ށ. ފުނަދޫގެ ކަރަންޓްގެ ހިދުމަތް ތަރައްޤީ ކުރުމުގެ މަޝްރޫއުގެ މަސައްކަތް ރައީސުލްޖުމްހޫރިއްޔާ ޑރ. މުޙަންމަދު ވަޙީދު ހަސަން މަނިކު މިއަދު ފައްޓަވައި ދެއްވައިފި އެވެ. މިގޮތުން ރައީސް ވަހީދު ވަނީ، ފުނަދޫ އިންޖީނުގެއަށް އިތުރުކުރެވޭ ބައިގެ ބިންގާ މިއަދު އަޅުއްވައި ދެއްވާފައެވެ.
ފުނަދޫ އިންޖީނުގޭ ސަރަހައްދުގައި މިއަދު ހަވީރު ބޭއްވެވި ރަސްމިއްޔާތުގައި ރައީސް ވަހީދު ވިދާޅުވީ ފުނަދޫއަށް ކަރަންޓްގެ ޚިދުމަތް ފޯރުވައިދިނުމަށްޓަކައި އެރަށުގެ ރައްޔިތުންނާއި ކައުންސިލަރުން ކޮށްދެއްވާފައިވާ ބޮޑެތި ޚިދުމަތްތައް ފާހަގަކުރެއްވޭ ކަމަށެވެ. އަދި އެފަރާތްތަކަށް ޝުކުރު އަދާކުރައްވާ ކަމަށެވެ.
ރައީސްގެ ވާހަކަފުޅުގައި، ޔުޓިލިޓީ ކުންފުނިތައް ރޭވިފައިވާގޮތް މުރާޖާ ކުރަމުން އަންނަ ކަމަށާއި އެކިއެކި ރަށްރަށުގައި އަމިއްލަ ގޮތުން ހިންގަމުން ގެންދާ އިންޖީނުގެތަކަށް، ކުރިއަށް އޮތް ތަނުގައި ސަރުކާރުން އެހީތެރިކަަން ދޭނެ ކަމުގެ ޔަޤީންކަން ދެއްވިއެވެ.