ޔޫއޭއީއާ އެކު އެކި ދާއިރާތަކުން ގުޅުން ބަދަހިކުރަން މަޝްވަރާކޮށްފި އެވެ.
މިކަމާ ގުޅޭ ގޮތުން މަޝްވަރާކުރީ ހާރިޖީ ވަޒީރު ޑރ. އަބްދުﷲ ހަލީލު ޔޫއޭއީ އަށް ކުރައްވަމުންދާ ދަތުރުފުޅުގެ ތެރެއިން އެ ގައުމުގެ ހާރިޖީ ވަޒީރު ޝައިޚް އަބްދުﷲ ބިން ޒައިދު އަލް ނަހްޔާނާ އެކު ބޭއްވި ބައްދަލުކުރެއްވުމުގަ އެވެ.
މި ބައްދަލުކުރެއްވުމަށް ފަހު އެކްސްގައި ކުރެއްވި ޕޯސްޓެއްގައި ހަލީލު ވިދާޅުވީ ދެ ގައުމުގެ ގުޅުން އަދި ތަފާތު އެކި ދާއިރާތަކުން ގުޅުން ބަދަހިކުރުމާއި ގުޅޭގޮތުން މަޝްވަރާ ކުރެވުނު ކަމަށެވެ. އޭގެތެރޭގައި ފަތުރުވެރިކަމާއި މަސްވެރިކަމުގެ ދާއިރާ އާއި އިއާދަކުރަނިވި ހަކަތައިގެ ދާއިރާ އަދި ދަތުރުފަތުރުގެ ދާއިރާ ހިމެނެ އެވެ.
މީގެއިތުރުން ޔޫއޭއީ ސަރުކާރުގެ ފަރާތުން ރާއްޖޭގެ ތަރައްގީ އަށް ފޯރުކޮށްދެމުންދާ އެހީތަކަށް ހަލީލު ވަނީ ޝުކުރު އަދާކުރައްވާފަ އެވެ.
ޔޫއޭއީ އަށް ހަލީލު ކުރައްވާ ދަތުރުފުޅުގައި ތަފާތު ދާއިރާތަކުން ގުޅުން ބަދަހިކުރުމުގެ ފުރުޞަތުތައް ހޯދުމަށް ޔޫއޭއީ ސަރުކާރުގެ އިސްވެރިންނާ ބައްދަލުކުރެއްވުމަށް ވަނީ ހަމަޖެހިފަ އެވެ.