ހުޅުމާލެ ހޮސްޕިޓަލުގެ އިމަރޖެންސީ ރޫމް ބޮޑުކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ. މި މަސައްކަތުގެ އެއްބަސްވުމުގައި ސޮއިކުރެއްވީ މާލެ ގުރޫފް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމާއި އާރްޑީސީގެ މެނޭޖިން ޑިރެކްޓަރު އަލީ ޒުހައިރެވެ.މި މަޝްރޫޢުގެ ދަށުން، ހުޅުމާލެ ހޮސްޕިޓަލުގެ އިމަރޖެންސީ ރޫމް މިހާރު ހުރި 7 އެނދުން 14 އެނދަށް އިތުރުކުރެވޭނެއެވެ. މީގެ އިތުރުން، ޒަމާނީ ވަސީލަތްތަކާއެކު ކްރިޓިކަލް ހާލަތްތަކަށް ޚާއްސަކުރެވޭ ވަސީލަތްތައް ޤާއިމްކުރެވޭނެއެވެ. މި މަސައްކަތް 2 މަސްދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.މާލެ ގުރޫފް އޮފް ހޮސްޕިޓަލްސްއިން މަޢުލޫމާތު ދެއްވިގޮތުގައި، ހުޅުމާލެ ހޮސްޕިޓަލަކީ މިހާރު ޓާޝިއަރީ ފެންވަރަށް ތަރައްޤީކުރެވެމުންދާ ހޮސްޕިޓަލެކެވެ. މި ގޮތުން، ހޮސްޕިޓަލުގެ ބެޑް ކެޕޭސިޓީ އިތުރުކުރުމަށް ވެސް ވަނީ ރޭވިފައެވެ. އަންނަ އަހަރުގެ ކުރީކޮޅު 28 އެނދު އިތުރުކުރެވޭނެ ކަމަށް ބެލެވެއެވެ.މީގެ އިތުރުން، ހުޅުމާލެ ހޮސްޕިޓަލުގައި މިހާރު ވަނީ އޮޕަރޭޝަން ތިއޭޓަރ ކޮމްޕްލެކްސް، އައިސީޔޫ، އަދި ނިއޮނޭޓަލް އައިސީޔޫ ޤާއިމްކުރެވިފައެވެ. މި ހުރިހާ ތަރައްޤީއަކާއެކު، ހުޅުމާލޭގެ އާބާދީއަށް އަދި ވަށައިގެންވާ ރަށްރަށުގެ ރައްޔިތުންނަށް ފެންވަރު ރަނގަޅު ޞިއްޙީ ޚިދުމަތްތަކެއް ފޯރުކޮށްދިނުމަށް ހުޅުމާލެ ހޮސްޕިޓަލުން މަސައްކަތްކުރަމުންދާ ކަމަށް މާލެ ގުރޫފް އޮފް ހޮސްޕިޓަލްސްއިން ވިދާޅުވިއެވެ.