ރަކީދޫގައި އިޔާދަކުރަނިވި ހަކަތައިގެ މަޝްރޫއެއް 2016 ގައި ފެށި އެވެ. އެކަމަކު ފަހުން އެ މަޝްރޫއު ވީރާނާވެގެން ދިޔައީ އެވެ. ނަމަވެސް ސްޓެލްކޯއިން ވަނީ މިދިޔަ އަހަރު އާ މަޝްރޫއެއް ފަށައި މުޅިން އާ މޮޑެލްއެއް ގާއިމްކޮށްފަ އެވެ.
އިޔާދަކުރަނިވި ހަކަތައިގެ ވާހަކަ ނުދައްކާ ދުވަސްވަރެއް ހަނދާނެއް ނުވެ އެވެ. ރާއްޖެ އަންނަ ކޮންމެ ފަސް އަހަރުގެ ވެރިކަމެއް ނިމިގެންދާއިރު އެތައް ބިލިއަން ރުފިޔާގެ ސޯލާ ނުވަތަ އިރުގެ ހަކަތައިން ކަރަންޓު އުފައްދާ މަޝްރޫއުތައް ހިންގަ އެވެ. އެކަމަކު މީގެ ނަތީޖާއެއް ދުވަހު ވެސް ނުފެނެ އެވެ. 
އެކަމަކު ސްޓެލްކޯ އިން ވ. ރަކީދޫގައި އިޔާދަކުރަނިވި ހަކަތައިން ކަރަންޓު އުފައްދަން ފެށި މަސައްކަތުގެ ނަތީޖާ މިވަނީ ފެންނަން ފަށާފަ އެވެ. މިހާރު ރަކީދޫ އަށް ކަރަންޓު ދޭން ބޭނުން ކުރާ މައިގަނޑު ވަސީލަތަކަށް މިވަނީ ސްޓެލްކޯ ހައިބްރިޑް ނިޒާމުވެފަ އެވެ. މި ނިޒާމާއެކު ރަކީދޫގެ އިންޖީނުތައް މިހާރު ހިންގަން ޖެހެނީ ނުވަތަ ރޯކުރަނީ ދެ ގަޑިއިރަށެވެ. 
ރަކީދޫގައި ސޯލާ ހައިބްރިޑް މަޝްރޫއު އިފްތިތާހު ކުރީ 2016 ވަނަ އަހަރު އެވެ. އެ ފަހަރު އޭޑީބީގެ މަޝްރޫއެއްގެ ދަށުން ރަކީދޫގައި ހައިބްރިޑް ނިޒާމެއް ގާއިމްކޮށް 27 ކިލޯވޮޓް ޕީކުގެ ސޯލާ ޕީވީ ޕެނަލް ހަރުކުރި އެވެ. މި ރަށުގައި 60 ކިލޯވޮޓް އަވާގެ ލިތިއަމް-އަޔޮން ބެޓެރި ބެހެއްޓި އެވެ. އޭރު އަންދާޒާ ކުރީ ރޭގަނޑަށް ބޭނުންވާ ކަރަންޓް ފޯރުކޮށްދިނުމަށާ، ބެޓެރިތައް ޗާޖްކުރުމަށް ޑީސަލް ބެކަޕެއް ގާއިމް ކުރުމަށެވެ. ނަމަވެސް އެ ދުވަހުން ފެށިގެން 8 އަހަރު ވެގެން ދިޔައިރުވެސް މި ރަށަށް މީގެ ބޭނުމެއް ނުކުރެވުނެވެ. މިހެން ގޮސް އެތަނުގައި ހުރި ސާމާނު ވީރާވެ "ގެއްލިގެން" ދިޔައީ އެވެ. 
ސްޓެލްކޯގެ އެމްޑީ ހުސެއިން ފަހުމީ ވިދާޅުވީ އަށް އަހަރުކުރިން އޭޑީބީގެ ފަންޑަކުން ރަކީދޫގައި މަޝްރޫއެއް ހިންގިނަމަވެސް މި ސަރުކާރުން އައިސް ބެލިއިރު މީގެ އެއްވެސް ނިޒާމެއް ނެތެވެ. އެހެންވެ މި މަޝްރޫއަކީ މުޅިން އަލަށް ހިންގި މަޝްރޫއެއްކަން އޭނާ ފާހަގަ ކުރެއްވި އެވެ. "މިއީ އަޅުގަނޑުމެން މުޅި އަލަށް ހިންގި މަޝްރޫއެއް. އެހެންވެ މީޑިއާތަކަށް ދައުވަތު މިދެނީ މިތަނަށް ގޮސް ބަލަން. އެތަނުގައި ބެޓްރިއެއްވެސް ނެތް،" ފަހުމީ ވިދާޅުވި އެވެ.ފަހުމީ ވިދާޅުވި ގޮތުގައި ރަކީދޫގައި މިކަން ކާމިޔާބު ވެގެން ދިއުން ވެގެންދާނީ ސްޓެލްކޯއަށް މުޅިއާ ބިޒްނަސް މޮޑެލްއެއް ކްރިއޭޓް ކުރަން ލިބުނު ފުރުސަތަކަށެވެ. އަދި މިހާރު އެ ރަށަށް ކަރަންޓު ދޭން ސޯލާ އާއި ބެޓެރިން 22 ގަޑިއިރު ބޭނުން ކުރެ އެވެ. "މިހާރު ސްޓެލްކޯއަށް މި މޮޑެލް ދެއްކޭނެ. މިއީ ރިސޯޓްތަކުގައި ހިންގަން ބޭނުންވިޔަސް ކަމިޔާބު ކަމާއެކު ސްޓެލްކޯއަށް ބޭނުން ކުރެވޭނެ ކަމަކަށްވާނެ،" ފަހުމީ ވިދާޅުވި އެވެ. އެމްޑީ ފަހުމީ ވިދާޅުވީ މި ކާމިޔާބީން ވެސް ރައީސް ޑރ. މުހައްމަދު މުއިއްޒުގެ  އިއާދަކުރަނިވި ހަކަތައިގެ ބޭނުންކުރުން 33 ޕަސެންޓަށް އިތުރުކުރުމުގެ ލަނޑުދަނޑިއާ ހަމައަށް ވާސިލްވެއްޖެ ކަމަށާއި އެކަމަށް ޓަކައި ރައީސް އަށް ޝުކުރު އަދާކުރައްވާ ކަމަށެވެ.
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ