ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލުކުރާނެ މެންބަރަކު ހޮވުމަށް ހުޅުވާލައި، އެ މަގާމަށް ވީހާވެސް ގިނަ އަންހެން ބޭފުޅުން ކުރިމަތިލުމަށް އެ ކުންފުނިން އެދިއްޖެއެވެ. މިއަދު ހުޅުވާލި މި ފުރުސަތަކީ 2026 ވަނަ އަހަރާއި 2027 ވަނަ އަހަރުގެ ދައުރަށް ބޯޑު ޑިރެކްޓަރަކު އިންތިހާބު ކުރުމަށް ހުޅުވާލި ފުރުސަތެކެވެ.
އެސްޓީއޯ އިން ބުނީ ކެޕިޓަލް މާކެޓް ޑިވަލޮޕްމަންޓް އޮތޯރިޓީގެ ކޯޕަރޭޓް ގަވަނަންސް ކޯޑުގައި ބާރުއަޅާ ފަދައިން، ކުންފުނީގެ ބޯޑަށް އަންހެން ބޭފުޅުން ކުރިމަތިލުމަކީ އެ ކުންފުނިން ވަރަށް ބޮޑަށް ބާރުއަޅާ ކަމެއް ކަމަށެވެ. އަދި އަންހެން ބޭފުޅުން މިކަމަށް ޝައުގުވެރިކަން ފާޅުކޮށް އިންތިހާބުގައި ވާދަކުރުމަކީ މިންތީގެ ހަމަހަމަކަން ގާއިމްކުރުމަށް އެ ކުންފުނިން ކުރަމުން ގެންދާ މަސައްކަތަށް ލިބޭނެ އިތުރު ހިތްވަރެއް ކަމަށް ވެސް އެ ކުންފުނިން ފާހަގަކުރެއެވެ.
ޑިރެކްޓަރުކަމަށް ކުރިމަތިލާ ފަރާތްތަކުގެ ޝަރުތުތަކުގެ ތެރޭގައި އުމުރުން 30 އަހަރު ފުރިފައިވާ ދިވެއްސަކަށް ވުން ހިމެނެއެވެ. މީގެ އިތުރުން ވިޔަފާރިއާއި ހިންގުމުގެ ދާއިރާއިން އެކަށީގެންވާ ތައުލީމާއި ތަޖުރިބާ ލިބިފައިވާ ފަރާތްތަކަށް ވުމަކީ، ބޯޑަށް މެންބަރުން އައްޔަންކުރުމުގައި ބާރުއަޅާ ކަމެއް ކަމަށް އެސްޓީއޯ އިން ބުނެއެވެ. އެ ކުންފުނީގެ ބޯޑު އެކުލެވިގެންވަނީ އާންމު ހިއްސާދާރުންގެ ފަރާތުން އިންތިހާބުކުރާ އެއް ޑިރެކްޓަރަކާއި ސަރުކާރު ތަމްސީލުކުރާ ހަ ޑިރެކްޓަރުންގެ މައްޗަށެވެ.
މި މަގާމަށް ޝައުގުވެރިވާ ފަރާތްތަކުން ފޯމު ހުށަހެޅުމުގެ ސުންގަޑިއަކީ އަންނަ ފެބްރުއަރީ މަހުގެ 25 ވަނަ ދުވަހުގެ 15:00 ގެ ކުރިންނެވެ. ފޯމު ހުށަހަޅަން ޖެހޭނީ އެ ކުންފުނީގެ ސެކްރެޓޭރިއޭޓަށް އެޑްރެސްކޮށް [email protected] އީމެއިލް އަށެވެ.