ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް ކުރައްވަމުންދާ ދަތުރުފުޅުގައި، އެ ޤައުމުގެ ސަރުކާރުން ދައްކަވަމުންދާ މެހެމާންދާރީ ފާހަގަކުރައްވައި، ޝުކުރު އަދާކުރައްވައިފިއެވެ. މި ދަތުރުފުޅަކީ ދިވެހިރާއްޖެއިން އެސްޓޯނިއާއަށް ކުރެވޭ ފުރަތަމަ ރަސްމީ ދަތުރުފުޅެވެ.ރައީސް މުޢިއްޒު މިކަން ފާހަގަކުރެއްވީ ސޯޝަލް މީޑިއާގައި ކުރެއްވި ޕޯސްޓެއްގައެވެ. އެ ޕޯސްޓުގައި ރައީސް ވިދާޅުވެފައިވަނީ، އެސްޓޯނިއާއަށް ދަޢުވަތު ދެއްވައި، މި ތާރީޚީ ދަތުރުފުޅު ކުރެއްވުމުގެ މަގު ފަހިކޮށްދެއްވި ކަމަށްޓަކައި އެސްޓޯނިއާގެ ރައީސް އަލާރް ކަރިސްއަށާއި އެ ޤައުމުގެ ސަރުކާރަށް ޝުކުރު އަދާކުރައްވާ ކަމަށެވެ.މީގެއިތުރުން، އެސްޓޯނިއާގެ ރައީސާއެކު ބޭއްވުނު ބައްދަލުވުމުގައި ދެ ޤައުމުގެ ގުޅުން އިތުރަށް ބަދަހިކުރުމަށް މުހިންމު މަޝްވަރާތަކެއް ކުރެވުނު ކަމަށް ރައީސް މުޢިއްޒު ވިދާޅުވެފައިވެއެވެ. މި ބައްދަލުވުމުގައި ޚާއްޞަ ސަމާލުކަމެއް ދެވުނު ބައެއް ދާއިރާތަކުގެ ތެރޭގައި ސަރުކާރު ހިންގުމުގައި ފަންނިއްޔާތު ބޭނުންކުރާ މިންވަރު އިތުރުކުރުމާއި، ސައިބަރ ސެކިއުރިޓީ، މޫސުމީ ބަދަލުތަކަށް ވިލުންތެރިވުން އަދި ތަޢުލީމީ ދާއިރާ ހިމެނެއެވެ.ރައީސް މުޢިއްޒު ފާހަގަކުރެއްވި ގޮތުގައި، މި ދާއިރާތަކުގައި ދެ ޤައުމުން ގެންގުޅޭ އެއްގޮތް ވިސްނުމުގެ ސަބަބުން، ކުރިއަށް އޮތް ތަނުގައި މި ދާއިރާތަކުގެ ކުރިއެރުމަށް ގުޅިގެން މަސައްކަތްކުރެވިގެންދާނެއެވެ. މި ދަތުރުފުޅަކީ ދިވެހިރާއްޖެއާއި އެސްޓޯނިއާއާ ދެމެދު އޮތް ގުޅުން އިތުރަށް ހަރުދަނާކޮށް، އެކި ދާއިރާތަކުން އެއްބާރުލުން އިތުރުކުރުމަށް މަގުފަހިވެގެންދާނެ ދަތުރުފުޅެއް ކަމަށް ބެލެވެއެވެ.