ކެލިފޯނިއާގެ އައްސޭރިފަށާ ދުރުނޫން ހިސާބެއްގައި، ސެން ފްރެންސިސްކޯ ކަނޑުއޮޅީގެ ތެރޭގައި ބިރުވެރި ކަމުން ފުރިފައިވާ ރަށެއްވެއެވެ. ސިނާއީ ބިނާތަކާއި ނުރައްކާތެރި ހިލަ ފަރުބަދަތަކުގެ މައްޗަށް އެކުލެވިގެންވާ މި ކުޑަކުޑަ ރަށަކީ ހިތްގައިމު ތަނެއް ނޫނެވެ. 1934 ވަނަ އަހަރު، އެންމެ ވަރުގަދަ ސަލާމަތީ ފިޔަވަޅުތައް އަޅާފައިވާ ޖަލެއް އެޅުމަށް މިތަން ހޮވި އެއް ސަބަބަކީވެސް އެއީއެވެ. އަދި 1973 ވަނަ އަހަރުން ފެށިގެން، ބިރުވެރި އަދި ކަންކަން ހޯދައި ބަލަން ބޭނުންވާ ފަތުރުވެރިންގެ މެދުގައި އަލްކަޓްރާޒް މަގުބޫލު ތަނަކަށް ވީވެސް މި ސަބަބަށްޓަކައެވެ.
"ބާރޑްމޭން" އަދި "އަލް ކަޕޯން" ފަދަ ނަން މަޝްހޫރު ކުށްވެރިންނަކީ މި ބިރުވެރި ރަށުގައި ޖަލު ހުކުމް ތަންފީޒުކުރި 1،500 އަށްވުރެ ގިނަ ކުށްވެރިންގެ ތެރެއިން މަދު ބައެކެވެ. ނުބައި ނިޔަތާއި ނުރައްކާތެރި ކުށްވެރިންގެ ސަބަބުން މި ޖަލުގައި އުފެދިފައިވާ ބިރުވެރި އަސަރުތައް މިއަދުވެސް އެތަނުގެ ބާރުގެ ތެރޭގައި ދެމިގެންވެއެވެ.
އަލްކަޓްރާޒަކީ ހަމައެކަނި ބޭނުންކުރުން ހުއްޓާލާފައިވާ ބިނާއެއް ނުވަތަ ފަތުރުވެރިން ޒިޔާރަތްކުރާ ތަނެއް އެކަންޏެއް ނޫނެވެ. ޖަލު ހުކުމް ތަންފީޒުކުރި އެތައްބަޔަކު ވަޅުލެވިފައިވާ ތަނެކެވެ. އެތަނުގައި ގައިދީން އުފުލި ތަކުލީފުތަކުގެ ބިރުވެރި ހަނދާންތައް އާކޮށްދޭ ތަނެކެވެ.
އަލްކަޓްރާޒަކީ ބިރުވެރި ތަނެއްތަ!
އަލްކަޓްރާޒް އެންމެ ބޮޑަށް މަޝްހޫރުވެފައިވަނީ އެތަނުގައި ހިނގާ ކަމަށް ބުނާ ބިރުވެރި ކަންތައްތަކުގެ ސަބަބުންނެވެ. ފަޅަށް ހުންނަ ޖަލު ގޮޅިތަކުގެ ތެރެއިން އާދަޔާ ހިލާފު އަޑުތައް އިވޭއިރު، އެކަނި ބަންދުކުރާ ގޮޅިތަކުގެ ކަންކަނުން ސިއްރު އަޑުތައް އިވޭ ކަމަށްވެއެވެ. މީގެ ތެރެއިން "ސެލް ބްލޮކް D" އަކީ މިފަދަ ހާދިސާތައް އެންމެ ގިނައިން ހިނގާ ތަނެވެ. މިއީ މާޒީގައި އެންމެ ނުރައްކާތެރި ކުށްވެރިން އެކަހެރިކޮށް ބަންދުކުރުމަށް ބޭނުންކުރި ތަނެކެވެ.
އަލްކަޓްރާޒް އަކީ ބިރުވެރި ހާދިސާތައް ބަލާލަން ދާ ފަތުރުވެރިންގެ މަންޒިލަކަށް ވުމުގެ ކުރިންވެސް، އަލްކަޓްރާޒްގެ ތާރީހުގައި ބުނެދޭން ނޭނގޭ ގޮތް ނޭނގޭ ހާދިސާތައް ހިނގާފައިވާ ރަށެކެވެ. އެ ޖަލުގެ ފުރަތަމަ ވޯޑަން، ޖޭމްސް ޖޯންސްޓަން އަކީ ދުނިޔެވީ ކަންކަމަށް އިސްކަންދޭ މީހެއް ނަމަވެސް، އޭނާއަށްވެސް ބިރުވެރި ކަންކަމާ ކުރިމަތިލާން ޖެހިފައިވާ ކަމަށް ބުނެފައިވެއެވެ.
ބިރުވެރި ހާދިސާތައް އެންމެ ގިނައިން ހިނގާ ތަންތަން:
29 އަހަރު ވަންދެން އަލްކަޓްރާޒް ޖަލަކީ ހިލަ ރަށެއްގައި ހިންގަމުންދިޔަ ހަރަކާތްތެރި ތަނެކެވެ. ނަމަވެސް އެތަން ހިންގުމަށް ހިނގާ ހަރަދު ބޮޑުވުމުގެ ސަބަބުން، 21 މާރިޗު 1963 ގައި ރަސްމީކޮށް ޖަލު ބަންދުކުރެވުނެވެ. ކޮންމެ އައު ގައިދީއަކާއި، ބޭނުންވާ ހުރިހާ ތަކެއްޗެއް، އެންމެ ކުޑަމިނުން ބޯފެންވެސް ގެންނަން ޖެހެނީ ބޯޓުފަހަރުގައެވެ. އެހެންކަމުން މިއީ ސަރުކާރުގެ ބަޖެޓަށް ބޮޑު ބުރައަކަށް ވިއެވެ. މީގެ އިތުރުން ކަނޑުގެ ލޮނުފެނުގެ ސަބަބުން އިމާރާތްތައް އަވަސް އަވަހަށް މަރާމާތުކުރަން ޖެހުމަކީވެސް ދިމާވި މައްސަލައެކެވެ.
މި ހުރިހާ ކަމެއް މިހެން ހުރި ނަމަވެސް، 2025 ވަނަ އަހަރު ރައީސް ޑޮނަލްޑް ޓްރަމްޕް ވަނީ މި ޖަލު އަލުން ހުޅުވުމުގެ ވިސްނުންފުޅު ގެންގުޅުއްވާކަން ހާމަކުރައްވާފައެވެ. އެމަނިކުފާނުގެ އުންމީދަކީ އެންމެ ނުރައްކާތެރި ކުށްވެރިން ބައިތިއްބާ ވަރުގަދަ ޖަލެއްގެ ގޮތުގައި އެތަން އަލުން ބަދަލުކުރުމެވެ. މިފަދަ ބޮޑު މަޝްރޫއަކަށް ގިނަ ކަންތައްތަކެއް ފުރިހަމަކުރަން ޖެހޭއިރު، މި ނިންމެވުމުގައި އެ ރަށުގެ މިލްކުވެރިކަމަށް ދައުވާކުރާ އެމެރިކާގެ އަސްލު ވަޒަންވެރިންގެ ހައްގުތަކާމެދު ސުވާލު އުފެދެއެވެ.
އަލްކަޓްރާޒް ރަށުގެ އަސްލު ވަޒަންވެރިންގެ ދައުވާ
1963 ގައި ޖަލު ބަންދުކުރިތާ ދެ އަހަރު ފަހުން، ސިއޫކްސް ދަރިކޮޅުގެ ބަޔަކު 1868 ވަނަ އަހަރުގެ އެއްބަސްވުމެއްގެ ދަށުން އެ ރަށް އަލުން ހޯދަން މަސައްކަތްކުރިއެވެ. އެމީހުން ގަބޫލުކުރި ގޮތުގައި ފެޑެރަލް ސަރުކާރުން ބޭނުންނުކުރާ ބިމަކަށް އެ ރަށް ވުމުން، އެއީ އަނެއްކާވެސް އެމީހުންގެ މިލްކެކެވެ. 1969 ވަނަ އަހަރުގެ ނޮވެމްބަރު މަހު ގާތްގަނޑަކަށް 90 މީހުން އެ ރަށަށް އަރައި، އެތަން ހިފުމަށް މަސައްކަތްކުރިއެވެ.
ނަމަވެސް އެތަނުގައި ތިބޭތާ ދެ މަސް ފަހުން، އެ ހަރަކާތުގެ ލީޑަރު ރިޗަރްޑް އޯކްސްގެ އަންހެން ދަރިފުޅު، އިވޮން ރޯޒް އޯކްސް ވެއްޓި މަރުވުމަކީ އެ ރަށުގެ ތާރީހުގައި ލެވުނު އަނދިރި ސިއްކައެކެވެ. އިސްތިއުމާރީ ބާރުތަކުގެ ކުރިންވެސް މި ރަށަކީ ރޫހާނީ ގޮތުން ހާއްސަ ތަނެއްގެ ގޮތުގައި އަސްލު ވަޒަންވެރިން ދެކެއެވެ.
ޖޭމްސް ޖޯންސްޓަންގެ ކްރިސްމަސް ފުރޭތަ
ބިރުވެރި ކަންކަމަށް އިތުބާރު ނުކުރާ ޖަލުގެ ފުރަތަމަ ވޯޑަން ޖޭމްސް ޖޯންސްޓަން އަށް ވަނީ ބުނެދޭން ނޭނގޭ ހާދިސާއަކާ ކުރިމަތިލާން ޖެހިފައެވެ. ކްރިސްމަސް ޕާޓީއެއްގެ ތެރޭގައި، އަޅި ކުލައިގެ ކޯޓެއްލައިގެން ހުރި، އިނގިރޭސި ވިލާތުގެ ވިކްޓޯރިއަން ޒަމާނުގެ ސިފައެއް ހުރި މީހަކު ކުއްލިއަކަށް އެތަނަށް ފެނުނެވެ. އެ މީހާ ފެނުމާއެކު މުޅި ކޮޓަރި ފިނިވެ، ކައިރީގައި ހުރި އުނދުން ނިވުނެވެ. އަދި އެއްވެސް މީހަކަށް އެއްޗެއް ބުނެވުމުގެ ކުރިން އެ މީހާ ގެއްލުނެވެ. ބައެއް މީހުން ގަބޫލުކުރާ ގޮތުގައި އެއީ 1857 ވަނަ އަހަރު ކަނޑަށް ގެނބިގެން މަރުވި މައިކަލް މޭން ނަމަކަށް ކިޔާ މުވައްޒަފެކެވެ. މީގެ އިތުރުން، ޖަލުގެ ފާރުތަކުގެ ތެރެއިން އަންހެނަކު ރޮއި ހޭރޭ އަޑު އިވޭ ކަމަށްވެސް ވޯޑަން ބުނެފައިވެއެވެ.
އަލްކަޓްރާޒްގެ "ބާރޑްމޭން" އަދި ފެހި ހެދުންއެޅި އަންހެނާ
ޖަލުގެ ފާރުތަކުގެ ތެރެއިން އިވޭ ރުއިމުގެ އަޑަކީ އެތަނުގައި ބަންދުކޮށްފައި ހުރި ނުރައްކާތެރި ކުށްވެރިއެއް ކަމަށްވާ ރޮބަރްޓް ފްރެންކްލިން ސްޓްރައުޑް (ބާރޑްމޭން) އާ ގުޅުންހުރި ކަމެއް ކަމަށް ބައެއް މީހުން ބުނެއެވެ. އޭނާއަކީ ތިން މީހަކު މަރާލި މީހެކެވެ. ބައެއް މީހުން ބުނާ ގޮތުގައި އެ އިވޭ ރުއިމުގެ އަޑަކީ އޭނާގެ ސަބަބުން އަނިޔާ ލިބުނު އަންހެނެއްގެ ރޫހެވެ.
"ލޭޑީ އިން ގްރީން" ނުވަތަ ފެހި ހެދުން އެޅި އަންހެން މީހާގެ ވާހަކައަކީވެސް މަޝްހޫރު ވާހަކައެކެވެ. ބައެއް މީހުން ބުނާ ގޮތުގައި އެއީ އެތަނުގެ ވޯޑަންއެއްގެ އަމިއްލައަށް މަރުވި އަނބިމީހާއެވެ. ނަމަވެސް މިކަން ސާބިތުވާނެ ތާރީހީ ހެކިތަކެއް ނެތެވެ. އެހެން ހޯދުންތަކުން ދައްކާ ގޮތުގައި 1891 ވަނަ އަހަރު ކެޕްޓަން ވިލިއަމް ޑިއެޓްޒް ނަމަކަށް ކިޔާ މީހަކު އޭނާގެ އަނބިމީހާ ގަޔަށް ބަޑިޖަހާ މަރާލުމަށްފަހު އަމިއްލައަށް މަރުވި ހާދިސާއަކާ މިކަން ގުޅިފައި އޮވެދާނެއެވެ.
14-ޑީ ގޮޅީގެ ސިއްރު
އަލްކަޓްރާޒް ރަށުގައި ހިނގާ ސައިތާނީ ރޫހާނީ ކަންތައްތަކުގެ ފަހަތުގައިވަނީ ކޮން ބައެއްކަން ދެނެގަތުމަކީ އުނދަގޫ ކަމެކެވެ. ނަމަވެސް، އެކަހެރިކޮށް ބަންދުކުރާ ގޮޅިއެއް ކަމަށްވާ "14-ޑީ" އަކީ ނާމާން އަދި ބިރުވެރި ކަންތައްތަކެއް އެކުލެވިގެންވާ ތަނެއްކަމާމެދު އެއްވެސް ޝައްކެއް ނެތެވެ.
ގޮޅިއަށް ޒިޔާރަތްކުރާ މީހުންނަށް، ކުއްލިއަކަށް ފިނިހޫނުމިން ދަށްވާކަން ފާހަގަކުރެވެއެވެ. އެއީ އެތަނުގެ ހޫނުކަން ކޮންމެވެސް އެއްޗަކުން ދަމައިގަންނަ ފަދަ އިހުސާސެކެވެ. މިއީ ރޫހާނީ ބާރެއް ނުވަތަ ނާމާން ކަމެއް އެތަނުގައި ހުރިކަމުގެ ހެއްކެކެވެ.
1940 ގެ އަހަރުތަކުގެ ރެއެއްގައި، 14-ޑީ ގޮޅީގައި ބަންދުކޮށްފައި ހުރި ގައިދީއަކު އެހީއަށް އެދި ހަޅޭއްލަވަން ފެށިއެވެ. އޭނާ ދައްކަމުންދިޔަ ވާހަކަތައް ސާފުނުވި ނަމަވެސް، އޭނާ ބިރުން ހަޅޭއްލަވަމުން ދިޔައީ އޭނާ މަރާލަން އުޅޭ އެއްޗަކާ ބެހޭގޮތުންކަން ބައެއް މީހުންނަށް ދެނެގަނެވުނެވެ. ޖެހިގެން އައި ދުވަހު، ޖަލުގެ ބަލަދުވެރިންނަށް ފެނުނީ އެ ގައިދީގެ ކަރުގައި ހިފާ މަރާލާފައި އޮއްވައެވެ. މިއީ މީހަކަށް ކުރެވޭނެ ކަމެއް ކަމަށް ނުބެލެވޭ ފަދަ ގޮތަކަށް ހިނގާފައިވާ ކަމެކެވެ. މިއަދުވެސް އެ ގޮޅިން އިވޭ ރުއިމުގެ އަޑުތަކަކީ، އެރޭ އޭނާ މަރާލި "ލޮލުން އަލި ނުކުންނަ މަހުލޫގާ" މެދު އެހެން މީހުންނަށް ދޭ އިންޒާރެއް ފަދަ އެއްޗެކެވެ.
އަލް ކަޕޯންގެ ބަންޖޯ
އަލްކަޓްރާޒްގެ އެންމެ މަޝްހޫރު އެއް ފުރޭތައަކީ އެ ޖަލުގައި ބަންދުކުރެވުނު އެންމެ ނުރައްކާތެރި ކުށްވެރިޔާ، އަލް ކަޕޯންއެވެ. އޭނާއަށް އިއްވި 11 އަހަރުގެ ޖަލު ހުކުމުގެ ތެރެއިން އަލްކަޓްރާޒްގައި ހޭދަކުރީ އެންމެ 7 އަހަރެވެ.
ޖަލުގައި ހުއްޓާ އޭނާގެ ސިއްހީ ހާލަތު ވަރަށް ބޮޑަށް ގޯސްވުމުން، އޭނާ މިނިވަންކޮށް ފްލޮރިޑާގެ ވިލާއަކަށް ބަދަލުކުރެވުނެވެ. އެތަނުގައި ހުއްޓާ 1947 ވަނަ އަހަރު އޭނާ މަރުވީ ސިފިލިސް ބަލީގެ ސަބަބުން ސިކުނޑީގެ ހާލަތު ދަށްވެގެންނެވެ.
އޭނާ މަރުވީ ފްލޮރިޑާގައި ކަމަށްވީއިރު، އަލްކަޓްރާޒްގެ ފެންވަރާ ބައިން އޭނާގެ ރޫހު ފެންނަނީ ކީއްވެގެން ހެއްޔެވެ؟ ބެލެވޭ ގޮތުގައި ޖަލުގައި އުޅުނުއިރު އޭނާ ފެންވަރާ ބަޔަށް އެކަނި ދިއުމުގެ ފުރުސަތު ލިބެއެވެ. އެތަނުގައި އޭނާ ބަންޖޯ ކުޅެން ދަސްކޮށް، މިއުޒިކްގެ ތެރެއަށް ގެއްލިފައި ހުރެއެވެ. މަރުވުމުގެ ކުރިން އޭނާގެ ސިކުނޑީގެ ހާލަތު 12 އަހަރުގެ ކުއްޖެއްގެ ފެންވަރަށް ދަށަށް ދިޔައިރު، އޭނާގެ ހަޔާތުގެ އެންމެ އުފާވެރި ހަނދާންތަކަކީ ބަންޖޯ ކުޅެން ހޭދަކުރި ވަގުތުތައް ކަމަށް ވެދާނެއެވެ. މިއަދުވެސް އެތަނަށް ޒިޔާރަތްކުރާ މީހުންނަށް ކަޕޯންގެ ބަންޖޯގެ މިއުޒިކްގެ އަޑު އިވޭ ކަމަށް ބުނެއެވެ.
ނާމާން ކަންތައްތައް ތަހުގީގުކުރާ މީހުން
މަރުވުމަށްފަހު ވާނުވާ ބަލަން ބޭނުންވާ ގިނަ ބަޔަކު އަލްކަޓްރާޒްއަށް ޝައުގުވެރިވެއެވެ. ޓީވީ ޝޯތަކުގެ މަޝްހޫރު ޓީމުތައް ކަމަށްވާ TAPS ގެ ޖޭސަން ހޯސް އާއި ގްރާންޓް ވިލްސަން ވަނީ އެތަނަށް ޒިޔާރަތްކޮށް، ކަޅު ހިޔަނިތަކާއި، ހިނގާ އަޑާއި، ބޭންކު ފޭރޭ ހެރީ ބާނެޓް ކަމަށް ބުނާ މީހެއްގެ އަޑު ރެކޯޑްކޮށްފައެވެ.
މީގެ އިތުރުން 'Ghost Adventures' އަދި 'The Dead Files' ފަދަ ޓީމުތަކުންވެސް ވަނީ އެތަނުން ތަފާތު ހެކިތައް ހޯދާފައެވެ. 'Ghost Lab' ގެ ތަހުގީގުތަކުގައި "އަހަރެން ތިބާ ބޭނުން" ނުވަތަ "އަހަރެން ތިބާ މަރާލަން ބޭނުން" ފަދަ ބިރުވެރި އަޑުތައް ރެކޯޑް ކުރެވިފައިވެއެވެ.
ނަމަވެސް، އަލްކަޓްރާޒްގެ ބައެއް މުވައްޒަފުން މިފަދަ ކަންކަން ހިނގާކަމަށް އިންކާރު ކުރެއެވެ. އެއީ އެފަދަ ކަންކަމަށް ފަރިތަ ނުވުމުން ކަމަށްވެސް ވެދާނެއެވެ. ނުވަތަ އެއީ ގިނަ އަދަދެއްގެ މީހުން އެތަނަށް ޖަމާވިޔަ ނުދިނުމަށް ކުރާ ކަމަކަށްވެސް ވެދާނެއެވެ.
ސިލްވިއާ ބްރައުންގެ ޒިޔާރަތް
1984 ވަނަ އަހަރު، ރޫހާނީ ކަންކަން ދެނެގަތުމުގެ ގާބިލުކަން ހުރި ސިލްވިއާ ބްރައުން އަލްކަޓްރާޒްއަށް ދިޔައެވެ. އޭނާއަށް އެ ޖަލުގެ އަންނައުނު ދޮންނަ ބައިން ވަރަށް ބޮޑު ނާމާންކަމެއް އިހުސާސް ކުރެވުނެވެ. އެތަނުގައި ހިނގާފައިވާ އަނިޔާވެރިކަމުގެ އަސަރު އަދިވެސް ހުރި ކަމަށް އޭނާ ބުންޏެވެ.
އޭނާ ސިފަކުރި ގޮތުގައި އެތަނުން އޭނާއަށް ފެނުނީ ބޯތަލަ، އިސްކޮޅުން ދިގު، ލޯ ކުޑަ މީހެކެވެ. ކުރީގެ ގައިދީއަކު ވަނީ އެއީ "ބަޗަރ" މަލްޑޮވިޓްޒް ނަމަކަށް ކިޔާ މީހެއްކަން ކަށަވަރުކޮށްދީފައެވެ. ބުނެވޭ ގޮތުގައި އޭނާ މަރާލާފައިވަނީ އަންނައުނު ދޮންނަ ކޮޓަރީގައެވެ. އޭނާގެ ރޫހު އަދިވެސް އެތަނުގައި އުޅެނީ ބަދަލުހިފުމުގެ ރޫހެއްގައެވެ.
އަލްކަޓްރާޒްގެ ކުރު ތާރީހެއް
އަލްކަޓްރާޒްގެ ތާރީހަށް ބަލާއިރު، އެ ރަށަށް ފުރަތަމަ ނަން ދިނީ ސްޕެއިންގެ ކަނޑުގެ ސިފައިންގެ އޮފިސަރެއް ކަމަށްވާ ހުއާން މެނުއަލްއެވެ. އޭނާ އެރަށަށް ދިން ނަމަކީ "ލާ އިސްލާ ޑި ލޮސް އަލްކަޓްރާސަސް" އެވެ. މީގެ މާނައަކީ "ޕެލިކަން ދޫނިތަކުގެ ރަށް" މިއެވެ.
1846 ވަނަ އަހަރު މި ރަށް ހަދިޔާ ކުރެވުނީ ލައިޓްހައުސްއެއް އެޅުމަށެވެ. ނަމަވެސް، ފަހުން އެމެރިކާގެ މިލިޓަރީ ޖަލެއްގެ ގޮތުގައި ބޭނުންކުރަން ފެށުނެވެ. 1933 ވަނަ އަހަރު މިއީ ފެޑަރަލް ޖަލަކަށް ބަދަލުވެ، އެމެރިކާގެ އެންމެ ނުރައްކާތެރި ކުށްވެރިން ބައިތިއްބާ ތަނަކަށް ވިއެވެ.
1973 ވަނަ އަހަރު އާންމުންނަށް ޒިޔާރަތްކުރެވޭ ގޮތަށް މި ރަށް ހުޅުވާލުމާއެކު، އަލްކަޓްރާޒްގެ ބިރުވެރި ވާހަކަތައް މުޅި ދުނިޔެއަށް މަޝްހޫރުވެގެން ދިޔައެވެ. މިއަދުވެސް ސެން ފްރެންސިސްކޯއަށް ދާ ފަތުރުވެރިންގެ އެންމެ ބޮޑު އެއް ޝައުގުވެރިކަމަކީ މި ބިރުވެރި ރަށް ބަލާލުމެވެ.