ބަޤަރާ ސޫރަތުގެ މާތްކަމާއި މަތިވެރިކަމާއި ބަޤަރާ ސޫރަތް ކިޔެވުމުން ލިބޭނެ ފައިދާތަކާއިބެހޭ ގޮތުން ރަސޫލް ޞައްލަﷲ ޢަލައިހި-ވަސައްލަމަ ވަނީ މީސްތަކުންނަށް ބަޔާންކޮށް ދެއްވަވައިފައެވެ. ސިޙުރާއި އެސްފީނާއިން ސަލާމަތްވެ ހުރުމަށްވެސް ބަޤަރާ ސޫރަތުން ރައްކައުތެރިކަން ލިބެއެވެ.  
ތިޜިގައިވާ ލިޔުމުގައި އެވަނީ ބަޤަރާ ސޫރަތާއިމެދު ޝައިޚް ޢިމްރާން މުޙައްމަދު ޢަލީ ބަޔާންކުރައްވާފައިވާ ބައެއްކަންކަމެވެ.  
ބަޤަރާ ސޫރަތުގެ މާތްކަމާ އަދި ބަޤަރާ ސޫރަތުގެ ބައެއް އާޔަތްތަކުގެ މާތްކަމާ ބެހޭގޮތުންވެސް ޞައްޙަ ޙަދީޘްތަކެއް ވާރިދުވެފައި ވެއެވެ. އޭގެ ތެރެއިން އެއް ޙަދީޘްގައި ވެއެވެ. 
ނަބިއްޔާ صلى الله عليه وسلم ޙަދީޘްކުރެއްވިއެވެ.
«اقْرَءُوا سُورَةَ الْبَقَرَةِ، فَإِنَّ أَخْذَهَا بَرَكَةٌ، وَتَرْكَهَا حَسْرَةٌ، وَلَا تَسْتَطِيعُهَا الْبَطَلَةُ» [رواه مسلم 252 - (804)] 
މާނައީ: "ތިޔަބައިމީހުން ބަޤަރާ ސޫރަތް ކިޔަވާށެވެ. ފަހެ، ހަމަކަށަވަރުން އެސޫރަތް ކިޔެވުމަކީ ބަރަކާތެކެވެ. އަދި ނުކިޔަވާ ދޫކޮށްލުމަކީ ގެއްލުމެކެވެ. އަދި ސިޙުރުވެރިންނަށް އެސޫރަތް ކިޔަވާ މީހެއްގެ މައްޗަށް ގަދަ ނުވެވޭހުއްޓެވެ." 
ބަޤަރާ ސޫރަތް ކިޔުމަށް ވާރިދުވެފައި ޙަދީޘްތަކުގައި އެ ސޫރަތް ވަކި ޢަދަދަކަށް ކިޔުމަށް ނުވަތަ ކޮންމެ ދުވަހަކު ކިޔުމަށް ޞައްޙަކޮށް ވާރިދުވެފައި ނުވެއެވެ. އެހެންކަމުން އެމީހަކަށް ފަސޭޙަ މިންވަރަކަށް އެކަން ކުރުމުން ފުދޭނެއެވެ. 
މި ޙަދީޘްގައި ވާރިދުވެފައިވަނީ ބަޤަރާ ސޫރަތް ކިޔެވުމުގެ މާތްކަމެވެ. އެހެންކަމުން އެކަމުގައި އެންމެ ފުރިހަމަ ގޮތަކީ އެ ސޫރަތް ތިލާވަތުކޮށް ކިޔެވުމެވެ. އަދި ބަޤަރާ ސޫރަތް ކަނުލާ އަޑުއެހުމަކީވެސް އެކަމުން ގިނަގުނަ ފައިދާތަކެއް ކުރާނޭ ކަމެކެވެ. އެހެނަސް އެ ސޫރަތް ކިޔެވުމާއި އަޑު އެހުމާ އެއްފަދަވެގެން ނުވެއެވެ.  
ޝައިޠާނުން ދުރުކުރުމަށް ނުވަތަ ސިޙުރުގެ އުނދަގުލުން ރައްކާތެރިވުމަށް ބަޤަރާ ސޫރަތް ކިޔަވާނަމަ އެ ސޫރަތް ކިޔެވުމުގެ އިތުރަށް ވީހާވެސް ގިނައިން ކީރިތި ޤުރުއާން ކިޔެވުމާއި ފަރުޟު ފަސްނަމާދަށް ރައްކާތެރިވުމާއި ވީހާވެސް ގިނައިން ސުންނަތް ނަމާދުތައް ކުރުމާއި ހެނދުނާއި ހަވީރުގެ ޛިކުރުތައް ކިޔުމާއި އެނޫނަސް ސުންނަތުން ޘާބިތުވެފައިވާ ޛިކުރުތައް ކިޔުމާ އަދި އެންމެހާ ފާފަތަކުން ދުރުހެލިވުމަކީ، ﷲ ގެ އިޛުނަފުޅާ އެކުގައި އެފަދަ އުނދަގޫތަކުން ރައްކާތެރިކޮށްދޭނޭ ކަންކަމެވެ.
 
- އައްޝައިޚް ޢިމްރާން މުޙައްމަދު ޢަލީ