އިސްރާއީލާއި އެމެރިކާއިން މިދިޔަ މަހުގެ 28ގައި އީރާނަށް ދިން ހަމަލާތަކާއި، އެ ގައުމުން ރައްދުގައި ދޭން ފެށި ހަމަލާތަކާ ގުޅިގެން، މި މަހުގެ ފުރަތަމަ ހަފުތާގައި ރާއްޖެއަށް އައި ފަތުރުވެރިންގެ އަދަދު 23.4 ޕަސެންޓް ދަށްވެއްޖެއެވެ. އިސްރާއީލާއި އެމެރިކާއިން ކުއްލި ގޮތަކަށް އީރާނަށް ދިން ހަމަލާތަކުގައި އެ ގައުމުގެ އިސް ލީޑަރު އާޔަތުﷲ ޢަލީ ޚާމަނާއީ ވަނީ އަވަހާރަކޮށްލައިފައެވެ. އީރާނުން ބަދަލު ހިފުމުގެ ގޮތުން، އިސްރާއީލުގެ އިތުރުން، މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާ ދޭން ފެށިއެވެ. އެ ހަމަލާތައް އަމާޒުވި ގައުމުތަކުގެ ތެރޭގައި ޔޫއޭއީ، ގަތަރު، ކުވޭތު، ބަހްރެއިން އަދި ސައުދީ އަރަބިއާ ހިމެނެއެވެ. އޭގެ ސަބަބުން، އެ ގައުމުތަކަށް ވައިގެ ސަރަަހައްދު ބަންދުކުރަން ޖެހި، ދަތުރުފަތުރު ހުއްޓުމަކަށް އައެވެ. އަދި، ރާއްޖެއަށް އެންމެ ގިނަ ފަތުރުވެރިން އަންނަ މަގުތައް ވެސް އެއާއެކު ބަންދުވިއެވެ. https://sun.mv/218552 ޓޫރިޒަމް މިނިސްޓްރީން މިއަދު އާންމުކުރި ތަފާސްހިސާބުން ދައްކާ ގޮތުގައި، މި މަހުގެ އެއް ވަނަ ދުވަހުން ފެށިގެން އިއްޔެއާ ހަމައަށް ރާއްޖެއަށް އައިސްފައިވަނީ 34،908 ފަތުރުވެރިންނެވެ. އެއާ އަޅައިބަލާއިރު، މިދިޔަ އަހަރުގެ އެ މުއްދަތުގައި 45,595 މީހުން އަދި 2024ގައި 44,372 މީހުން އައިސްފައިވެއެވެ. އެހެންކަމުން، މިދިޔަ އަހަރުގެ މާރިޗް މަހުގެ ފުރަތަމަ ހަފުތާއާ އަޅައިބަލާއިރު މި އަހަރުގެ މާރިޗު މަހުގެ ފުރަތަމަ ހަފުތާގައި އައި ފަތުރުވެރިންގެ އަދަދު ވަނީ 23.4 ޕަސެންޓް ދަށްވެފައެވެ. ނަމަވެސް، އިއްޔެއާ ހަމައަށް ރާއްޖެ އައި ޖުމްލަ ފަތުރުވެރިންގެ އަދަދު، މިދިޔަ އަހަރުގެ އެ މުއްދަތާ އަޅައިބަލާއިރު ވަނީ އިތުރުވެފައެވެ. އެގޮތުން ވިޔަފާރި ވިސާއާއި ކްރޫޒްތަކުން އައި މީހުން ހިމެނޭ ގޮތަށް މި އަހަރުގެ މިހާތަނަށް 516,676 މީހުން ޒިޔާރަތްކޮށްފައިވެއެވެ. މިދިޔަ އަހަރުގެ މި މުއްދަތުގައި އެ އަދަދު ހުރީ 478,448ގައެވެ. މެދުއިރުމަތީގެ އެއާލައިންތަކެއް: މެދުއިރުމަތިން އައި ފްލައިޓުތައް މަދުވުމުން، ފަތުރުވެރިންގެ އަދަދު ވަނީ މަދުވެފައި -- ފޮޓޯ/ އެމްއޭސީއެލް ފާހަގަކޮށްލެވޭ ގޮތުގައި، މި މަހުގެ އެއް ވަނަ ދުވަހު 6،440 ފަތުރުވެރިން ރާއްޖެ އައިސްފައިވެއެވެ. ނަމަވެސް ފާއިތުވި ދުވަސްތަކުގައި އެ އަދަދު ހުރީ 4،000ގެ އަދަދުތަކުގައި ހިފެހެއްޓިފައެވެ. އެއަށްފަހު އިއްޔެ އެ އަދަދު ވަނީ 5،238އަށް އަރައިފައެވެ. ރާއްޖެއަށް އެންމެ ގިނަ ފަތުރުވެރިން އައިސްފައިވާ ގައުމުތަކުގެ ތެރޭގައި: ޗައިނާ: 81,711 ފަތުރުވެރިން ރަޝިއާ: 59,825 ފަތުރުވެރިން އިޓަލީ: 49,295 ފަތުރުވެރިން އިނގިރޭސިވިލާތް: 47,781 ފަތުރުވެރިން ޖަރުމަނު: 32,389 ފަތުރުވެރިން ރާއްޖެއަށް ދުވާލަކު އަންނަ ފަތުރުވެރިންގެ ތެރެއިން 35 އިންސައްތަ މީހުން އަންނަނީ މެދުއިރުމަތިން ކަމަށް ވާއިރު، ހަނގުރާމައިގެ ސަބަބުން ދެން އެ އަދަދު ވެސް ދަށްވާނެ ކަމަށާއި އޭގެ އަސަރު ވަރަށް ބޮޑަށް އާމްދަނީއަށް ކުރާނެ ކަމަށް ޓޫރިޒަމް މިނިސްޓަރު ތޯރިގު އިބްރާހީމް ވަނީ މި މަހުގެ އެއް ވަނަ ދުވަހު ވިދާޅުވެފައެވެ. މިނިސްޓަރު ވަނީ، އެ އަންނަ ހީނަރުކަން ވީހާވެސް އަވަހަށް ކުޑަކުރެވޭތޯ ބަލާނެ ކަމަށް ވިދާޅުވެފައެވެ. https://sun.mv/218835 މެދުއިރުމަތީގެ ވައިގެ ސަރަހައްދު ބަންދުކޮށް، ގިނަ އަދަދެއްގެ ފްލައިޓް ކެންސަލްކުރުމުން ރާއްޖޭގައި ގިނަ އަދަދެއްގެ ފަތުރުވެރިން ތާށިވިއެވެ. އެކަމާ ގުޅިގެން، ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ކަމާގުޅޭ ވުޒާރާތަކާއި ސިނާޢަތުގެ ބައިވެރިންނާ ގުޅިގެން ފިޔަވަޅުތަކެއް އަޅަން ފަށައިފައިވާ ކަމަށް އިއްޔެ ވަނީ ބުނެފައެވެ. އޭގެ ތެރޭގައި، ރާއްޖޭގައި ތާށިވެފައި ތިބި ފަތުރުވެރިން އެ މީހުންގެ ގައުމުތަކަށް އަނބުރާ ފޮނުވަން ފްލައިޓުތަކެއް ބާއްވަން ފެށުން ހިމެނޭ ކަމަށް އެ ކުންފުނިން ބުނެފައިވެއެވެ.