ދިވެހި ފުލުހުންގެ ހިދުމަތުން މިހާރު ހިންގަމުން ގެންދާ، ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް މައުލޫމާތު އެއްކުރުމަށް ގާއިމްކުރި ޕޯޓަލްއަށް މިހާތަނަށް ޖުމުލަ 16 ފަރާތަކުން މައުލޫމާތު ހުށަހަޅާފައިވާކަމަށް ފުލުހުން ބުނެފިއެވެ.
މި މަހުގެ 21 ވަނަ ދުވަހު ގާއިމުކުރި މި ޕޯޓަލްއަށް 16 ފަރާތަކުން މައުލޫމާތު ދިންއިރު އޭގެ ތެރެއިން 4 ފަރާތަކުން ގުޅުންހުރި ލިޔެކިޔުން ހިއްސާކޮށްފައިވާ ކަމަށް ފުލުހުން ވަނީ ބުނެފައެވެ.
މިހާރު ވެސް މި ޕޯޓަލް މެދުވެރިކޮށް މައުލޫމާތު ހިއްސާ ކުރުމުގެ ފުރުސަތު ހުޅުވިފައިވާކަން ފާހަގަކޮށް ފުލުހުން ބުނީ މައުލޫމާތާއި ހެކި ހިއްސާކުރާއިރު، އަމިއްލަ މައުލޫމާތު ހާމަނުކޮށް ވެސް ހުށަހެޅޭނެކަމަށެވެ. ނުވަތަ ތަހުގީގު ކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާއެކުވެސް ހިއްސާކުރެއްވިދާނެކަމަށް ދުލުހުން ވަނީ ބުނެފައެވެ.
މި ޕޯޓަލް މެދުވެރިކޮށް މައުލޫމާތު ހުށަހަޅުއްވާ ފަރާތްތަކުގެ ސިއްރުކަން ހިފަހައްޓާނެ ކަމުގެ ޔަގީންކަން ފުލުހުން ވަނީ ދީފައެވެ.
ބިންވެރިޔާ ސްކީމްގެ ލިސްޓުގައި ނުހިމެނޭ ބަޔަކަށް ގޯތި ދިން ކަމަށް ބުނާ މައްސަލައެއް ފެންމަތިވެ، އެ މައްސަލަ ފުލުހުން އަންނަނީ ތަހުގީގުކުރަމުންނެވެ. މި މައްސަލައިގެ އިތުރުން އުސޫލުން ބޭރުން ވިނަރެސް ފްލެޓުތަކެއް ދީފައިވާ މައްސަލައެއްވެސް ވަނީ ފެންމަތިވެފައެވެ.