ސެމްސަންގްގެ އެންމެ މަގުބޫލު ފްލެގްޝިޕް ފޯނު ސީރީޒް ކަމަށްވާ "ގެލެކްސީ އެސް" ސީރީޒްގެ ފޯނުތައް އާންމުކޮށް ތިން މޮޑެލްއަކާއެކު ނެރުނު ނަމަވެސް، އަންނަ އަހަރު ބާޒާރަށް ނެރޭ ގެލެކްސީ އެސް27 ސީރީޒްގައި ޕްރޯ މޮޑެލްއަކާއެކު ހަތަރު ފޯނު ހިމެނޭނެ ކަމަށް ލީކުވެފައިވާ މައުލޫމާތުތަކުން ދައްކައިފިއެވެ. މި ސީރީޒްގައި އަލަށް ހިމަނާ މޮޑެލްއަކީ "ގެލެކްސީ އެސް27 ޕްރޯ" އެވެ. މިއާއެކު މި ސީރީޒްގައި ހިމެނޭނީ ސްޓޭންޑަޑް އެސް27، އެސް27 ޕްލަސް، އެސް27 އަލްޓްރާ އަދި އަލަށް ތައާރަފުކުރާ އެސް27 ޕްރޯއެވެ. ދެކުނު ކޮރެއާގެ އޮންލައިން ޕްލެޓްފޯމެއް ކަމަށްވާ "ނޭވާ" ގައި އާންމުކޮށްފައިވާ ރިޕޯޓުތަކުން އެނގޭ ގޮތުގައި، އަލަށް ނެރޭ ޕްރޯ މޮޑެލްއަކީ 6.4 އިންޗީގެ ސްކްރީނެއް ހިމެނޭ، ހިފާލަން ފަސޭހަ ކޮމްޕެކްޓް ފޯނެކެވެ. މި ފޯނު ފަރުމާކޮށްފައި ވަނީ ތުނިކޮށް ކަމަށާއި، މިދިޔަ މޮޑެލްތަކަށްވުރެ ބޮޑު ބެޓެރީއަކާއި އާ ކެމެރާ ސެންސަރެއް މި ފޯނުގައި ހިމެނޭނެ ކަމަށް ލަފާކުރެވެއެވެ. ސެމްސަންގުން މި ފޯނު ބާޒާރަށް ނެރޭނީ އެސް27 ޕްލަސް އާއި އެސް27 އަލްޓްރާއާ ދެމެދުގެ އަގުތަކެއްގައެވެ. މި އާ ޕްރޯ މޮޑެލްގެ ގިނަ ފީޗާތަކެއް އެންމެ މަތީ ފަންތީގެ އަލްޓްރާ މޮޑެލްއާ އެއްގޮތްވާނެ ކަމަށް ބެލެވުނު ނަމަވެސް، މި ފޯނުގައި ސެމްސަންގްގެ "އެސް ޕެން" ސަޕޯޓެއް ނުކުރާނެއެވެ. މީގެ އިތުރުން، މި ފޯނުގައި ބޭނުންކުރާ ޑިސްޕްލޭ މެޓީރިއަލްސްގެ އަގަށް އަންނަ ބަދަލުތަކުގެ ސަބަބުން، އެސް27 ޕްރޯ އަދި އެސް27 އަލްޓްރާގެ ހާޑްވެއާ ހޮވުންތަކަށް ބަދަލުތަކެއް އައުން އެކަށީގެންވެއެވެ. މީގެ ކުރިން ބައެއް ރިޕޯޓުތައް ބުނާގޮތުން މި ޕްރޯ ފޯނުގައި ސެމްސަންގްގެ "ޕްރައިވެސީ ޑިސްޕްލޭ" ޓެކްނޮލޮޖީ ވެސް ބޭނުންކޮށްފާނެއެވެ. މި ސީރީޒްގެ އެންމެ މަތީ މޮޑެލް ކަމަށްވާ ގެލެކްސީ އެސް27 އަލްޓްރާގެ ފަހަތު ކެމެރާ ފަރުމާކޮށްފައިވާ ގޮތަށް ބޮޑު ބަދަލެއް ގެނައުމަށް ސެމްސަންގުން ދަނީ ތައްޔާރުވަމުންނެވެ. އެގޮތުން، މި ފޯނުގައި މިހާރު ހުރި 5،000 އެމްއޭއެޗްގެ ބެޓެރީގެ ބަދަލުގައި މާ ބޮޑު ބެޓެރީއެއް ހިމަނާނެ ކަމަށް ލީކުތަކުން ދައްކައެވެ. ބެޓެރީ ބޮޑުވި ނަމަވެސް، ފޯނުގެ ބޯމިނަށް ބަދަލެއް ނުގެނެސް، ކުރީގެ ފޯނަށްވުރެ ލުއިކޮށް މި ފޯނު ފަރުމާކުރާނެ ކަމަށް ވެއެވެ. ސެމްސަންގުން މިހާރު ދަނީ އެސް27 އަލްޓްރާ މޮޑެލްގައި 200 މެގަޕިކްސެލްގެ ޕްރައިމަރީ ކެމެރާއަކާއެކު، އަލި ހުންނަ މިންވަރަށް ބަލައި ބަދަލުކޮށްލެވޭ "ވޭރިއަބަލް އެޕެރެޗާ" ސިސްޓަމެއް ޓެސްޓުކުރަމުންނެވެ. ގެލެކްސީ އެސް27 ސީރީޒް ބާޒާރަށް ނެރުމަށް އަދި ގިނަ ދުވަސްތަކެއް އޮތުމާއެކު، މި އާ ޕްރޯ މޮޑެލް ހަގީގަތުގައިވެސް އަންނަ އަހަރު ފެންނާނެތޯ ނުވަތަ ނޫންތޯ ސެމްސަންގުން ރަސްމީކޮށް އަދި ކަށަވަރެއް ނުކުރެއެވެ.