މީގެ ދެ ހަފްތާ ކުރިން ގެއްލުނު މެލޭޝިޔަން އެއާލައިންސްގެ ފްލައިޓް 370 ގެ ބައިތަކެއް ކަމަށް ސެޓެލައިޓް ފޮޓޯތަކުން ދެއްކި ދެކުނު އިންޑިޔާ ކަނޑުގެ ސަރަހައްދުން ހަލާކުވެފައި ހުރި ބައެއް ތަކެތި ފެންނަން ފަށައިފި ކަމަށް އޮސްޓްރޭލިއާގެ ކަމާ ބެހޭ ފަރާތްތަކުން ބުނެފި އެވެ.
އޮސްޓްރޭލިއާގެ އޮފިޝަލުން ބުނީ، އެޤައުމާ ދާދި ކައިރިން އިންޑިޔާ ކަނޑުގެ ދެކުނުގައި ފެންނަން ފެށި ތަކެތީގެ ތެރޭގައި ލަކުޑި ޕެލެޓްތަކަކާއި ބެލްޓްތަކެއް ކަހަލަތަކެތި ހިމެނޭ ކަމަށެވެ. މި ތަކެތި އިއްޔެ ފެނިފައިވާ އިރު، އިންޑިޔާ ކަނޑުގެ ދެކުނަކީ މިވަގުތު ފްލައިޓް ހޯދުމުގެ ކަންތައްތަކުގައި އެންމެ ބުރަ މަސައްކަތްތައް ހުރިހާ ފަރާތްތަކުން ވެސް ކުރަމުން އަންނަ ސަރަހައްދެވެ.
އޮސްޓްރޭލިއާގެ ބޮޑުވަޒީރު ވިދާޅުވީ، މި ތަކެއްޗަކީ ހަމަ އެ ފްލައިޓުގެ ތަކެތި ކަމުގައި ނުވުން ވެސް އެކަށީގެންވާ ކަމަށެވެ. އެހެން ނަމަވެސް، މިހާރު ފްލައިޓު ހޯދުމުގެ މަސައްކަތަށް ލިބިގެން ދިޔައީ އިތުރު ކުރިއެރުމެއް ކަމަށާއި، މިހާރު ފްލައިޓަށް ވީ ގޮތް އެނގުމާ ވަރަށް ގާތަށް އާދެވިއްޖެ ކަމަށް ބޮޑުވަޒީރު ވިދާޅުވި އެވެ.
އޮސްޓްރޭލިއަން މެރިޓައިމް ސެކިއުރިޓީއިން ބުނީ، މިއީ އޮސްޓްރޭލިއާއާއި ނިއު ޒީލެންޑް އަދި އެމެރިކާއިން ގުޅިގެން ފްލައިޓު ހޯދުމުގެ މަސައްކަތް ފެށި ފަހުން މިފަދަ ގޮތަކަށް ހަލާކުވެފައި ހުރި ތަކެތި ހަމަލޮލަށް ފެނުނު ފުރަތަމަ ފަހަރު ކަމަށެވެ. މި ތަކެތި ފެނުނީ، ބޯޓު ހޯދުމުގައި މަސައްކަތް ކުރި މީހުން އުފުލާ މަތިންދާ ބޯޓަކަށެވެ.
"އެ ބޯޓަށް ފެނުނު ތަކެތި ކަމަށް ލިޔެފައިވާ ތަކެތީގެ ތެރޭގައި ލިޔެފައި ވަނީ ލަކުޑި ޕެލެޓަކާ ވައްތަރު އެއްޗަކާ އެކި ކުލަކުލައިގެ ބެލްޓް ތަކެއް. ދެން ހުރި ތަކެއްޗަކީ ކޮން އެއްޗެއް ކަން ބުނެދޭންވެސް ނޭނގޭ ވަރަށް ހަލާކުވެފައި." އޮސްޓްރޭލިއަން މެރިޓައިމް ސެކިއުރިޓީއިން ބުންޏެވެ.ެ
ފެނުނު ތަކެތީގެ ތެރޭގައި ހިމެނޭ ލަކުޑީ ޕެލެޓްތަކަކީ، ކާގޯ އުފުލާ ކަނޑު ބޯޓު ފަހަރާއި މަތިންދާ ބޯޓު ފަހަރުގެ ކާގޯ ސަރަހައްދުގައި ހުންނަ އެއްޗެކެވެ.
މި ތަކެތި ފެނިފަިއ ވަނީ، ޗައިނާއިން ޢާންމުކުރި ސެޓެލައިޓް ފޮޓޯތަކުން ވެސް ދައްކައިދޭ ސަރަހައްދުންނެވެ. އެއީ، ޕާރތްގެ ހުޅަނގު ދެކުނުން 2500 ކިލޯމީޓަރު ދުރުންނެވެ.
މެލޭޝިޔަން އެއާލައިންސްގެ ފްލައިޓް 370 ރާޑަރުތަކުން ގެއްލިފައި ވަނީ މީގެ 2 ހަފްތާ ވަރު ކުރިން، މާރޗް މަހުގެ 8 ވަނަ ދުވަހު އެވެ.