ދިވެހިރާއްޖެއަކީ ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރާނެ މަންޒިލެއްގެ ގޮތުގައި ދެމިއޮންނާނެ ކަމުގެ ޔަޤީންކަން ފަތުރުވެރިކަމާބެހޭ ވުޒާރާއިން ދީފިއެވެ. މިއަދު ނެރުނު ނޫސްބަޔާނެއްގައި ވުޒާރާއިން ބުނެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖެއަކީ ފަތުރުވެރިންނަށް އަމާން އަދި މަޤުބޫލު މަންޒިލެއްގެ ގޮތުގައި ދެމެހެއްޓުމަށް ގިނަގުނަ މަސައްކަތްތަކެއް ކުރަމުންދާ ކަމަށެވެ.ނޫސްބަޔާނުގައި ފާހަގަކޮށްފައިވާ ގޮތުގައި، މިއަހަރު ފަތުރުވެރިކަމުގެ ދާއިރާއިން ވަނީ އެތައް ކާމިޔާބީތަކެއް ހޯދިފައެވެ. އެގޮތުން، 10 ފެބްރުއަރީގައި އެއްދުވަހު އެންމެ ގިނަ ފަތުރުވެރިންގެ ގޮތުގައި 10،213 ފަތުރުވެރިން ރާއްޖެއަށް ޒިޔާރަތްކުރިއެވެ. އަދި ފެބްރުއަރީ މަހު އެންމެ ގިނަ ފަތުރުވެރިންގެ ގޮތުގައި 217،392 ފަތުރުވެރިން ރާއްޖެއަށް ޒިޔާރަތްކުރިއެވެ. މި ކާމިޔާބީތަކުން ދައްކުވައިދެނީ ފަތުރުވެރިންގެ އިތުބާރު ރާއްޖެއަށް އޮތްކަމަށް ވުޒާރާއިން ބުނެފައިވެއެވެ.އެހެންނަމަވެސް، ފަތުރުވެރިކަމާބެހޭ ވުޒާރާގެ ސްޓޭޓް މިނިސްޓަރ މުޙައްމަދު ނިހާދުގެ ބަސްތަކަކީ ސަރުކާރުގެ ރަސްމީ ބަހެއް ނޫންކަން ވުޒާރާއިން ފާހަގަކޮށްފައިވެއެވެ. އަދި އޭނާ ވަނީ މިހާރު ސަސްޕެންޑްކުރެވިފައިކަންވެސް ބަޔާނުގައި ހާމަކޮށްފައިވެއެވެ.