މިރޭގެ މެޗަކީ ވަރަށް ހަރުކަށި ކުޅުމެއް ފެނިގެންދިޔަ މެޗެކެވެ. މިއީ މި ވޯލްޑް ކަޕްގައި މިހާތަނަށް އެންމެ ގިނަ ކާޑު ދެއްކި މެޗުގެ ގޮތުގައި ވަނީ ރެކޯޑު ކުރެވިފައެވެ. މުޅި މެޗުގައި ޖުމްލަ 7 ރީނދޫ ކާޑު ފެނިގެންދިޔައިރު، އޭގެ ތެރެއިން 4 ކާޑު އޮސްޓްރޭލިޔާގެ ކުޅުންތެރިންނަށް އަދި 3 ކާޑު އެމެރިކާގެ ކުޅުންތެރިންނަށް ވަނީ ދައްކާފައެވެ.
އެމެރިކާ ވަނީ އެ ޓީމުގެ ފުރަތަމަ މެޗުގައި 4-1 އިން ޕެރެގުއޭ ބަލިކޮށްފައެވެ. އަދި އޮސްޓްރޭލިޔާ ވަނީ މި މަހުގެ 14 ވަނަ ދުވަހު ކުޅުނު މެޗުގައި 2-0 އިން ތުރުކީ ބަލިކޮށްފައެވެ. މި ގްރޫޕްގައި ދެން ހިމެނޭ ތުރުކީ އާއި ޕެރެގުއޭއަށް އަދި ޕޮއިންޓެއް ލިބިފައެއް ނުވެއެވެ.
މިރޭގެ މެޗުން ބަލިވި ނަމަވެސް، އޮސްޓްރޭލިޔާއަށް އަދިވެސް ގްރޫޕްގެ ފަހު މެޗުން ކުރިހޯދައިގެން އަނެއް ބުރަށް ދިއުމުގެ ފުރުސަތު އެބައޮތެވެ.