ފުޓުބޯޅައިގެ ދުނިޔޭގައި ބައެއް ފަހަރު ކުދި ގައުމުތަކުން ނުކުމެ މުޅި ދުނިޔެ ހައިރާންކޮށްލައެވެ. މިފަދަ އެއް މިސާލަކީ އެޓްލާންޓިކް ކަނޑުގައި އެފްރިކާގެ ހުޅަނގަށް އޮންނަ ކުޑަ ގައުމެއް ކަމަށްވާ ކޭޕް ވާޑޭއެވެ. ހަތް މިލިއަން މީހުންގެ އާބާދީއެއް އޮންނަ މި ކުޑަކުޑަ ގައުމަކީ ފުޓުބޯޅައިގައި މީގެ ކުރިން ބޮޑު ބާރެއް ނޫނެވެ. ނަމަވެސް، މިފަހަރުގެ ވޯލްޑް ކަޕަށް ކޮލިފައިވުމަށް އެ ގައުމުން ކުރި ދަތުރަކީ ތާރީޚީ ދަތުރެކެވެ. ވަރުގަދަ ކެމަރޫން ފަހަތަށް ޖައްސާލުމަށްފަހު، އެފްރިކާގެ ގްރޫޕް ޑީގެ އެއްވަނަ ހޯދައިގެން ކޭޕް ވާޑޭ ވޯލްޑް ކަޕަށް ކޮލިފައިވީ ކުޅުނު 10 މެޗުގެ ތެރެއިން ހަތް މެޗުން މޮޅުވެގެންނެވެ. ކޭޕް ވާޑޭގެ ގޯލްކީޕަރު ވޮޒީނިއާ ސްޕެއިންގެ ހަމަލާއެއް ދިފާއުކުރަނީ.. ފޮޓޯ/ ގްލޯބަލް ޓައިމްސް ކޭޕް ވާޑޭގައި ފުޓުބޯޅައަކީ އެންމެ މަގުބޫލު ކުޅިވަރެވެ. އެ ގައުމުގެ ލީގުތައް 11 ޑިވިޝަނަކަށް ބަހާލާފައިވާއިރު، ފުޓުބޯޅައިގެ އޮނިގަނޑު ވަނީ ވަރަށް ބޮޑަށް ހަރުދަނާކޮށްފައެވެ. ގައުމީ ޓީމުގެ ކާމިޔާބީގެ އެންމެ ބޮޑު ސިއްރަކީ ޔޫރަޕްގެ އެކި ގައުމުތަކުގައި ކުޅޭ ކޭޕް ވާޑޭއަށް ނިސްބަތްވާ ހުނަރުވެރި ކުޅުންތެރިންނެވެ. މީގެ ކުރިން އެފްރިކާ ކަޕްގެ ކުއާޓާ ފައިނަލުގައި ދެ ފަހަރަކު ވާދަކޮށްފައިވާ މި ޓީމަކީ މިހާރު އެފްރިކާ ބައްރުގެ އުއްމީދީ ޓީމެކެވެ. ވޯލްޑް ކަޕްގައި ކޭޕް ވާޑޭގެ ފުރަތަމަ އިމްތިޙާނަކީ ދުނިޔޭގެ ފުޓުބޯޅައިގެ ގަދަ ބާރެއް ކަމަށްވާ ސްޕެއިންއެވެ. އެންމެންވެސް ލަފާކުރީ ސްޕެއިން ފަސޭހަކަމާއެކު މި މެޗުން މޮޅުވާނެ ކަމަށެވެ. ނަމަވެސް، މުޅި ދުނިޔެ ހައިރާންކޮށްލުމަށްފަހު ކޭޕް ވާޑޭއިން ވަނީ ސްޕެއިން ހިފަހައްޓާފައެވެ. ކޭޕް ވާޑޭގެ ގޯލްކީޕަރު ވޮޒީނިއާ.. ފޮޓޯ/ ސްްކައި ސްޕޯޓްސް ސްޕެއިންގެ ވަރުގަދަ ހަމަލާތަކަށް އެ ޓީމުން ދިނީ ވަރުގަދަ ރައްދެކެވެ. މި މެޗުގައި ކޭޕް ވާޑޭގެ ކުޅުންތެރިން ދެއްކި ހިތްވަރާއި ކެރުމަކީ ފުޓުބޯޅަ ތާރީޚުގައި ލިޔެވިގެންދާނެ ކަމެކެވެ. ސްޕެއިންއާ ދެކޮޅަށް ކުޅުނު މެޗުގެ އަސްލު ބަތަލަކީ ކޭޕް ވާޑޭގެ ކުޅަދާނަ ގޯލްކީޕަރު ވޮޒީނިއާއެވެ. ސްޕެއިންގެ ނުރައްކާތެރި ގިނަ ހަމަލާތަކެއް އޭނާ ވަނީ ހުޝިޔާރުކަމާއެކު ދިފާއުކޮށްފައެވެ. އޭނާގެ ހިތްވަރުގަދަ ކުޅުމުގެ ސަބަބުން ސްޕެއިންއަށް މެޗު ކާމިޔާބު ނުކުރެވި، މެޗު އެއްވަރުވެގެން ނިމުނީއެވެ. ވޮޒީނިއާގެ މި ކުޅުމާއެކު އޭނާއަކީ އެންމެ މެޗަކުން މުޅި ދުނިޔޭގެ ސަމާލުކަން ހޯދި ކުޅުންތެރިއަކަށް ވެގެންދިޔައެވެ. މެޗު ފެށުނުއިރު ވޮޒީނިއާގެ އިންސްޓަގްރާމްގައި ތިބީ އެންމެ 50،000 ފޮލޯވަރުންނެވެ. ނަމަވެސް، ސްޕެއިން މެޗަށްފަހު އެ އަދަދު ވަނީ އާދަޔާ ހިލާފު މިންވަރަކަށް އިތުރުވެފައެވެ. އެންމެ މެޗަކުން އޭނާގެ ފޮލޯވަރުންގެ އަދަދު 5.7 މިލިއަނަށް އެރިއިރު، މިއީ ކުޅިވަރުގެ ދުނިޔޭގައި ވަރަށް މަދުން ނޫނީ ނުފެންނަ ފަދަ ބޮޑު ކުރިއެރުމެކެވެ. މިކަމުން ދޭހަކޮށްދެނީ އޭނާގެ ކުޅުމަށް ދުނިޔޭގެ ފެންވަރުގައި ލިބުނު ބޮޑު ތަރުހީބެވެ. ވޮޒީނިއާގެ މި ކާމިޔާބީއަކީ ހަމައެކަނި އޭނާއަށް ލިބުނު ކުރިއެރުމެއް ނޫނެވެ. މިއީ ކުދި ގައުމުތަކުގެ ކުޅުންތެރިންނަށް ލިބުނު ވަރަށް ބޮޑު ހިތްވަރެކެވެ. މިކަމުގެ ސަބަބުން ކޭޕް ވާޑޭގެ ފުޓުބޯޅައަށް މުޅި ދުނިޔޭގެ ސަމާލުކަން ވަނީ ހުއްޓިފައެވެ.