މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ޑިރެކްޓަރުންގެ ބޯޑުގައި މިހާރު ތިއްބެވި މެންބަރުންގެ ތެރެއިން ހަތަރު މެންބަރުންގެ މުއްދަތު ހަމަވާތީ، އެ ބޯޑަށް މެންބަރުން އައްޔަނުކުރުމަށް މެންބަރުކަމުގެ މަގާމަށް ކުރިމަތިލުމުގެ ފުރުސަތު ރައީސުލްޖުމްހޫރިއްޔާގެ އޮފީހުން މިއަދު ހުޅުއްވާލައިފިއެވެ. ރައީސް އޮފީހުން ބުނީ، އެ ފުރުސަތު ހުޅުއްވާލާފައިވަނީ މިއަދުން ފެށިގެން އަންނަ ޖުލައި މަހުގެ ހައެއްވާ އާދީއްތަ ދުވަހުގެ 12:00 ގެ ނިޔަލަށް ކަމަށެވެ. އެ މަގާމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، އެ ކަމަށް ކުރިމަތިލުމަށް ދީފައިވާ މުއްދަތުގައި ރަސްމީ ބަންދު ދުވަސްތައް ފިޔަވައި އެހެން ދުވަސްދުވަހުގެ ހެނދުނު 08:30 އިން 12:00 އަށް ރައީސް އޮފީހުންނެވެ. މީރާގެ މެންބަރުކަމަށް ކުރިމަތިލުމަށް އެދޭ ފޯމު އެ އޮފީހުގެ ވެބްސައިޓުން މިހާރު ޑައުންލޯޑް ކުރެވޭނެ ކަމަށް ރައީސް އޮފީހުން ބުންޏެވެ. މީރާގެ ބޯޑު މެންބަރުކަމުގައި ތިއްބަވަނީ ހަތް ބޭފުޅުންނެވެ. އެގޮތުން, މިވަގުތު ތިއްބަވާ ހަތް މެންބަރުންނަކީ: ޗެއާޕާސަން: އަޙްމަދު ސާއިދު މުޞްތަފާ ޑެޕިއުޓީ ޗެއާޕާސަން: ލީނާ މުޙައްމަދު ޒާހިރު ހުސައިން ކޮމިޝަނާ ޖެނެރަލް އޮފް ޓެކްސޭޝަން: ޙަސަން ޒަރީރު ބޯޑު މެންބަރު: އައިޝަތު އަޝާ އަލީ ބޯޑު މެންބަރު: ދަހާ ޝުޢައިބު ބޯޑު މެންބަރު: މުމްތާޒް ޢަބްދުއްރަޝީދު ބޯޑު މެންބަރު: ހުޝާމް ވަޙީދު