ބިންވެރިޔާ ސްކީމާ ގުޅުންހުރި މައްސަލައެއްގައި ފަޒުލް ރަޝީދުގެ ބޭބެ، ފަޒީލް ރަޝީދުގެ ފޯނު، ފުލުހުން މިއަދު ހިފަހައްޓައިފިއެވެ.
ކޯޓު އަމުރެއްގެ ދަށުން ފަޒީލްގެ ފޯނު ހިފަހައްޓާފައިވާކަން ފުލުހުން ވަނީ މީޑިއާއަށް ކަށަވަރުކޮށްދީފައެވެ. ފުލުހުން ފަޒީލްގެ ފޯނު ހިފަހައްޓާފައިމިވަނީ ބިންވެރިޔާ ސްކީމާ ގުޅުންހުރި ޖިނާއީ މައްސަލައެއް ފުލުހުން ބަލަމުންގެންދާ ދަނޑިވަޅެއްގައެވެ.
އެއީ އެޗްޑީސީގެ ތެރެއިން ފަޒީލް ރަޝީދަށް އުސޫލާ ހިލާފަށް ގެވަޅެއް ދިން މައްސަލައެވެ. މި މައްސަލާގައި ފުލުހުން ވަނީ ރޭގެ ވަގުތެއްގައި ފަޒުލް ރަޝީދު ދިރިއުޅުއްވާ ޒޭވަރު ގެއަށްގޮސް އެގެއިންވެސް ބައެއް އެއްޗެހި ގެންގޮސްފައެވެ. މި މައްސައަށް ފުލުހުންނަށް އެއްބާރުލުން ދިނުމަށްކަމަށް ވިދާޅުވެ، ފަޒުލް ރަޝީދު ވަނީ އެޗްޑީސީގެ މެނޭޖިންގ ޑިރެކްޓަރުކަމުގެ މަގާމުން އިސްތިއުފާދެއްވާފައެވެ.
Advertisement
އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރުގެ މަގާމުގައި ހުންނެވި، މުޙައްމަދު ފަޒީލް ރަޝީދުވެސް މިވަގުތު ހުރީ ސަސްޕެންޝަނުގައެވެ.
އެޗްޑީސީގެ މެނޭޖިންގ ޑިރެކްޓަރ ފަޒުލްގެ އެއްބަނޑު އެއްބަފާ ބޭބެ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައި ފުލުހުން އެންމެ ފުރަތަމަ ފާސްކޮށްފައިވަނީ އެޗްޑީސީ އޮފީހެވެ. މި މައްސަލާގައި ފަޒުލް ވިދާޅުވެފައިވަނީ އެޗްޑީސީގެ ތެރެއިން އެއްވެސް މީހަކަށް އުސޫލުން ބޭރުން ގެވަޅެއް ދީފައި ނުވާނޭކަމަށެވެ.