ޖުމްހޫރީ ޕާޓީގެ ލީޑަރު ގާސިމް އިބްރާހިމާއި، ޕީޕީއެމްގެ ދިއްގަރު ދާއިރާގެ މެންބަރު ފާރިސް މައުމޫން ހިތްވަރާއި، ކުރައްވަމުން ގެންދަވާ މަސައްކަތަށް ސާބަސް ރައްދުކުރައްވާކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އުމަރު ނަސީރު މިހެން ވިދާޅުވީ އެމަނިކްފާނު މިއަދު ކުރައްވާފައިވާ ޓްވީޓެއްގައެވެ.
އުމަރު ވިދާޅުވީ ގާސިމް އިބްރާހިމާއި، ފާރިސް މައުމޫން އަދި މަޖިލީހުގެ ރައީސްގެ އިތުބާރު ނެތްކަމުގެ ވޯޓް ކާމިޔާބުކުރުމަށް މަސައްކަތް ކުރައްވާ އެންމެހާ ބޭފުޅުންގެ ހިތްވަރަށް ސާބަސްދޭކަމަށެވެ.
އަދި މަސީހަށް ނޫނެކޭ ބުނުމަށް މަޖިލީހުގެ ހުރިހާ މެންބަރުނަށް ގޮވާލައްވާކަމަށް އުމަރު ނަސީރު ވިދާޅުވިއެވެ.
26 މެންބަރުންގެ ސޮޔާއިއެކު މަސީހުގެ އިތުބާރު ނެތްކަމަށް ހުށައަޅާފައިވާ މައްސަލަ ހޯމަ ދުވަހުގެ ޖަލްސާއަށް ވަނީ އެޖެންޑާކޮށްފައެވެ.
މަސީހު މަގާމުން ވަކިކުރެވޭނެކަމަށް އެ މަސައްކަތުގައި އިސްކޮށް އުޅުއްވާ ބޭފުޅުން ގެންދަވަނީ ވިދާޅުވަމުންނެވެ. ނަމަވެސް ސަރުކާރަށް ތާއީދުކުރައްވާ މެންބަރުން ވަނީ މަސީހު މަގާމުން ދުރުނުކުރެވޭނެކަމަށް ވިދާޅުވަމުންނެވެ.