނެއް ކަފައިގެން ގޮސްފައިވާކަމަށް މައުލޫމާތުލިބެއެވެ.