ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގައި ޔޫކްރެއިންގެ ސިފައިންނާ ދެކޮޅަށް މަނާ ކޮށްފައިވާ ނުރައްކާތެރި ކެމިކަލް ހަތިޔާރުތައް ބޭނުން ކުރަމުންދާ ކަމުގައި އެމެރިކާއިން ތުހުމަތު ކޮށްފިއެވެ. އެމެރިކާއިން ބުނީ, ޔޫކްރެއިންގެ ފައުޖުތަކާ ދެކޮޅަށް ނުރައްކާތެރި ކެމިކަލް ހަތިޔާރެއް ކަމުގައިވާ 'ކްލޮރޮޕިކްރިން' ބޭނުން ކުރަމުންދާ ކަމުގައެވެ.
އިންސާނުން ނޭވާހާސްކޮށްލުމަށް ބޭނުން ކުރެވިދާނެ އެ ކެމިކަލަކީ ހަނގުރާމައިގެ މައިދާނުގައި ބޭނުން ކުރުން މަނާ ކޮށްފައިވާ ނުރައްކާތެރި ހަތިޔާރެކެވެ. ކްލޮރޮޕިކްރިންގެ އިތުރުން, މުޒާހަރާތައް ރޫޅައިލުމަށް ބޭނުން ކުރާ ނުރައްކާތެރި ހަތިޔާރު ޔޫކްރެއިންގެ ފައުޖުތަކާ ދެކޮޅަށް ރަޝިޔާއިން ބޭނުން ކުރަމުންދާ ކަމުގައި ވެސް އެމެރިކާއިން ތުހުމަތު ކުރެއެވެ.
"މި ފަދަ ހަތިޔާރު ބޭނުން ކުރުމަކީ ރަޝިޔާއިން އަލަށް ކުރާ ކަމެއް ނޫން. ރަޝިޔާއިން މި ފަދަ ހަތިޔާރު ބޭނުން ކުރަމުން ދަނީ, ޔޫކްރެއިންގެ ސިފައިންގެ ބާރުގެ ދަށުގައި އޮތް ސަރަޙައްދުތަކުން އެ މީހުން ފައްސައިލުމަށް ބޭނުން ކުރާ އުކުޅެއްގެ ގޮތުން،" އެމެރިކާގެ ޚާރިޖީ ވުޒާރާއިން ބުންޏެވެ. އެމެރިކާއިން ވަނީ, ރަޝިޔާގައި ކެމިކަލް ހަތިޔާރު އުފައްދާ ކަމަށް ތުހުމަތު ކުރެވޭ ފަރާތްތަކާ ދެކޮޅަށް ދަތި ކުރުމުގެ ފިޔަވަޅުތަކެއް ވެސް އަޅާފައެވެ.
އެމެރިކާގެ ނޭޝަނަލް އިންސްޓިޓިއުޓް އޮފް އޮކިޔުޕޭޝަނަލް ހެލްތް އެންޑް ސޭފްޓީން ބުނީ, ކްލޮރޮޕިކްރިނަކީ ފުރަތަމަ ބޮޑު ހަނގުރާމައިގައި ފުޅާ ދާއިރާއެއްގައި ބޭނުން ކޮށްފައިވާ ނުރައްކާތެރި ހަތިޔާރެއް ކަމުގައެވެ. އެއީ, މިހާރު ދަނޑުވެރިކަމުގައި ބޭނުން ކުރަމުންދާ މާއްދާއެއް ނަމަވެސް, އެއީ 1993 ވަނަ އަހަރުގެ ކެމިކަލް ހަތިޔާރާ ބެހޭ މުއާހަދާގެ ދަށުން ހަނގުރާމައިގެ މައިދާނުގައި ބޭނުން ކުރުން މަނާ ކޮށްފައިވާ ކެމިކަލެކެވެ.
ޔޫކްރެއިންގެ ފައުޖުތަކާ ދެކޮޅަށް ކެމިކަލް ހަތިޔާރު ބޭނުން ކުރާ ކަމަށް އެމެރިކާއިން ކުރާ ތުހުމަތުތައް ރަޝިޔާއިން ދޮގު ކުރެއެވެ. ރަޝިޔާއިން ބުނީ, އެ ޤައުމުގެ އަސްކަރިއްޔާގައި އެއްވެސް ނުރައްކާތެރި ކެމިކަލް ހަތިޔާރެއް ނުހުންނާނެ ކަމުގައެވެ. ނަމަވެސް އެމެރިކާއިން ބުނީ, ނުރައްކާތެރި ގޭސްތަކެއް ކަމުގައިވާ ސީއެސް އަދި ސީއެން ހުންނަ ބޮން ވެސް ރަޝިޔާގެ ފައުޖުން ޔޫކްރެއިންގައި ބޭނުން ކުރަމުންދާ ކަމުގައެވެ.
އެމެރިކާއިން ބުނާ ގޮތުގައި, ރަޝިޔާއިން ދާދި ފަހުން ނުރައްކާތެރި ކެމިކަލްތަކެއް ބޭނުން ކުރުމާ ގުޅިގެން ޔޫކްރެއިންގެ ސިފައިންގެ 500 މީހަކަށް އަސަރުކޮށް, ފަރުވާ ދޭން ޖެހުނެވެ. އަދި, އޭގެ ތެރެއިން އެކަކު މަރުވި ކަމުގައި ވެސް އެމެރިކާއިން ބުނެއެވެ.
2021ވަނަ އަހަރާ ޖެހެންދެން ޔޫކްރެއިންގެ ޕްރޮސިކިޔުޓަރ ޖެނެރަލްގެ ނައިބު ކަމުގެ މަޤާމު ފުރުއްވި ޔުންދޮޒް މަމިޔެޒޮވް ވިދާޅުވީ ފާއިތުވި ހައެއްކަ މަހުގެ ތެރޭގައި ރަޝިޔާއިން ޔޫކްރެއިންގެ ސިފައިންނާ ދެކޮޅަށް 900 ފަހަރަކު ކެމިކަލް ހަތިޔާރު ބޭނުން ކޮށްފައިވާ ކަމުގައެވެ. އަދި, 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ހަނގުރާމަ ފެށި ފަހުން 1,400 ފަހަރު ކެމިކަލް ހަތިޔާރު ބޭނުން ކޮށްފައިވާ ކަމުގައެވެ.
މި ޙަމަލާތަކާ ގުޅިގެން އެމެރިކާއިން ދަތި ކުރުމުގެ ފިޔަވަޅުތައް އަޅާފައި ވަނީ ރަޝިޔާގެ ކެމިކަލް އަދި ބަޔޮލޮޖިކަލް ހަތިޔާރު އުފެއްދުމުގެ ޕުރޮގުރާމާ ގުޅުން ހުރި ފަރާތްތަކާ ދެކޮޅަށެވެ. އޭގެ ތެރޭގައި, ޔޫކްރެއިން ހަނގުރާމައިގައި ކްލޮރޮޕިކްރިން ބޭނުން ކުރަމުންދާ ކަމަށް އެމެރިކާއިން ތުހުމަތު ކުރާ ރަޝިޔާގެ އަސްކަރިއްޔާގެ ޔުނިޓެއް ހިމެނެއެވެ. އަދި, އެ ފަރާތްތަކަށް އެހީތެރިކަން ފޯރުކޮށްދޭ ހަތަރު ކުންފުންޏަކާ ދެކޮޅަށް ވެސް އެމެރިކާއިން ވަނީ ދަތި ކުރުމުގެ ފިޔަވަޅުތައް އަޅާފައެވެ.
ރަޝިޔާ-ޔޫކްރެއިން ހަނގުރާމައިގައި ދެ ފަރާތުން ވެސް ދަނީ, އަނެއް ޤައުމުން ކެމިކަލް ހަތިޔާރު ބޭނުން ކުރަމުންދާ ކަމަށް ތުހުމަތު ކުރަމުންނެވެ. ކެމިކަލް ހަތިޔާރު ބޭނުން ކުރުން މަނާ ކުރާ ޖަމުޢިއްޔާ (އޯޕީސީޑަބްލިޔު)ން ބުނީ, ރަޝިޔާ ސިފައިން 2022ވަނަ އަހަރު ޔޫކްރެއިންގެ ސިފައިންނާ ދެކޮޅަށް ކެމިކަލް ހަތިޔާރު ބޭނުން ކޮށްފައިވާ ކަމުގެ ރިޕޯޓުތައް ލިބިފައިވާ ކަމުގައެވެ. ނަމަވެސް, ޔޫކްރެއިންގެ މަރިޔޫޕޮލްގައި ދީފައިވާ ކަމަށް ބުނެވޭ އެ ޙަމަލާއާ ގުޅިގެން އޯޕީސީޑަބްލިޔުން ތަޙުޤީޤެއް ފަށާފައެއް ނުވެއެވެ.