އިރާގާއި ސީރިއާގައި ހަރަކާތްތެރިވަމުން އަންނަ ހަނގުރާމަވެރި ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) ޖަމާއަތަށް ނިސްބަތްވާ ބަޔަކު އޮސްޓްރޭލިއާއިން ހައްޔަރުކުރުމާއި ގުޅިގެން އެގައުމުގެ ރައްޔިތުންގެ ހިތްތަކުގައި ބިރުވެރިކަން އުފެދެން ފަށައިފި އެވެ.
އޮސްޓްރޭލިއާގެ ރައްޔިތުން މެރުމަށް ރާވަމުންދާކަމުގެ މައުލޫމާތު ލިބުމުން އެގައުމުގެ ފުލުހުން ކުރިއަށް ގެންދިޔަ އޮޕަރޭޝަނެއްގައި 15 މީހަކު ވަނީ ހައްޔަރުކޮށްފައެވެ. މިމަހުގެ 18 ވަނަ ދުވަހު ކުރިއަށް ގެންދިޔަ އޮޕަރޭޝަނުގައި ބަރު ހަތުިޔާރު އެޅި 800 ފުލުހުން ބައިވެރިވިއެވެ.
އެ އޮޕަރޭޝަން ކުރިއަށް ގެންދިޔައީ އެގައުމުގެ އެކި ހިސާބުތަކުގައި މީހުން މެރުމަށް އޮސްޓްރޭލިއަން އައިއެސް އިން ރާވާފައިވާ ކަމުގެ މައުލޫމާތު ލިބުމާއި ގުޅިގެން ކަން އޮސްޓްރޭލިއާ ފުލުހުން ވެސް މިހާރު ވަނީ ކަށަވަރުކޮށްދީފައެވެ.
ފުލުހުން ކުރިއަށް ގެންދިޔަ އޮޕްރޭޝަނާ ގުޅޭ ގޮތުން އެގައުމުގެ ބޮޑު ވަޒިރު ޓޯނީ އެބޮޓް ވިދާޅުވެފައިވަނީ އޮޕަރޭޝަން ކުރިއަށް ގެންގޮސްފައިވަނީ، އޮސްޓްރޭލިއާގެ އެކި ހިސާބުތަކުގައި މީހުން މެރުމަށް އެ ޖަމާއަތުގެ ހަނގުރާމަވެރިން އަންގާފައިވާ ކަމަގެ މައުލޫމާތު ލިބިގެން ކަމަށެވެ.
މި އޮޕަރޭޝަނުގައި ހައްޔަރު ކުރި މީހުންގެ އިތުރު ތަފްސީލެއް ރިޕޯޓު ކޮށްފައި ނެތް ކަމުގައި ވީ ނަމަވެސް އެކަކު ހައްޔަރު ކުރީ ހަތިޔާރު ގެންގުޅުމުގެ ލައިސެންސު ނެތި ހަތިޔާރު ގެންގުޅުނު ކަމުގެ ތުހުމަތުގައި ކަމަށް ވެއެވެ.
އައިއެސްއަށް ނިސްބަތްވާ ބަޔަކު އޮސްޓްރޭލިއާއިން ހައްޔަރުކުރުމުން އެގައުމުގެ ރައްޔިތުންގެ ހިތްތަކުގައި ބިރުވެރިކަން އުފެދިފައިވާއިރު އޮސްޓްރޭލިއާގެ ބޮޑެތި ސިޓީތަކުގައި ސަލާމަތީ ފިޔަވަޅުތައް ވަނީ ވަރަށް ބޮޑަށް ވަރުގަދަކޮށްފައެވެ.
އޮސްޓްރޭލިއާއިން މިފަދަ އޮޕަރޭޝަނެއް ކުރިއަށް ގެންގޮސްފައިވާއިރު ފާއިިތުވި ހަފްތާތަކުގެ ތެރޭގައި އައިިއެސް އިން ވަނީ އެމެރިކާގެ ދެ ނޫސްވެރިއަކާއި ސީރިއާގައި އެހީ ދިނުމަށް ހަރަކާތްތެރިވަމުން ދިޔަ އިނގިރޭސި ވިލާތުގެ ރައްޔިތެއްގެ ބޯ ބުރިކޮށްލާ ތަން ދައްކުވައިދޭ ވީޑިއޯ އެއްވެސް އާންމު ކޮށްފައެވެ.