ރައީސް އިބްރާހީމް މުހައްމަދު ސޯލުހުގެ ވެރިކަމުގެ ފުރަތަމަ އަހަރު 762 ކުށްވެރިއަކަށް މައާފު ދެއްވާފައިވާއިރު، ރައީސް ޑރ.މުހައްމަދު މުއިއްޒުގެ ވެރިކަމުގެ ފުރަތަމަ އަހަރުގެ އޮކްޓޯބަރުގެ ނިޔަލަށް މައާފު ދެއްވާފައިވަނީ 92 ކުށްވެރިންނަށެވެ.
ފާއިތުވި ދިހަ އަހަރު އެންމެ މަދުން ކުށްވެރިންނަށް މައާފުކޮށްދީ އަދަބު ލުއިކޮށްދީފައިވަނީ މި އަހަރުކަން ސަރުކާރުގެ ހިސާބުތަކުން ހާމަވެއްޖެ އެވެ. 
"މިރާ''އިން އެދިގެން ރައީސުލްޖުމްހޫރިއްޔާގެ އޮފީހުން ފޯރުކޮށްދީފައިވާ ހިސާބުތަކަށް ބަލާއިރު 2014 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް މައާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން 3،863 ކުށްވެރިއަކަށް އަދަބު ލުއިކޮށްދީ މައާފު ދީފައިވެ އެވެ. 
ގާނޫނުގައި އޮންނަަ ގޮތުން ކުށްވެރިންނަށް މައާފުދިނުމާއި އަދަބު ލުއިކޮށްދިނުމުގެ ބާރު އޮންނަނީ ރައީސުލްޖުމްހޫރިއްޔާއަށެވެ. އަދި ރައީސުލްޖުމްހޫރިއްޔާ އެ ނިންމެވުން ނިންމަވަނީ ކްލެމެންސީ ބޯޑުން އެމަނިކުފާނަށް އަރުވާ ލަފައެއްގެ މަތިންނެވެ. 
ގާނޫނުގައި ބައެއް ކުށްތަކަށް މައާފުނުދެވޭނެ ކަމުގައި ބަޔާންކޮށްދީފައި އޮތް ނަމަވެސް އެއްވެސް ކުށެއްގެ އަދަބު ލުއިކޮށްދިނުމަށް ހުރަހެއް ނޯވެ އެވެ. 
ރައީސް އޮފީހުން ހިއްސާކުރި ހިސާބުތަކަށް ބަލާއިރު ރައީސް އަބްދުﷲ ޔާމީނުގެ ވެރިކަމުގެ ފުރަތަމަ އަހަރު 248 ކުށްވެރިއަކަށް މައާފު ދެއްވާފައިވެ އެވެ. އަދި ރައީސް އިބްރާހީމް މުހައްމަދު ސޯލުހުގެ ވެރިކަމުގެ ފުރަތަމަ އަހަރު 762 ކުށްވެރިއަކަށް މައާފު ދެއްވާފައިވާއިރު، ރައީސް ޑރ.މުހައްމަދު މުއިއްޒުގެ ވެރިކަމުގެ ފުރަތަމަ އަހަރުގެ އޮކްޓޯބަރުގެ ނިޔަލަށް މައާފު ދެއްވާފައިވަނީ 92 ކުށްވެރިންނަށެވެ. 
ރައީސް ޔާމީނުގެ ވެރިކަމުގެ ފަސް އަހަރުގެ ދައުރުގައި ޖުމްލަ 1،514 ކުށްވެރިންނަށް މައާފު ދެއްވާފައިވެ އެވެ. އެންމެ ގިނަ ކުށްވެރިންނަށް އެމަނިކުފާނު މައާފު ދެއްވައި އަދަބު ލުއިކޮށްދެއްވާފައިވަނީ ރިޔާސީ އިންތިހާބާ ދިމާކޮށް 2018 ވަނަ އަހަރު އެވެ. އެ އަހަރު 626 ގައިދީއަކަށް މައާފު ދެއްވައި އަދަބު ލުއިކޮށްދެއްވާފައިވެ އެވެ. 
ރަައީސް ސާލިހުގެ ވެރިކަމަށް ބަލާއިރު އެމަނިކުފާނުގެ ވެރިކަމުގެ ފުރަތަމަ އަހަރު 762 މީހަކަށް އަދަބު ލުއިކޮށްދެއްވައި މައާފު ދެއްވައި ޖަލުން މިނިވަންކުރައްވާފައިވެ އެވެ. އަދި އެމަނިކުފާނުގެ ވެރިކަމުގެ ފަސް އަހަރު ތެރޭ ޖުމްލަ 2،257 ގައިދީއަކަށް އަދަބު ލުއިކޮށްދެއްވައި މައާފުދެއްވާފައިވެ އެވެ. 
ސިޔާސީ ބޭނުމަށް އިންތިހާބުތަކާ ދިމާކޮށް ޖަލުތަކުން ކުށްވެރިން ދޫކުރުމަކީ ރާއްޖޭގައި އޮންނަ ސަގާފަތެކެވެ. ރައީސް މުއިއްޒުވަނީ އެމަނިކުފާނުގެ ވެރިކަމުގައި އެގޮތަށް މީހުން ޖަލުން ދޫނުކުރައްވާނެ ކަމުގެ ޔަގީންކަން ދެއްވާފަ އެވެ. 
އަދި އަދަބު މައާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ކުށްވެރިން މުޖުތަމައަށް ދޫކޮށްލުމުގެ ކުރިން އެމީހުން އިސްލާހުވެ އަނބުރާ މުޖުތަމައަށް އައުމަށް ތައްޔާރުވެފައިވާކަން ކަށަވަރުކުރައްވާނެކަމަށް ރައީސް ވިދާޅުވެފަައިވެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ