ދިވެހި ރައްޔިތުން އެމަނިކުފާނާ ހަވާލު ކުރެއްވި ޒިންމާ އަކީ ވަރަށް ބޮޑު އަމާނާތެއްގެ ގޮތުގައި ދެކެވަޑައިގަންނަވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރޭ ޕީއެންސީން ބޭއްވި ހަރުގެ ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ އެމަނިކުފާނު ވެރިކަން ކުރައްވަނީ މާތް ރަސްކަލާނގެއަށްޓަކައި ކަމަށާއި، މިއީ އެމަނިކުފާނަށް އެކަލާނގެ ރައްޔިތުން މެދުވެރިކުރައްވައި ހަވާލު ކުރެއްވި އަމާނާތެއް ކަމަށެވެ.
”އެކަލާނގެ އަންގަވާފައިވާ ގޮތަށް، މާތްވެގެންވާ އިސްލާމްދީނުގެ ވަރުގަދަ އަސާސްތައް މަތީގައި، އިސްލާމީ، އިސްލާމް ދީނަށް ނަސްރު ދޭ، އަޅުގަނޑުމެން މުސްލިމުންގެ ކިބައިގައި ހުންނާން ޖެހޭ ރީތި ސިފަތައް މިތާ އަށަގަނެފައިވާ، އުހުއްވަތްތެރި، އިސްލާމްވަންތަ، އެކުވެރި، މުޖްތަމައުއެއް ގާއިމު ކުރެވިގެންދާ، އިސްލާމީ ގައުމެއްގައި ވެރިކަން ކުރުމުގެ އަމާނާތް.“ ރައީީީސް ވިދާޅުވިއެވެ.
ރައީީސްގެ ވާހަކަފުޅުގައި، ފާއިތުވި ނުވަ މަސް ދުވަހުގެ ތެރޭގައި، އިސްލާމްދީނަށް ނަސްރު ދިނުމަށްޓަކައި، މީގެ ކުރީ ސަރުކާރުތަކުން ނުކުރާ އެތައް ކަމެއް އެމަނިކުފާނުގެ ސަރުކާރަށް ކުރެވިފައިވާކަން، ރައްޔިތުން ފާހަގަކުރަމުންދާ ކަމަށް ވިދާޅުވިއެވެ.
ބަވަނަވެފައިވާ މި ދުނިޔޭގައި އެތައް ނުބައި އޮއިވަރެއް ފެތުރެމުން އަންނައިރު، އެކަންކަމުން ގައުމު ސަލާމަތްކޮށް، ކާބަފައިން ގެނެސްދިން މި ގައުމު އަންނާން އޮތް ޖީލުތަކަށް ވާރުތަ ކޮށްދިނުމަށް މަސައްކަތް ކުރުމަކީ، ރައީީސް ވިދާޅުވި ގޮތުގައި، އަޅުގަނޑުމެންގެ ވިސްނުމަށް ވާން ޖެހެއެވެ.