އދ.ގެ މެންބަރު ގައުމުތަކުން ދައްކަންޖެހޭ ފައިސާ އަވަހަށް ނުދައްކައިފި ނަމަ ނުވަތަ އެ އިދާރާގެ މާލީ ގަވާއިދުތަކަށް އިސްލާހީ ބަދަލުތަކެއް ނުގެނެސްފި ނަމަ، އދ. މާލީ ގޮތުން އިނދަޖެހުމުގެ ބިރު އެބައޮތް ކަމަށް ސެކްރެޓަރީ ޖެނެރަލް އެންޓޯނިއޯ ގުޓަރޭޒް އިންޒާރު ދެއްވައިފި އެވެ.
މިދިޔަ ހަފުތާގައި 193 މެންބަރު ގައުމަށް ގުޓަރޭޒް ފޮނުއްވި ސިޓީއެއްގައި ވިދާޅުވީ، އދ.އަށް މިހާރު ވަނީ ފައިސާގެ ދަތިކަމާ ކުރިމަތިލާން ޖެހިފައި ކަމަށެވެ. މީގެ މައިގަނޑު ސަބަބަކީ ގައުމުތަކުން ދައްކަންޖެހޭ ފައިސާ ނުދެއްކުމާއި ބަޖެޓާ ގުޅޭ އުސޫލުތައް މުރާޖައާކުރަން ޖެހުމެވެ.
"ހުރިހާ މެންބަރު ގައުމުތަކުން ވެސް އެ ގައުމުތަކުގެ ޒިންމާތައް ފުރިހަމައަށް އަދާކޮށް، ވަގުތުން ފައިސާ ދައްކަން ޖެހޭ. އެހެން ނޫން ނަމަ، އދ. މާލީ ގޮތުން އިނދަޖެހުމުން ސަލާމަތް ކުރުމަށްޓަކައި އަޅުގަނޑުމެންގެ މާލީ ގަވާއިދުތަކަށް ބޮޑެތި ބަދަލުތަކެއް ގެންނަން ޖެހޭ،" އޭނާ ލިޔުއްވާފައިވެ އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި އދ.ގެ ތަރުޖަމާނު ފަރްހާން ހައްގު ވިދާޅުވީ، މިއީ ވަރަށް ނާޒުކު ވަގުތެއް ކަމަށެވެ. ކުރީ އަހަރުތަކާ ހިލާފަށް، އދ.ގެ ހަރަކާތްތައް ހިންގުމަށް ބޭނުންވާ ފައިސާގެ ރިޒާވް މިހާރު ހުސްވެފައިވާ ކަމަށް އޭނާ ފާހަގަކުރެއްވި އެވެ.
ގުޓަރޭޒް ވަކި ގައުމެއްގެ ނަން ވިދާޅުނުވި ނަމަވެސް، މި އިންޒާރު އައިސްފައިވަނީ އެމެރިކާގެ ރައީސް ޑޮނަލްޑް ޓްރަމްޕް ބައިނަލްއަގުވާމީ އިދާރާތަކަށް ދޭ އެހީ ކުޑަކުރައްވައި އދ.ގެ ބައެއް އޭޖެންސީތަކުން ވަކިވާނެކަން އިއުލާން ކުރައްވާފައިވާ ދަނޑިވަޅެއްގަ އެވެ. އދ.ގެ މައި ބަޖެޓުގެ ގާތްގަނޑަކަށް %22 އެމެރިކާއިން ހިއްސާކުރާއިރު، ޗައިނާއިން ހިއްސާކުރަނީ %20 އެވެ.
ގުޓަރޭޒް ވިދާޅުވި ގޮތުގައި، މިދިޔަ އަހަރު ނިމުނުއިރު، ނުދައްކާ ހުރި ފައިސާގެ އަދަދު ރެކޯޑް މިންވަރެއް ކަމަށްވާ 1.57 ބިލިއަން ޑޮލަރަށް ވަނީ އަރާފަ އެވެ.
މި އަހަރަށް 3.45 ބިލިއަން ޑޮލަރުގެ ބަޖެޓެއް ފާސްކޮށްފައިވާއިރު، މިއީ ކުރީ އަހަރަށް ވުރެ %7 ކުޑަ އަދަދެކެވެ. މިދިޔަ ބުރާސްފަތި ދުވަހާ ހަމައަށް މި އަހަރުގެ ބަޖެޓަށް ފައިސާ ދައްކާފައިވަނީ އެންމެ 36 މެންބަރު ގައުމުންނެވެ.
އެއާ އެކު، އަންނަ ޖުލައި މަސް ތެރޭގައި އދ. އިން ފައިސާ މުޅިން ހުސްވެދާނެ ކަމުގެ ބިރު އެބައޮތް ކަމަށް އޭނާ ވިދާޅުވި އެވެ.
މާލީ ގޮތުން ދިމާވެފައިވާ އެންމެ ބޮޑު އެއް މައްސަލައަކީ، ބަޖެޓުން ބާކީވާ ފައިސާ ކޮންމެ އަހަރު ވެސް މެންބަރު ގައުމުތަކަށް އަނބުރާ ދޭންޖެހޭ އުސޫލެވެ.
"އަޅުގަނޑުމެން މިވަނީ އަތުގައި ނެތް ފައިސާއެއް އަނބުރާ ދޭންޖެހޭ ފަދަ އޮޅުންބޮޅުން ބޮޑު ދާއިރާއެއްގެ ތެރޭގައި ތާށިވެފައި،" ގުޓަރޭޒް ވިދާޅުވިއެވެ.
އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ވަނީ މިކަމާ މެދު ކަންބޮޑުވުން ފާޅުކޮށްފަ އެވެ.
ހިއުމަން ރައިޓްސް ވޮޗުގެ ލުއިސް ޗާބޮނޯ، ޓްރަމްޕް އެކުލަވާލައްވާފައިވާ 'ބޯޑް އޮފް ޕީސް'އަށް ފާޑުވިދާޅުވަމުން ވިދާޅުވީ، މިއީ ވަކި ބަޔަކަށް ފައިދާވާ ގޮތަށް އޮތް ކަމެއް ކަމަށެވެ. އަދި ބައިނަލްއަގުވާމީ އިންސާނީ ހައްގުތަކާއި ގާނޫނުތައް ހިމާޔަތްކުރުމަށް އުފައްދާފައިވާ އދ. ފަދަ މުއައްސަސާތައް ރައްކާތެރިކުރުމަށް ގައުމުތަކުން ގުޅިގެން މަސައްކަތް ކުރުމަށް އޭނާ ގޮވާލެއްވި އެވެ.