މާލެ ސިޓީ ކައުންސިލް އޯޑިޓް ކުރެއްވުމަށް މޭޔަރ އާދަމް އާޒިމް އިސްނެންގެވި ނެންގެވުމަކީ ހެޔޮފާލެކެވެ. 2021 ވަނައަހަރުން ފެށިގެން މާލެ ސިޓީ ކައުންސިލް އޯޑިޓް ނުކޮށް އޮތީ އޭރުގެ މޭޔަރ މުއިއްޒުގެ ކޮންފަދަ ނުފޫޒެއް އޮޑިޓަރ ޖެނެރަލަށް އޮވެގެން ކަމެއްނޭނގެއެވެ. އެނގޭ ކަމަކީ މުއިއްޒުގެ މޭޔަރކަމުގައި މާލެ ސިޓީ ކައުންސިލް އޮޑިޓްކޮށްފައި ނެތްކަމެވެ. 
މާލެ ސިޓީ ކައުންސިލްގެ މިހާރުގެ މޭޔަރ އާދަމް އާޒިމްގެ މޭޔަރކަމަށް އެއް އަހަރު ފުރުމާއެކު އާޒިމް އެންމެ ބޮޑު އިސްކަމެއް ދެއްވި އެއްކަމަކަށް އެ ހެއްދެވީ މާލެ ސިޓީ ކައުންސިލް އޯޑިޓް ކުރެއްވުމެވެ. 
މޭޔަރ އާޒިމް އިސްނަންގަވައިގެން އޮޑިޓަރ ޖެނެރަލާއި ބައްދަލު ކުރައްވާ މާލެސިޓީ ކައުންސިލް އޯޑިޓް ކުރުމަށް އެދިވަޑައިގަތުމަކީ އުފާވެރި ހަބަރެކެވެ. ކޮރަޕްޝަނުން ސަލާމަތްވެފައިވާ މުއައްސަސާއަކަށް މާލެ ސިޓީ ކައުންސިލް ހެއްދެވުމަށް މޭޔަރ ބޭނުންފުޅުވެ ވަޑައިގަންނަވާ މިންވަރު ހާމަވެގެންދާ ކަމެކެވެ
2021 އިން 2024ގެ ނިޔަލަށް މާލެ ސިޓީ ކައުންސިލް އޯޑިޓް ކުރައްވާ އެތާނގެ ތެރެއިން ކޮރަޕްޝަންގެ މޫތައް ލުހެލުމަށް އާޒިމް ފައްޓަވާ ދަތުރަކީ ގޮންޖެހުން ބޮޑު އުނދަގޫ .ދަތުރަކަށް ނުވެއެއް ނުދާނެއެވެ. މާލެ ސިޓީ ކައުންސިލަކީ ޑރ. މުއިއްޒުގެ މޭޔަރކަމުގައި ހުންނަވައިގެން އެތައް ކޮރަޕްޝަނެއް ހިންގަވަފައިވާކަމުގެ ތުހުމަތުގެ އިނގިލި ދިއްކުރެވޭ މުއައްސަސާއެކެވެ.
ކުރީގެ މޭޔަރ މުއިއްޒު ދައުލަތުގެ އެންމެމަތީ ވެރިއަކަށް ހުންނަވަނިކޮށް މުއިއްޒަށް ނިސްބަރްވާ ކޮރަޕްޝަންތަކެއް ސާބިތުވާވަރުގެ އޯޑިޓެއް ކުރުމަކީ އޮތް ބޮޑު ގޮންޖެހުމެކެވެ. މުއިއްޒުގެ ވެރިކަމުގައި މާލެ ސިޓީ ކައުންސިލްގެ ދެފުށްފެންނަ ސައްހަ އޯޑިޓެއް އޮޑިޓަރ ޖެނެރަލަށް ކުރެވިދާނެ ކަމާމެދު ޝައްކެވެ. މުއިއްޒާ ގުޅުން ހުރިކަމެއް އޯޑިޓްކުރަން އުޅުމަކީ ބަޑިބެހާ ކުޅުންފަދަ ކަމެކެވެ.