އީރާނާ ދެމެދު އުފެދިފައިވާ ނުތަނަވަސްކަން އިތުރުވަމުންދާތީ، މެދުއިރުމަތީގެ ބައެއް ގައުމުތަކުގައި ތިބި އެމެރިކާ ސަރުކާރުގެ ޒަރޫރީ ނޫން މަސައްކަތްތަކުގައި އުޅޭ މުވައްޒަފުންނާއި އެ މީހުންގެ އާއިލާތައް އެ ގައުމުތަކުން ފޭބުމަށް އެމެރިކާ އިން މިއަދު އަންގައިފި އެވެ. މީގެ އިތުރުން އެ ސަރަހައްދުގެ ބައެއް ޑިޕްލޮމެޓިކް މިޝަންތައް ވެސް މިހާރު ވަނީ ބަންދުކޮށްފަ އެވެ.
އެމެރިކާ އާއި އިޒްރޭލު ހިމެނޭހެން ސަރަހައްދީ ހަމަނުޖެހުންތައް ފުޅާވަމުންދާ މި ދަނޑިވަޅުގައި، މި އެންގުން އަމާޒުކޮށްފައިވަނީ ގަތަރު، ކުވައިތު، ބަހްރޭން، އިރާގު އަދި އުރުދުންގައި ތިބި މުވައްޒަފުންނަށެވެ.
މި ސަރަހައްދުގައި ހުރި އެމެރިކާގެ ޑިޕްލޮމެޓިކް މަރުކަޒުތަކުގެ ސަލާމަތީ ފިޔަވަޅުތައް ވަނީ ވަރުގަދަކޮށްފަ އެވެ. އަދި އަސްކަރީ މަރުކަޒުތަކަށް ކުރާ ޒަރޫރީ ނޫން ދަތުރުތައް ވެސް ވަނީ މަދުކޮށްފަ އެވެ.
އީރާނުން އިއްޔެ ދިން ޑްރޯން ހަމަލާއަކާ ގުޅިގެން ސައޫދީ އަރަބިއްޔާގައި ހުންނަ އެމެރިކާގެ މިޝަން ވަނީ ބަންދުކޮށްފަ އެވެ. އަދި ޖިއްދާ، ރިޔާދު އަދި ދަހްރާންގައި ތިބި އެމެރިކާ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން ތިބި ތަނުން ނުނިކުތުމަށް ވަނީ އިރުޝާދު ދީފަ އެވެ.
ކުވައިތުގައި ހުންނަ އެމެރިކާ އެމްބަސީން ބުނީ ވަކި ގޮތެއް އަންގަންދެން އެމްބަސީ ބަންދުވާނެ ކަމަށާއި ކޮންސިއުލާ ހިދުމަތްތަކަށް ދީފައިވާ އާންމު އަދި ކުއްލި ހުރިހާ އެޕޮއިންޓްމަންޓްތަކެއް ކެންސަލް ކުރެވިފައިވާ ކަމަށެވެ.
އިޒްރޭލުގައި ހުންނަ އެމެރިކާ އެމްބަސީން ބުނެފައިވަނީ، އެ ގައުމުން ބޭރުވާން ބޭނުންވާ އެމެރިކާ ރައްޔިތުންނަށް އެހީތެރިކަން ފޯރުކޮށްދެވޭނެ ފަދަ ހާލަތެއްގައި އެމްބަސީ ނެތް ކަމަށެވެ. އަދި އެފަދަ ފަރާތްތަކުން ސަލާމަތީ ކަންކަން އަމިއްލައަށް ރޭވުމަށް ވަނީ އިލްތިމާސްކޮށްފަ އެވެ.