މިއަދު ފާހަގަކުރަމުން މިދަނީ ދިވެހި ޤައުމިއްޔަތާ ދިމާއަށް ޒަމާނީ އަދި ޢިލްމީ ނަޒަރިއްޔާއިން ބަލަން ފެށިތާ އެއް އަހަރު ފުރޭ ދުވަސް ކަމުގައި ބަހާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިފަދައިން ވިދާޅުވީ ދިވެހި ޤައުމިއްޔަތުގެ އިސްވަރުގެ އޮފީސް ރަސްމީކޮށް ހުޅުވުމަށް މިއަދު ޤައުމީ ދާރުލްއާސާރުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ޝަރަފުވެރިކޮށްދެއްވި މި ރަސްމިއްޔާތުގައި ވަޒީރު ވަނީ މިއަދު ހުޅުވިގެން ދިޔަ ޤައުމީ އިސްވަރުގެ އޮފީހުގެ ސަބަބުން މި ދާއިރާ ބައްޓަން ވެގެން ދާނެ ގޮތަށް އަލިއަޅުއްވާ ލައްވާފައެވެ. ވަޒީރު ވިދާޅުވީ މިސަރުކާރުގެ ޤައުމިއްޔަތު އިއާދަ ކުރުމުގެ މަޝްރޫއުގެ ދަށުން ދާއިރާ ބައްޓަން ވެގެން މިދަނީ ޤައުމިއްޔަތުގެ ދާއިރާއިން އެއް އަމާޒަކަށް، ގުޅިގެން މަސައްކަތް ކުރުމަށް އެކަށައެޅޭ ވަރަށް ރަނގަޅު އޮނިގަނޑެއްގެ ގޮތުގައި ކަމަށެވެ.
"މިހާރު މި ދާއިރާ ބައްޓަން ވެފައި މި އޮންނަ ގޮތުން، ވުޒާރާއެއް ހުރެފައި، މިދެންނެވި ދިރާސާތައް ކުރުމަށް މަރުކަޒެއް ހުރެފައި، އަދި އިސް ބެލުންތައް ބަލައި ގޮތް ކަނޑައެޅުމުގައި އިސްވަރެއް އޮވެފައި، އަދި އޭގެ އިތުރަށް، ތަރިކަ ބަލަހައްޓާ، ނުވަތަ ތަރިކަ ރައްކައުތެރިކުރާ ޤައުމީ މަރުކަޒެއް ހުރެފައި، ދިވެހިބަހުގެ އެކެޑަމީ ހުރެފައި، މުޅި އެއް ކުޑައިގެ ދަށަށް މި ދާއިރާ އަންނަ އައުން ޙަޤީޤަތުގައި ވާނީ ގުޅިގެން ކުރެވޭ ވަރަށް ބޮޑު، ވަރަށް މުހިންމު ޤައުމީ މަސައްކަތަކަށް." ވަޒީރު ވިދާޅުވިއެވެ.
ވަޒީރު ވިދާޅުވީ މިއަދު ހުޅުއްވައިދެއްވި އިސްވަރުގެ އޮފީހަކީ ދާއިރާގެ ކަންކަމުގައި އޮޑިޓޯރިއަމެއްގެ ގޮތުގައިވެސް ބޭނުންކުރެވޭނޭ ޖާގަ އޮތް އޮފީހެއް ކަމުގައެވެ. އެގޮތުން ޤައުމިއްޔަތުގެ ދާއިރާގެ ޢިލްމު ތަރައްޤީ ކުރުމަށް ޝައުޤުހުރި އެންމެން އެއްތަންވުމަށް މި އޮފީހުގެ ސަބަބުން ފަސޭހަވެގެން ދާނޭ ކަމުގައި ވަޒީރު ވިދާޅުވިއެވެ.
 
ހަބަރު: ސަރުކާރު