ބައްޔެއް ޖެހުމުން ޝިފާއަށް އެދި ބަލި އިތުރަށް ބޮޑުވާނެ ކަންކަން ނުކުރާ ފަދައިން ދިރިއުޅުމުގައި ކަންބޮޑުވާންޖެހޭ ކަންކަން ކުރިމަތިވިޔަސް ޢަމަލުކުރަން އޮތީ ހަމަ އެގޮތަށެވެ. ކަންބޮޑުވުންތަކުން ސަލާމަތްވެވޭނީ ކޮން ގޮތަކަށް ޢމަލުކުރުމުންކަން މުސްލިމުންނަށް އެނގޭނެއެވެ. އަހުރެން މިކުރާ ކަމަކީ ހަނދާންކޮށްދިނުމެވެ.  
ދިރިއުޅުމުގައި ކަންބޮޑުވެ ހިތްދަތިވާންޖެހޭ ކަންކަން ކުރިމަތިވުމުން އެޙާލަތުން ސަލާމަތްވުމުގެ ބޭނުމުގައި ބައެއް މީހުންނަށް ފާފަތަކަށް އަރައިގަނެވެން ފަށައެވެ. އެގޮތުން އެކި މީހުންނަށް ކުރެވެނީ އެކި ބާވަތުގެ ފާފަތަކެވެ.  
އެކަމުގެ ނަތީޖާއަށް ވިސްނައިލާށެވެ. އެއިރުން ތިމާއަށް އެދެވެނީ ﷲ ތަޢާލާ އާއި ދުރަށެވެ. ﷲ ތަޢާލާ އާއި ދުރަށް ގޮސްގެން ޙައްލުކުރެވޭނީ ކޮން މައްސަލައެއް ހެއްޔެވެ؟ ނުވަތަ ލިބޭނީ ކޮން އުފާވެރިކަމެއް ހެއްޔެވެ؟ މައްސަލަތައް ޙައްލުކުރެވޭނީވެސް އުފާވެރިކަން ލިބޭނީވެސް ﷲ ތަޢާލާ އާއި ކުއްތަންވެވުނު ވަރަކުން ނޫން ހެއްޔެވެ؟  
ލޮބުވެތި އަޚުންނާއި އުޚުތުންނޭވެ! މައްސަލަތައް ޙައްލުވެ އުފާވެރިކަން ބޭނުންވާނަމަ ފާފަކުރުން ހުއްޓާލާފައި އަވަހަށް ﷲ ތަޢާލާގެ މަގަށް އެނބުރޭށެވެ! ﷲ ތަޢާލާ އާއި ކުއްތަންވާން ގަދައަޅައި މަސައްކަތް ފަށާށެވެ. ﷲ ތަޢާލާގެ ރަޙްމަތާއިމެދު މާޔޫސްނުވާށެވެ! ފާފަކުރުން ހުއްޓާލައި ﷲ ތަޢާލާގެ މަގަށް ތިބާ އެނބުރޭއިރަށް ﷲ ތަޢާލާ ތިބާދެކެ ލޯބިވޮޑިގަންނަވާނެތެވެ. ތިބާގެ ކަންބޮޑުވުންތައް ފިލުއްވަވައި ދެއްވަވާނެތެވެ. އިން ޝާ ﷲ  
ޔަޤީންކުރަންވީ ކިތަންމެ ގިނަ ފާފަތަކެއް ކުރި ނަމަވެސް އެއިން އެއްވެސް ފާފައަކަށް އަދި ހުރިހާ ފާފަތައް އެކުވެގެންވެސް ތިބާއަށް ކޮށްދެވޭނެ އެއްވެސް ރަނގަޅުކަމެއް ނެތްކަމެވެ. ލިބޭނީ ހަމައެކަނި ގެއްލުން ކަމެވެ. ފާފަތައް ތިބާ ގެންދުވާނީ މައްސަލަތައް ޙައްލުވުމާއި ދުރަށް ކަމެވެ. އެންމެފަހުން ވެއްޓެންޖެހޭނީ އެތަނެއް ދެކެ ތިބާ އެންމެ ބޮޑަށް ބިރުގަންނަ ނަރަކައަށް ކަމެވެ.  
ހިތްވަރު ލިބިގަންނަންވީ މިއާޔަތުންނެވެ.  
"ތިޔަބައިމީހުން އެކަލޭގެފާނަށް ނަޞްރު ނުދިނަސް، ހަމަކަށަވަރުން، ﷲ، އެކަލޭގެފާނަށް ނަޞްރު ދެއްވިއެވެ. ދެމީހުންކުރެ އެކަކު ކަމުގައިވާ ޙާލް، ކާފިރު ވި މީހުން، އެކަލޭގެފާނު ނެރެލިހިނދުގައެވެ. އޭގެ ދެކަލުން (ޘައުރު ފަރުބަދައިގެ) ހޮހަޅައިގައި ތިއްބެވި ހިނދުގައެވެ. އެކަލޭގެފާނުގެ އެކުވެރިޔާއަށް، ހިތާމަނުކުރައްވާށޭ، ހަމަކަށަވަރުން، ﷲ ވޮޑިގެންވަނީ، ތިމަންމެންނާ އެކުގައޭ ވިދާޅުވިހިނދުގައެވެ. އެހިނދު އެކަލޭގެފާނަށް ހިތްޕުޅު ހަމަޖެހުމާއި، އަމާންކަން ﷲ ބާވައިލެއްވިއެވެ. އަދި ތިޔަބައިމީހުންނަށް ނުފެންނަ ލަޝްކަރުތަކަކުން އެކަލޭގެފާނަށް އެކަލާނގެ ގަދަކަން ދެއްވިއެވެ. އަދި ކާފިރު ވި މީހުންގެ ބަސް، އެންމެ ދަށްވެގެންވާ ބަސްކަމުގައި ލެއްވިއެވެ. ﷲ ގެ ބަސްފުޅު އެއީ، އެންމެ މަތިވެރިވެގެންވާ ބަސްފުޅުކަމުގައި ލެއްވިއެވެ. ﷲ އީ، ޢަޒީޒް ވަންތަަ، ޙަކީމްވަންތަ ރަސްކަލާނގެއެވެ."
(އައްތައުބާ: 40)  
ޔަޤީންކުރަންވީ "-- ހިތާމަނުކުރައްވާށޭ، ހަމަކަށަވަރުން، ﷲ ވޮޑިގެންވަނީ، ތިމަންމެންނާ އެކުގައޭ—" އޮތް ބަސްފުޅަކީ ހަމަ ތިމާއަށްވެސް ބާވައިލެއްވެވި ބަސްފުޅެއް ކަމަށެވެ. ﷲ ތަޢާލާ ތިބާއާއިއެކު ވޮޑިގެންވާއިރު ތިބާ ދެރަކޮށް ނިކަމެތިކޮށް ހިތްދަތިކުރެވޭނީ ކާކަށް ހެއްޔެވެ؟
 
- މުފްތީ މެންކުގެ ދަރުސަކުން