"އެކަމަކާއި ގުޅިގެން ތިމާގެ އަމިއްލަ ނަފްސް ނިކަމެތިވެ، ދިރިއުޅެން އުނދަގޫވެދާނެ ޙާލަތަކަށް ނަފްސް ވައްޓައިލުން މުސްލިމުންނަށް ހުއްދަވެގެނެއް ނުވެއެވެ. އެކަމަށް ރަސޫލް ޞައްލަﷲ ޢަލައިހި ވަސައްލަމަ ވަނީ މީސްތަކުންނަށް އިންޒާރުވެސް ދެއްވަވައިފައެވެ. ވީމާ އެކަމަށް ޢަމަލުކުރަން މަސައްކަތްކުރަންޖެހޭނެއެވެ."
ދިރިއުޅުމުގައި ކުރިމަތިވާ ކަންކަން ޙައްލު ނުކުރެވި ދިގުލައި ދަމުން ގޮސް މީހާގެ އަމިއްލަ ނަފްސް ނިކަމެތިވެ ބަލިކަށިވެ ދިރިއުޅެން އުނދަގޫވާ ޙާލަތަށް ކަންކަން އެބަދެއެވެ. ޒަވާޖީ ޙަޔާތުގައިވެސް މިފަދަ ގޮތްތައް ކުރިމަތިވެއެވެ. ވީމާ މިއީ ވަރަށް ބޮޑަށް ވިސްނަންޖެހޭނެ ޙާލަތެކެވެ. 
ހިތްދަތިކަމުގައި އުޅެންޖެހޭނަމަ ނަފްސް ބަލިކަށިވާނެއެވެ. ވީމާ އެކަމުން އަރައިގަންނަން ކުރަންޖެހޭ ކަންކަން ނުކޮށް ހުރެގެން ނުވާނެއެވެ. މަސައްކަތްކުރަމުން ދުޢާވެސް ކުރަންވާނެއެވެ. އިތުރު ގޮތެއް ނެތިގެން ކެތްތެރިވާންޖެހުނަސް ކެތްތެރިވާންޖެހޭނީ އެކަމުގެ ސަބަބުން މިބުނި ދަރަޖައަށް އަމިއްލަ ނަފްސަށް ނިކަމެތިކަން ނުލިބޭނެ ވަރަށެވެ. 
މިޙާލަތުގައި ކުރިމަތިވާ އެންމެ ބޮޑު މައްސަލައަކީ ކުރަންޖެހޭ އަޅުކަންވެސް ނުކުރެވުމެވެ. ކުރަމުން އަންނަ އަޅުކަންކުރުންވެސް މަދުކުރެވެމުން އައިސް ހުއްޓައިވެސް ލެވުމެވެ. އެކަންކުރަނީ ޤަޞްދުގައި ނޫންކަމަށްވެސް ވެދާނެއެވެ. ނަމަވެސް އެމީހާގެ ކަންކަމުގެ ޙިސާބު އެމީހަކު ބަލަހައްޓައި މިބުނި ފަދަ ގޮތަކަށް ކަންކަން ވިޔަ ނުދޭން މަސައްކަތްކުރަންވާނެއެވެ. އެކަމަށް ކުރަން ޖެހުނު ކޮންމެ ކަމެއްވެސް ކުރަންވާނެއެވެ. މާނައަކީ ތިމާގެ ނަފްސް އެޙާލަތުން ސަލާމަތްކުރަން އަލަންޖެހުނު ކޮންމެ ފިޔަވަޅެއްވެސް (ﷲ ތަޢާލާގެ މަގުގައި ޘާބިތުވެ ހުރެ) އެޙާލަތުގައި އަޅަންވާނެއެވެ. 
ﷲ ތަޢާލާގެ ރުހިވޮޑިގަތުން ލިބި ކަންކަން ކާމިޔާބުކުރެވެނީ މިބުނި ކަންކަމަށް ވިސްނައިގެންނެވެ. ކެތްތެރިވާން އަންގަވާފައިވާ ބަސްފުޅުގެ މާނައަކީ މީހާގެ އަމިއްލަ ނަފްސް ހަލާކުތެ ތެރެއަށް ވެއްޓި، ހެޔޮ ޢަމަލު ނުކުރެވޭ ހިސާބަށް މީހާގެ ކަންދާއިރުވެސް އެކަމަކުން ސަލާމަތްވާން މަސައްކަތްނުކޮށް ހުރުމެއް ނޫނެވެ. ވީމާ އަބަދުވެސް ތިމާގެ އަމިއްލަ ނަފްސަށް ގެއްލުން ނުވާނެ މިންވަރުގައި ކަންކަން ބަހައްޓަން މަސައްކަތްކުރަންވާނެއެވެ.
 
- މަޢުލޫމާތު: ޝައިޚް ހަމްޒާ ޔޫސުފްގެ ދަރުސަކުން