ޗައިނާ އާއި ރަޝިއާ ގުޅިގެން ޖަޕާން ކަނޑުގައި ކަނޑުގެ އަސްކަރީ ތަމްރީނުތަކެއް ފަށައިފި އެވެ.
އެ ތަމްރީންތަކުގެ ބޭނުމަކީ އެމެރިކާ އިސްވެ އޮވެ، ބައިނަލްއަގްވާމީ ނިޒާމެއްގެ ގޮތުގައި ގެންގުޅޭ އުސޫލާ ދެކޮޅަށް ގުޅިގެން މަސައްކަތް ކުރުމަށް ގާއިމު ކުރާ ނިޒާމެކެވެ.
ފަހަކަށް އައިސް ޗައިނާ އާއި ރަޝިއާގެ ގުޅުން އަންނަނީ ބަދަހިކުރަމުންނެވެ. ރަޝިޔާއިން ޔޫކްރެއިންއަށް އަރައިގަތުމާ ގުޅިގެން ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ރަޝިޔާއަށް އިގްތިސާދީ އެހީތެރިކަން ފޯރުކޮށްދޭ އެއް ގައުމަކީ ޗައިނާ އެވެ. 
ޗައިނާގެ ގައުމީ ދިފާއީ ވުޒާރާއިން އިއްޔެ ނެރުނު ބަޔާނެއްގައި ބުނެފައިވަނީ ރަޝިއާގެ ބަނދަރު، ވްލަޑިވޮސްޓޮކް ކައިރީގައި އޮންނަ ކަނޑުގެ ސަރަހައްދުގައި ފެށި ޖޮއިންޓް ސީ-2025ގެ ތަމްރީނުތައް ތިން ދުވަހަށް ކުރިއަށް ދާނެ ކަމަށެވެ.
އޭގެ ތެރޭގައި ސަބްމެރިން ރެސްކިއު، ޖޮއިންޓް އެންޓި ސަބްމެރިން މަސައްކަތް، އެއާ ޑިފެންސް، އެންޓި މިސައިލް އޮޕަރޭޝަންސް އަދި މެރިޓައިމް ކޮމްބެޓް ފަދަ އޮޕަރޭޝަންތައް ކުރިއަށް ގެންދިއުމަށް ވަނީ ހަމަޖެހިފަ އެވެ.
އެ ތަމްރީނުތަކުގައި ޗައިނާގެ ހަތަރު އުޅަނދަކާއި ރަޝިޔާގެ އުޅަނދުތައް ބައިވެރިވާ ކަމަށް މިނިސްޓްރީން ބުނެ އެވެ.
އެ ތަމްރީނުތަކަށް ފަހު، ދެ ގައުމުގެ ކަނޑުގެ ސަރަހައްދުގައި ކަނޑުގެ ސިފައިންގެ ފޯރިމެރުންތައް ކުރިއަށް ގެންދިއުމަށް ވަނީ ހަމަޖެހިފަ އެވެ.
ޗައިނާ އާއި ރަޝިއާއިން ކޮންމެ އަހަރަކު ވެސް އަސްކަރީ ތަމްރީނުތައް ބާއްވަމުން އަންނަތާ އެތައް އަހަރެއް ވަނީ ވެފަ އެވެ. އެ ތަމްރީންތައް ފުރަތަމަ ފެށީ 2012 ވަނަ އަހަރު ޖޮއިންޓް ސީ ޑްރިލްތަކުންނެވެ.
މިދިޔަ އަހަރު އެ ތަމްރީންތައް ކުރިއަށް ގެންގޮސްފައިވަނީ ޗައިނާގެ ދެކުނު އައްސޭރިފަށުގަ އެވެ.
ޖަޕާން ކަނޑުގައި މިއަހަރު ކުރިއަށް ގެންދާ ޑްރިލްތަކުގެ ސަބަބުން ޖަޕާނުގެ ދިފާއީ ވުޒާރާ އިން ވަނީ ޗައިނާ އިން ރަޝިޔާއާ އެކު އަސްކަރީ އެއްބާރުލުން އިތުރުވުމަކީ ސަލާމަތީ ގޮތުން ބޮޑެތި ނުރައްކާތަކެއް ކުރިމަތިވާ ކަމެއް ކަމަށް ބުނެ އިންޒާރުދީފަ އެވެ.
"މި ތަމްރީންތަކަކީ ދިފާއީ ސިފައެއްގައި ހިންގާ ތަމްރީންތަކެއް. އެއީ އެހެން ގައުމުތަކާ ދެކޮޅަށް ހިންގާ އެކްސަސައިޒެއް ނޫން،" ރަޝިޔާ އިން ބުންޏެވެ.
ހުކުރު ދުވަހު ޗައިނާގެ ދިފާއީ ވުޒާރާއިން ބުނީ މި އަހަރުގެ ތަމްރީނުތަކަކީ ދެ ގައުމުގެ ދެމެދުގައި އޮތް ފުޅާ ދާއިރާއެެއްގައި ސްޓްރެޓެޖިކް ޕާޓްނާޝިޕް އިތުރަށް ހަރުދަނާ ކުރުމުގެ ގޮތުން ކުރިއަށް ގެންދާ ތަމްރީނުތަކެއް ކަމަށެވެ.
ތިން އަހަރަށް ވުރެ ދިގުލައިގެން ގޮސްފައިވާ ރަޝިއާ-ޔޫކްެރެއިން ހަނގުރާމަ ޗައިނާއިން ކުށްވެރިކޮށް، ސިފައިން އަނބުރާ ގެންދިއުމަށް ގޮވާލާފައެއް ވެސް ނުވެ އެވެ. އަދި އެމެރިކާ ހިމެނޭ ގޮތަށް ޔޫކްރެއިންގެ ގިނަ ބައިވެރިން ގަބޫލުކުރާ ގޮތުގައި ބެއިޖިން އިން މޮސްކޯއަށް އެހީތެރިކަން ފޯރުކޮށްދީފައިވެ އެވެ.
ޔޫރަޕްގެ ލީޑަރުން ވަނީ ޗައިނާގެ ނުފޫޒުގެ ބޭނުންކޮށް، ރަޝިޔާއަށް ހަނގުރާމަ ނިމުމަކަށް ގެނައުމަށް ބާރުއަޅައިފަ އެވެ. ނަމަވެސް ބެއިޖިންއިން އެގޮތަށް އަމަލުކުރާނެ ކަމުގެ އިޝާރާތެއް ލިބިފައެއް ނުވެ އެވެ.
ޗައިނާ އިން ބުނަނީ އެ މީހުންނަކީ ވަކި ފަރާތަކަށް ނުޖެހޭ ގައުމެއް ކަމަށެވެ. އަދި ހަމަނުޖެހުންތައް ހުއްޓާލުމަށް ގޮވާލާ އިރު، ޗައިނާ އިން ތުހުމަތު ކުރަނީ ޔޫކްރެއިންއަށް ހަތިޔާރު ފޯރުކޮށްދީގެން ހަމަނުޖެހުންތައް ދިގުދެމިގެންދިއުމުގައި ހުޅަނގުގެ ދައުރެއް އޮތް ކަމަށެވެ.