ދުވަހު ނޫސް “ހަވީރު” ގެ އިދާރާގައި ރޭ މެންދަމު ބަޔަކު ރޯކޮށްލައިފި އެވެ.
އަލިފާންގަނޑު ފެތުރުމުގެ ކުރިން އަލިފާންގަނޑު ނިއްވާލާފައިވާއިރު ރޯކޮށްލާފައިވަނީ އެތާނގެ ރިސެޕްޝަން އޭރިއާގަ އެވެ. ރިސެޕްޝަން އޭރިއާއަށް ބޮޑެތި ގެއްލުންތަކެއް ލިބިފައި ވެ އެވެ.
އެމްއެންޑީއެފް ފަޔާ އެންޑް ރެސްކިއު ޓީމު އެ ސަރަހައްދަށް ދިއުމުގެ ކުރިން އަލިފާންގަނޑު ނިއްވާލާފައިވަނީ ފުލުހުންނެވެ. ފުލުހުން އަލިފާން ނިއްވާލަން ބޭނުންކޮށްފައިވަނީ ހަވީރު އިދާރާގައި ހުރި އަލިފާން ނިއްވަން ބޭނުންކުރާ އާލާތްތައް ބޭނުންކޮށްގެންނެވެ.
އަލިފާން ރޯކޮށްލި މީހުންގެ ތެރޭގައި ހިމެނޭ ކަމަށް ބެލެވޭ މީހަކު ފިލަން މަސައްކަތްކުރި އިރު އެ ސަރަހައްދަށް ދަބަހެއް އެއްލާލާފައި އޮތެވެ. އެ ދަބަހުގައި ފަސް ލީޓަރުގެ ބޮޑު ފުޅިއެއް އޮތް ނަމަވެސް އެ ފުޅީގައި ހުރީ ކޮން އެއްޗެއްކަން ސާފެއް ނުވެ އެވެ.
މި ހާދިސާއާއި ބެހޭގޮތުން ރަސްމީ އެއްވެސް ފަރާތެއްގެ ބަހެއް އަދި ލިބިފައެއް ނުވެ އެވެ.