‎"ޤައުމީ އެއްބައިވަންތަކަމުގެ ޕާޓީ" ގެ ނަމުގައި ރައީސް މައުމޫނުގެ ވެރިކަމުގައި ވަޒީރުކަން ކުރެއްވި އަބްދުﷲ ކަމާލުއްދީން ސިޔާސީ ޕާޓީއެއް އުފައްދަވަން ނިންމަވައިފިއެވެ.
‎މިކަމާއި ގުޅިގެން އަބްދުﷲ ކަމާލުއްދީން ވަނީ ނޫސްބަޔާނެއްވެސް ނެރުއްވާފައެވެ. މިނޫސްބަޔާނުގައި ބުނެފައިވަނީ ‎އައު ޤާނޫނުއަސާސީގެ ދަށުން ރައްޔިތުން ބާރުވެރިކުރެވި ދައުލަތުގެ ބާރުތައް ވަކި ކުރެވިގެން ‎ދިޔުމާއެކުވެސް، ޤައުމުގައި ޙައްލުނުކުރެވިހުރި އެތަކެއް މައްސަލަތަކެއް އެބަހުރިކަމަށެވެ. އަދި ‎މާތްވެގެންވާ އިސްލާމްދީނަށް ނަޞްރުދީ، ޤައުމުގެ ސިޔާދަތު ދަމަހައްޓައި، ރައްޔިތުން ފަރުދީ ގޮތުން‎ބާރުވެރި ކުރުވުމަށާއި ޤައުމުގެ އިޖްތިމާޢީ ދުޅަހެޔޮކަން ވަރުގަދަކުރުމަށް، އައު އަޒުމެއްގައި އައު ސިޔާސީ‎ފަލްސަފާއެއް ވުޖޫދުވާން ޖެހޭ ކަމަށް ދެކިވަޑައިންނަވާ ކަމަށްވެސް ބުނެފައިވެއެވެ.
‎އެހެންކަމުން ކަމާލުއްދީން އާއި އެއް ޚިޔާލެއްގައި، އެއް މަޤްޞަދެއްގައި މަސައްކަތް ކުރައްވާ ފަރާތްތަކެއްގެ ‎މަޝްވަރާގެ މަތިން، "ޤައުމީ އެއްބައިވަންތަކަމުގެ ޕާޓީ" (ނޭޝަނަލް ސޮލިޑަރިޓީ ޕާޓީ) ގެ ނަމުގައި އައު ސިޔާސީ ޕާޓިއެއް ރަޖިސްޓަރީކުރުމުގެ ހުއްދައަށް އެދި އިލެކްޝަން ކޮމިޝަނަށް، މިއަދު ހުށައަޅުއްވާފައި ވާނެކަމަށް މިބަޔާނުގައި ބުނެފައިވެއެވެ.
‎އަދި މިކަމާއިގުޅޭ އިތުރު މަޢުލޫމާތު، އިލެކްޝަން ކޮމިޝަނުން ހުއްދަ ދެއްވުމުން ޙިއްސާ ކުރަމުން ގެންދާނެ ކަމަށްވެސް ކަމާލުއްދީންގެ ބަޔާނުގައި ވަނީ ފާހަގަ ކުރައްވާފައެވެ. ‎އަބްދުﷲ ކަމާލުއްދީން އަކީ ކުރީގެ ރައީސް މައުމޫން އަބްދުލް ޤައްޔޫމްގެ ވެރިކަމުގައި އެކި އެކި ވުޒާރާތަކުގައި ވަޒީރުކަން ކުރެއްވެވި ބޭފުޅެކެވެ.
‎އަބްދުﷲ ކަމާލުއްދީން ދާދި ފަހަކާއި ޖެހެންދެން ހުންނެވީ ކުރީގެ ރައީސް މައުމޫން އަބްދުލް ޤައްޔޫމްގެ ޕާޓީ ކަމަށްވާ އެމްއާރުއެމްގައެވެ. އަދި ޖުމްހޫރީޕާޓީ ގައިވެސް އެމަނިކުފާނު ހުންނެވިއެވެ.
‎މިދުވަސްވަރަކީ ސިޔާސީ ޕާޓީތައް އުފެއްދުމުގެ އަޑުތައް ގަދަވާން ފަށާފައިވާ ދުވަސްވަރެކެވެ. އެގޮތުން ޖުމްހޫރީ ޕާޓީގެ ތެރެއިން ވެސް އިތުރު ސިޔާސީ ޕާޓީއެއް އުފެއްދުމަށް ދަނގެތީ ދާއިރާގެ މެމްބަރު ކާނަލް ރިޓަޔާޑް މުޙައްމަދު ނާޒިމް ދަނީ މަސައްކަތް ކުރައްވަމުންނެވެ.