ތެޔޮ ނެތުމުގެ ސަބަބުން ކަރަންޓު ކެނޑި، ގާޒާގެ ދެވަނައަށް އެންމެ ބޮޑު ހޮސްޕިޓަލްގެ ހިދުމަތް ހުއްޓިފައިވާ ކަމަށް ދަ ފަލަސްތީނިއަން ރެޑް ކްރެސެންޓުން އިއުލާންކޮށްފި އެވެ.
ފަލަސްތީން ރެޑް ކްރެސެންޓުން ނެރުނު ބަޔާނެއްގައި ބުނީ، އަލް ގުދުސް ހޮސްޕިޓަލުގެ ހިދުމަތް ހުއްޓި، ބޭނުން ނުކުރެވޭ ހާލަތަށް ގޮސްފައިވާ ކަމަށެވެ.
“ގާޒާގެ ސިއްހީ ނިޒާމު މުޅިން ރޫޅި، އޭގެ ސަބަބުން ކުރިމަތިވި ނުރައްކާތެރި އިންސާނީ ހާލަތްތަކަށް ބައިނަލްއަގުވާމީ މުޖުތަމައުއާއި ހަތަރު ވަނަ ޖެނީވާ މުއާހަދާގައި ސޮއިކުރި ފަރާތްތައް ޖަވާބުދާރީ ކުރުވޭނެ،” ބަޔާނުގައި ބުނެފައިވެ އެވެ.
އަލް ގުދުސް ހޮސްޕިޓަލުގެ ހިދުމަތްތައް ހުއްޓުނުކަން އިއުލާން ކުރި އިރު، ދަ އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސް އިން ވަނީ އަލް ގުދުސް ހޮސްޕިޓަލާ ގުޅުން ކެނޑިފައިވާ ކަމަށް މިއަދު ބުނެފަ އެވެ.
ފަލަސްތީންގަައި ވެރިކަން ކުރާ ހަމާސް ޖަމާއަތުން، އިޒްރޭލާ ދެކޮޅަށް ފެށި އޮޕަރޭޝަނާ ގުޅިގެން ބަދަލު ހިފުމުގެ ނަމުގައި އިޒްރޭލުން ދަނީ ގާޒާގެ ހޮސްޕިޓަލްތަކަށާއި އާންމުން ދިރިއުޅޭ އިމާރާތްތަކަށް އަދި މިސްކިތްތަކާއި ފައްޅިތަކަށް ބޮން އަޅަމުންނެވެ.
އިޒްރޭލުގެ ހަމަލާތަކުގައި މިހާތަނަށް 11،000 ފަލަސްތީން ރައްޔިތުން ޝަހީދުވެފައިވެ އެވެ. އޭގެ ތެރޭގައި 8،000 ކުޑަކުދިންނާއި އަންހެނުން ހިމެނެ އެވެ.