ދައުލަތަށް ލިބޭ އާއްމުދަނީ އިތުރު ކުރުމުގެ ގޮތުން މާލޭގެ ކަރަންޓް ސަބްށީޑީ ކަނޑާލާ އެހެނިހެން ބައެއް ސަބްސިޑީތައް އުވާލުމަށް ފިނޭންސް މިނިސްޓްރީން މަޖިލީހުގެ މާލިއްޔަތު ކޮމިޓީއަށް ހުށަހަޅައިފިއެވެ.
ދައުލަތުގެ ހަރަދުތައް ކުޑަ ކުރުމަށާއި އާއްމުދަނީ އިތުރު ކުރުމާ ގުޅޭ ގޮތުން ފިނޭންސް މިނިސްޓްރީން މަޖިލީހުގެ މާލިއްޔަތު ކޮމިޓީއަށް ހުށަހަޅާފައިވާ ކަރުދާހެއްގައި ބުނެފައިވާ ގޮތުގައި ކަރަންޓް ސަބްސިޑީ ހުއްޓާލައިގެން 135 މިލިއަން ރުފިޔާ ސަލާމަތް ކުރެވޭނެ ކަމަށެވެ.
މީގެ އިތުރުން އާސަންދައަށް ބަދަލު ގެނައުމަށާއި މުސާރަތަކަށް ބަދަލު ގެނައުމަށް އަދި ހުސްވާ މަގާމުތަކަށް މުވައްޒަފުން ނުވެއްދުމަށް ވެސް ފިނޭންސް މިނިސްޓްރީގެ ކަރުދާހުގައި ހިޔާލުދީފައިވެއެވެ.
މީގެ އިތުރުން ދައުލަތުގެ އާއްމުދަނީ އިތުރު ކުރުމަށް، ޓީޛީއެސްޓީ ބޮޑު ކުރުމަށާއި،ޖީއެސްޓީ ނަގާ ބާވަތްތައް އިތުރު ކުރުމަށް އަދި އެއާރޕޯޓު ސާވިސް ޗާޖުގެ ރޭޓް އިތުރު ކުރުމަށާއި، ބިދޭސީންގެ ވިސާފީ 150 ރުފިޔާއަށް އިތުރު ކުރުމަށް ވެސް ފިނޭންސް މިނިސްޓްރީން ހުށަހަޅާފައިވާ ކަރުދާހުގައި ހިޔާލުދީފައިވެއެވެ.
މިގޮތުން ފިނޭންސް މިނިސްޓްރީން ހުށަހަޅާފައިވާ ހިޔާލުތައް ތަންފީޒު ކޮށްފިނަމަ 2.23 ބިލިއަން ރުފިޔާ ސަލާމަތް ކުރެވޭނެ ކަމަށް ފިނޭންސް މިނިސްޓްރީން ބުނެފައިވެއެވެ.
ސީއެންއެމަށް މައުލޫމާތު ދެއްވަމުން ފިނޭންސް މިނިސްޓަރ އަބުދުﷲ ޖިހާދު މިއަދު ވިދާޅުވީ ފިނޭންސް މިނިސްޓްރީން ކޮމިޓީއަށް ހުށަހަޅާފައިވާ ހިޔާލުތަކަކީ ދައުލަތުގެ ހަރަދުތައް ކުދަކޮށް އާއްމުދަނީ އިތުރު ކުރެވޭނެ ގޮތްތަކެއް ހުށަހެޅުމަށް ކޮމިޓީން އެދިފައިވާތީ ހުށަހަޅާފައިވާ ހިޔާލުތަކެއް ކަމަށާއި އެއިން އެއްވެސް ކަމެއް ކުރުމަށް ކެބިނެޓުން ނިންމާފައި ނުވާނެ ކަމަށެވެ.