ސްޕެއިންގެ އެންމެ ގަދީމީ ފުޓްބޯޅަ މުބާރާތް، ކޮޕާ ޑެލް ރޭގެ ފައިނަލަށް، ވަރުގަދަ މެޗެއްގައި 4-4 އިން އެއްވަރުވެ، ރެއާލް މެޑްރިޑް ރޭ ދަތުރުކޮށްފި އެވެ.
އަމިއްލަ ދަނޑުގައި ރެއާލް ސޮސިއެޑާޑްއާ ދެކޮޅަށް ރެއާލް ނުކުތީ ފުރަތަމަ ލެގު 1-0 އިން ކާމިޔާބުކޮށް، ލިބުނު ހިތްހަމަޖެހުމާ އެކުގަ އެވެ.
ނަމަވެސް ރޭގެ ފުރިހަމަަ ވަގުތު ހަމަވިއިރު ސޮސިއެޑާޑް 4-3 އިން އޮތީ މޮޅުވެފަ އެވެ. އޭގެ މާނައަކީ، ކުރީ މެޗުގައި ރެއާލް އިން ޖެހި ލަނޑާ އެކު ޕޮއިންޓްގެ ގޮތުންނާއި ލަނޑުގެ ގޮތުން ވެސް ދެ ޓީމު އެއްވަރުވުމެވެ. އެހެންކަމުން ދާން ޖެހުނީ އިތުރު 30 މިނިޓްގެ ކުޅުމަށެވެ.
އާންމުކޮށް ފުރަތަމަ 11ގައި ހިމެނޭ ދިފާއީ ކުޅުންތެރިޔާ އެންޓޯނިއޯ ރޮޑްރިގާ ކުޅެން ނުކުތީ ވެސް ބަދަލު ކުޅުންތެރިއެއްގެ ގޮތުގައި އިނދެފައި، އިތުރު 30 މިނިޓްގެ ކުޅުމަށެވެ.
އޭނާގެ ލަނޑު އައީ 115 ވަނަ މިނިޓްގައި ނެގި ކޯނަރަކުންނެވެ. ގޯލުގެ ކުރިމަތީގައި ހުރެ ބޮލުން ފޮނުވާލި ބާރު ބޯޅަ ސޮސިއެޑާޑްގެ ކީޕަރަށް މަތަކުރެވޭ ގޮތެއް ނުވި އެވެ.
މި ކާމިޔާބީއާ އެކު މި ސީޒަންގައި ތިން ތަށި ހޯދުމުގެ ފުރުސަތު ރެއާލްއަށް ވެސް އޮތީ ހުޅުވިފަ އެވެ. އެކަމަކު ލީގުގައި އެ ޓީމު އޮތީ ބާސެލޯނާއަށް ވުރެ ތިން ޕޮއިންޓް ފަހަތުގަ އެވެ.
ކޮޕާ ޑެލް ރޭގެ ފައިނަލްގައި ރެއާލްއާ ކުޅޭނެ ޓީމެއް އެނގޭނީ މިރޭ އެތުލެޓިކޯ މެޑްރިޑްގެ ދަނޑުގައި ބާސެލޯނާ އާއި އެތުލެޓިކޯ ކުޅޭ މެޗުގެ ނަތީޖާ އިންނެވެ. ބާސެލޯނާގެ ދަނޑުގައި ކުޅުނު ފުރަތަމަ ލެގު ނިމުނީ ވަރަށް ފޯރިގަދަކޮށް، 4-4 އިންނެވެ.