ދިވެހިރާއްޖޭގެ އުތުރުގައި އޮންނަ ނ. އަތޮޅަކީ ގިނަ އާބާދީއެއް ދިރިއުޅޭ އަތޮޅުތަކުގެ ތެރެއިން އެއް އަތޮޅެވެ. މި އަތޮޅުގެ ރައްޔިތުންގެ ތެރެއިން ކިޑްނީ ފެއިލްވެ ޑައިލިސިސް ހަދަންޖެހޭ މީހުންނަށް އެންމެ މުހިންމު އެއް ތަނަކީ ނ. މަނަދޫގައި ހުންނަ އަތޮޅު ހޮސްޕިޓަލެވެ. މި ހޮސްޕިޓަލަކީ އެ އަތޮޅުގެ ރައްޔިތުންގެ އިތުބާރާއި ޔަޤީންކަން ބިނާވެފައިވާ ތަނެކެވެ. އެހެންނަމަވެސް، ފާއިތުވި އަހަރުތަކުގައި ޑައިލިސިސް ހަދަންޖެހޭ ބަލިމީހުން އުފުލަމުން އައީ ބޮޑު ތަކުލީފެކެވެ. މި ތަކުލީފުތަކަށް ނިމުމެއް ގެނެސް، އުފާވެރި ޚަބަރެއް ލިބުމުގެ އުއްމީދު މިހާރު ވަނީ ހަޤީޤަތަކަށް ވެފައެވެ.
2017 ވަނަ އަހަރުގެ މެދުތެރޭގައި މަނަދޫ ހޮސްޕިޓަލުގައި ޑައިލިސިސްގެ ޚިދުމަތް ފެށުނެވެ. އޭރު އެންމެ 2 އެނދާއެކު ޚިދުމަތް ފެށުނު އިރު، ޚިދުމަތަށް އެދި ރަޖިސްޓަރީ ކުރީ އެންމެ މީހެކެވެ. ނަމަވެސް، މިވީ 7 އަހަރުގެ ތެރޭގައި ޑައިލިސިސްގެ ޚިދުމަތަށް އެދޭ ފަރާތްތައް އިތުރުވަމުން ދިޔައެވެ. މިކަމުގެ ސަބަބުން، ދުވާލާއި ރޭގަނޑުގައިވެސް ނަރުހުންނާއި ބަލިމީހުން އިންތިޒާރުކުރަން ޖެހުނެވެ. މިއީ ވަރަށް ބޮޑު ގޮންޖެހުމަކަށް ވެގެން ދިޔައެވެ.
މި ދަތި ހާލަތަށް ހައްލެއް ހޯދުމަށް، އަދުގެ ސަރުކާރުން ރައްޔިތުންގެ ކަންބޮޑުވުމާމެދު ވިސްނައި، އެކަމަށް ހައްލު ހޯދުމަށް މަސައްކަތްކޮށް، މި ނިމެންދާ 2024 ވަނަ އަހަރުގެ ނޮވެމްބަރު މަހުގެ ތެރޭގައި އިތުރު 2 އެނދު ޤާއިމުކޮށްދެއްވިއެވެ. މިއާއެކު، ޚިދުމަތް ހޯދާ ފަރާތްތަކަށާއި ޚިދުމަތް ދޭ މުވައްޒަފުންނަށް ވަރަށް ބޮޑު ލުޔެއް ލިބިގެން ދިޔައެވެ. މިހާރު ދުވާލުގެ ގަޑިތަކުގައި ހުރިހާ ބަލިމީހުންނަށްވެސް ޚިދުމަތް ދެވޭ ކަމަށް މަނަދޫ ހޮސްޕިޓަލުގެ މެނޭޖަރ އަޙްމަދު މައިމޫން، ދައުލަތުގެ މީޑިއާއަށް ދެއްވި މައުލޫމާތުގައި ވިދާޅުވެފައިވެއެވެ.
މި ޚިދުމަތުގެ ފައިދާ ހަމައެކަނި މަނަދޫގެ ރައްޔިތުންނަށް އެކަންޏެއް ނޫނެވެ. އަތޮޅުގެ އެހެން ރަށްރަށުން، ޚާއްޞަުން، ޚާއްޞަކޮށް ލަންދޫ، ކުޑަފަރި އަދި މާފަރުން ބަލިމީހުން މަނަދޫއަށް އައިސް މި ޚިދުމަތް ހޯދަމުންދެއެވެ. އަދި އާރްޓީއެލް ފެރީގެ ޚިދުމަތް އެ ސަރަޙައްދުގައި ފެށުމާއެކު، ހޮސްޕިޓަލަށް ފަރުވާ ހޯދަން އަންނަ މީހުންގެ އަދަދު އިތުރުވަމުން އަންނަކަން ފާހަގަކުރެވެއެވެ. މިހާރު ޑައިލިސިސް ސެޝަން ނިންމާލުމަށްފަހު އިރުއޮއްސުމުގެ ކުރިން އަނބުރާ ރަށަށް ދެވޭކަން ވެސް ހޮސްޕިޓަލުން ފާހަގަކޮށްފައިވެއެވެ. މިއީ އަތޮޅުގެ އެހެން ރަށްރަށުގެ ބަލިމީހުންނަށް ލިބުނު ވަރަށް ބޮޑު ލުޔެކެވެ.
މަނަދޫ ހޮސްޕިޓަލުގެ ޚިދުމަތް އިތުރަށް ހަރުދަނާކުރުމަށް ހޮސްޕިޓަލުން ދަނީ ގިނަ މަސައްކަތްތަކެއް ކުރަމުންނެވެ. މި މަސައްކަތްތަކުގެ ތެރޭގައި ޑައިލިސިސްގެ ޚިދުމަތް ފުޅާކުރުމުގެ އިތުރުން، އެހެނިހެން ޚިދުމަތްތައް ވެސް ރަނގަޅުކުރުމަށް މަސައްކަތްކުރަމުންދެއެވެ. މިކަމަކީ ހަމައެކަނި މަނަދޫގެ ރައްޔިތުންނަށް ނޫން، މުޅި ނ. އަތޮޅުގެ ރައްޔިތުންނަށް ލިބޭ ވަރަށް ބޮޑު ކުރިއެރުމެކެވެ.
މި އުފާވެރި ޚަބަރުތަކާއެކު، އިތުރު އުފާވެރި ޚަބަރެއް ވެސް ވަނީ ލިބިފައެވެ. ދާދި ފަހަކުން ރައީސުލްޖުމްހޫރިއްލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަނަދޫގައި ޒަމާނީ ހޮސްޕިޓަލެއް ޤާއިމުކުރުމުގެ އިދާރީ މަސައްކަތްތައް ކުރިއަށްދާ ކަމަށް ވިދާޅުވެފައެވެ. މި ވާހަކަ ރައީސް ވިދާޅުވީ އުތުރުގެ ހަތަރު އަތޮޅަށް ކުރެއްވި ދަތުރުފުޅުގެ ތެރެއިން ނ. މަނަދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ޑރ. މުޢިއްޒު ވިދާޅުވި ގޮތުގައި، މަނަދޫގެ ތަރައްޤީއަށް ރަށުގެ ޞިއްޙީ ދާއިރާ ހަރުދަނާ ކުރުމަކީ ވަރަށް މުހިންމު ކަމެކެވެ. އެހެންކަމުން، އެ ރަށުގައި ފެންވަރު ރަނގަޅު ހޮސްޕިޓަލެއް އެޅުމަށް ވަޢުދުވެވަޑައިގަތް ކަމަށާއި، އެކަމާ ގުޅޭ އިދާރީ މަސައްކަތްތައް ކުރިއަށްދާ ކަމަށް އެ މަނިކުފާނު ވިދާޅުވިއެވެ. މި ހޮސްޕިޓަލަކީ މަނަދޫގެ ރައްޔިތުންނާއި މުޅި އަތޮޅުގެ ރައްޔިތުން ފަޚުރުވެރިވާނެ ފަދަ، ފެންވަރު ރަނގަޅު ހޮސްޕިޓަލަކަށް ވާނެ ކަމުގެ ޔަޤީންކަން ރައީސް ދެއްވިއެވެ.
މީގެ އިތުރުން، ރައީސް ޑރ. މުޢިއްޒު ވަނީ މަނަދޫގެ މަގު ހެދުމުގެ މަޝްރޫޢު ވެސް ރަށުގެ ރައްޔިތުން ބޭނުންވާ ގޮތަށް، ފުޅާ މިނެއްގައި ކުރިއަށް ގެންދަވާނެ ކަމުގެ ޔަޤީންކަން ވެސް މަނަދޫގެ ރައްޔިތުންނަށް އަރުވާފައެވެ. މިއީ ހަމައެކަނި ޞިއްޙީ ދާއިރާއަށް ނޫން، ރަށުގެ އެހެނިހެން ވަސީލަތްތައް ވެސް ތަރައްޤީކުރުމަށް ސަރުކާރުން ދެއްވާ އަހައްމިއްޔަތުކަމުގެ ހެއްކެކެވެ.
މަނަދޫ ހޮސްޕިޓަލުގެ ޑައިލިސިސް ޚިދުމަތް ފުޅާވެގެން ދިއުމާއެކު، ނ. އަތޮޅުގެ ރައްޔިތުންނަށް ލިބިގެން ދިޔައީ ވަރަށް ބޮޑު އުފަލަކާއި ހިތްހަމަޖެހުމެކެވެ. ކިޑްނީ ފެއިލްވެފައިވާ ބަލިމީހުންނަށް ލިބުނު މި ލުޔަކީ އެ ފަރާތްތަކުގެ ދިރިއުޅުމަށް އައި ވަރަށް ބޮޑު ހެޔޮ ބަދަލެކެވެ. މީގެ ކުރިން ގިނަ ވަގުތު އިންތިޒާރުކުރަން ޖެހުމާއި، އަތޮޅުގެ އެހެން ރަށްރަށުން އަންނަ ބަލިމީހުންނަށް އެ ދުވަހު އަނބުރާ ރަށަށް ނުދެވި ހުންނަން ޖެހުމުގެ ދަތިކަން މިހާރު ވަނީ ނިމުމަކަށް އައިސްފައެވެ.
ހަމައެއާއެކު، ކުރިމަގުގައި އިތުރަށް ތަރައްޤީކުރެވޭ ޒަމާނީ ހޮސްޕިޓަލަކާއެކު، އެ އަތޮޅުގެ ޞިއްޙީ ޚިދުމަތްތައް އިތުރަށް ރަނގަޅުވެގެންދާނެ ކަމުގެ އުއްމީދު ވަނީ އާވެފައެވެ. ރައީސުލްޖުމްހޫރިއްޔާގެ ވަޢުދުފުޅާއެކު، މި އުއްމީދު އިތުރަށް ފުޅާވެ، ރައްޔިތުންގެ ހިތްތަކުގައި އާ އުންމީދުތަކެއް ވަނީ އުފެދިފައެވެ. މި ޒަމާނީ ހޮސްޕިޓަލް ޤާއިމުވުމުން، ހަމައެކަނި ޑައިލިސިސްގެ ޚިދުމަތުގެ އިތުރަށް އެހެނިހެން ޞިއްޙީ ޚިދުމަތްތައް ވެސް ފުޅާވެ، ފެންވަރު ރަނގަޅުވެގެންދާނެ ކަމަށް ރައްޔިތުން އުއްމީދުކުރެއެވެ.
މީގެ އިތުރުން، މަގުތައް ހެދުމުގެ މަޝްރޫޢު ފަދަ އެހެނިހެން ތަރައްޤީގެ މަޝްރޫޢުތައް ވެސް ކުރިއަށް ގެންދިއުމަށް ސަރުކާރުން ނިންމާފައިވާކަމީ، މުޅި ރަށާއި އަތޮޅުގެ ތަރައްޤީއަށް ލިބިގެންދާނެ ވަރަށް ބޮޑުަރަށް ބޮޑު ކުރިއެރުމެކެވެ. މިފަދަ މަޝްރޫޢުތަކުގެ ސަބަބުން ރަށުގެ އިޤްތިޞާދަށް ވެސް ހެޔޮ ބަދަލުތަކެއް އަންނާނެ ކަމަށް ބެލެވެއެވެ.
ނ. އަތޮޅުގެ ރައްޔިތުންނަށް މި ލިބުނު އުފާވެރި ޚަބަރުތަކަކީ ހަމައެކަނި އެ އަތޮޅަށް އެކަންޏެއް ނޫން، މުޅި ރާއްޖޭގެ ޞިއްޙީ ދާއިރާއަށް ލިބުނު ކުރިއެރުމެއްގެ ގޮތުގައި ވެސް ދެކެވިދާނެއެވެ. ސަބަބަކީ، ރާއްޖޭގެ އެކި ކަންކޮޅުތަކުގައި މިފަދަ ޚިދުމަތްތައް ފުޅާވެ ތަރައްޤީވަމުން ދިއުމަކީ، މުޅި ޤައުމުގެ ޞިއްޙީ ނިޒާމު ހަރުދަނާވެ، ރައްޔިތުންނަށް ލިބޭ ޚިދުމަތްތައް ފުޅާވެގެން ދިއުމަށް މަގުފަހިވެގެންދާނެ ކަމެކެވެ.
ރައީސް ޑރ މުހައްމަދު މުއިއްޒު އަތޮޅުތަކަށް ރަށްރަށަށް އަމިއްލަފުޅަށް ޒިޔާރަތް ކުރައްވާ ގާތުން ކަންކަން ބައްލަވައި ހައްލު ހޯއްދަވައިދެއްވަމުން ދާކަމީ، މިސަރުކާރަކީ ރާއްޖޭގެ ހުރިހާ ސަރަހައްދެއްގެ ހުރިހާ ރައްޔިތުންނަށްވެސް ހަމަހަމަކޮށް ހިދުމަތްދެމުންދާ ސަރުކާރެއްކަން ހާމަވެ އެނގިގެންދާ ކަމެކެވެ. މިސަރުކާރުގެ އެހީއާއެކު މަނަދޫ ހޮސްޕިޓަލުގެ ޑައިލިސިސް ޚިދުމަތް ފުޅާވެގެން ދިއުމާއި، އަލަށް ޤާއިމުކުރެވޭ ޒަމާނީ ހޮސްޕިޓަލުގެ މަޝްރޫއަކީ ނ. އަތޮޅުގެ ރައްޔިތުންނަށް ލިބުނު ވަރަށް ބޮޑު ކުރިއެރުމަކާއި ތަރައްޤީއެކެވެ. މި ކުރިއެރުންތަކުގެ ސަބަބުން ރައްޔިތުންގެ ދިރިއުޅުމުގެ ފެންވަރު މަތިވެ، ޞިއްޙީ ޚިދުމަތްތަކަށް ފަސޭހައިން ވާޞިލުވުމުގެ ފުރުޞަތު ފަހިވެގެންދާނެއެވެ. މިއީ ހަމައެކަނި މިއަދަށް ނޫން، ކުރިއަށް އޮތް ޖީލުތަކަށް ވެސް ލިބިގެންދާނެ ވަރަށް މުހިންމު ކުރިއެރުމެކެވެ. މި ތަރައްޤީގެ މަޝްރޫޢުތަކަކީ ރާއްޖޭގެ ހުރިހާ ކަންކޮޅުތަކެއްގައި ވެސް ފެންނަން ފަށާފައިވާ ކުރިއެރުންތަކުގެ ނަމޫނާއެކެވެ. މިފަދަ މަޝްރޫޢުތައް ކުރިއަށް ގެންދިއުމަކީ ޤައުމުގެ ދެމެހެއްޓެނިވި ތަރައްޤީއަށް މަގުފަހިކޮށްދޭނެ ކަމެއް ކަން ޔަގީނެވެ.