އަންނަ އަހަރަށް ލަފާ ކުރާ ބަޖެޓުގެ ބަހުސް މިރޭ 11:00 އާ ހަމައަށް ކުރިއަށް ގެންދިއުމަށް ރައްޔިތުންގެ މަޖިލީހުން ފާސްކޮށްފިއެވެ.
ބަޖެޓުގެ ބަހުސް ފަށާފައިވަނީ އިއްޔެގެ ޖަލްސާގައެވެ. ނަމަވެސް ބަޖެޓު ފޮތް މަޖިލީހުގެ މެންބަރުންނަށް ލިބިފައިވަނީ އިއްޔެކަން ފާހަގަކުރައްވައި ރިޔާސަތުން ވަނީ ބަހުސް ހެނދުނު 10:30 އާ ހަމައަށް ގެންދިއުމަށްފަހު މިއަދާއި މާދަމާ ބަހުސް ކުރިއަށްގެންދިއުމަށް ނިންމަވާފައެވެ.
މިއަދުގެ ޖަލްސާގައި ބަޖެޓުގެ ބަހުސް ކުރިއަށްގެންދާނެ ވަގުތު ކަނޑައެޅުމަށް ވަނީ ވޯޓަށް އަހާފައެވެ. އެގޮތުން ހުސްވަގުތުކޮޅަށް ތަންދެމުން މިރޭ 11:00 އާ ހަމައަށް ބަހުސް ކުރިއަށް ގެންދިއުމަށް ފާސްކޮށްފައިވަނީ 52 މެންބަރުންގެ ވޯޓުންނެވެ.
މިއަދުގެ ޖަލްސާގެ ވަގުތު އިތުރުކޮށްފައިވަނީ ބަޖެޓަށް ބަހުސް ކުރުމަށް އެދޭ މެންބަރުން ބަހުސްކޮށް ނިމެންދެންނެވެ. މާދަމާގެ ޖަލްސާގައިވެސް ބަހުސް ކުރުމަށް ބޭނުންފުޅުވާ މެންބަރުންގެ ވާހަކަފުޅުތައް ނިމެންދެން ޖަލްސާ ކުރިއަށްގެންދިއުމަށް ވަނީ ފާސްކޮށްފައެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓު މަޖިލިހަށް ހުށަހަޅުއްވާފައިވާއިރު އެންމެ ފުރަތަމަ ކުރިއަށްދާނީ މެންބަރުން ބަޖެޓަށް ބަހުސް ކުރުމުގެ މަރުހަލާއެވެ. އެއަށްފަހު ބަަޖެޓު ދިރާސާކުރުމަށް އެކަމަށް ޚާއްސަ ކޮމިޓީއަށް ފޮނުވާނެއެވެ.
ބަޖެޓް ފާސްވާނީ ބަޖެޓް ކޮމިޓީން ދިރާސާ ކުރުމަށްފަހު މެންބަރުންގެ މެދުގައި ނަގާ ވޯޓަކުންނެވެ.