އިސްލާމިކް މިނިސްޓްރީން އިންތިޒާމުކޮށްގެން ބާއްވާ، އިސްލާމިކް ފެއަރ މިއަދު ހަވީރު ފެށުމަށް ނިންމައިފިއެވެ.
މިއަދުން ފެށިގެން މި މަހުގެ 31 ގެ ނިޔަލަށް ކުރިއަށްދާ މި ފެއާ އޮންނާނީ، އިސްލާމީ މަރުކަޒުގެ ހޯލާއި އިސްލާމީ މަރުކަޒު މައިދާން ހިމެނޭ ސަރަހައްދުގައެވެ.
އިސްލާމިކް މިނިސްޓްރީން މައުލޫމާތުދިން ގޮތުގައި، މި ފެއަރގެ މަޤުޞަދަކީ އެ މިނިސްޓްރީން ރައްޔިތުންނަށް ފޯރުކޮށްދޭ ދީނީ ކަންތައްތަކާމެދު ހޭލުންތެރިކަން އިތުރުކޮށް، އިސްލާމީ ހުދޫދުގެ ތެރެއިން މުނިފޫހިފިލުވުމުގެ ކަންކަން އާއްމުންނަށް ހުޅުވާލަދިނުން ކަމަށެވެ.
އަދި އަދި މުޖްތަމަޢުގައި އެއްބައިވަންތަކަމާއި އެއްބައެއްވަންތަކަން އާލާކުރުމަށް މަސައްކަތް ކުރުމަކީ، މި ފެއާގެ މަގުސަދުތަކުގެ ތެރޭގައި ހިމެނޭ ކަމެއްކަމަށް އިސްލާމިކް މިނިސްޓްރީން މައުލޫމާތުދެއެވެ.
މި ފެއާގެ ޝިޢާރަކަށް ކަނޑައަޅުއްވާފައިވަނީ "އުޚުއްވަތްތެރިކަން – މުޖުތަމަޢުގެ ބަދަހިން" މި ޝިޢާރެވެ.
މި ފެއަރގައި ސަރުކާރު ކުންފުނިތަކާއި ޔުނިވަރސިޓީތަކާއި އަމިއްލަ ޖަމިއްޔާ ޖަމާޢަތްތަކާއި ބުކްޝޮޕްތަކުން ބައިވެރިވާނެއެވެ. މި ފެއަރގެ މެއިން ސްޕޮންސަރަކީ މޯލްޑިވްސް ޙައްޖު ކޯޕަރޭޝަންއެވެ. މި ފެއަރގައި މޯލްޑިވްސް ޙައްޖު ކޯޕަރޭޝަންގެ ސްޓޯލެއް ބެހެއްޓުމަށްވަނީ ހަމަޖެހިފައެވެ. އަދި މި ފެއަރގެ ކޯ ސްޕޮންސަރ އަކީ އުރީދޫ މޯލްޑިވްސް އެވެ.
މި ފެއަރގައި ބައިވެރިވާ ސަރުކާރުގެ މުއައްސާތަކުގެ ތެރޭގައި މީރާ، ކީރިތި ޤުރުއާނާ ބެހޭ މަރުކަޒް، މޯލްޑިވްސް ޕޮލިސް ސަރވިސް އަދި އެމެ.އެން.ޑީ.އެފް ހިމެނެއެވެ. އިސްލާމިކް ފެއަރގައި ބައިވެރިވާ ޖަމިއްޔާތަކުގެ ތެރޭގައި ޖަމުޢިއްޔަތުއް ސަލަފާއި އިސްލާމިކް ފައުންޑޭޝަން ހިމެނެއެވެ. ޔުނިވާސިޓީ ތަކުގެ ތެރޭގައި ދިވެހިރާއްޖޭގެ ޤައުމީ ޔުނިވަރސިޓީއާއި އިސްލާމިކް ޔުނިވަރސިޓީ ހިމެނެއެވެ. ބުކްޝޮޕް ގެތެރޭގައި ދަގަތަ، އަސްރަފީ އަދި ނޮވެލްޓީ ހިމެނެއެވެ. މީގެ އިތުރުން މެސެޖް އޮފް އިސްލާމުންވެސް މި ފެއަރގައި ބައިވެރިވާނެއެވެ.
އިސްލާމިކް މިނިސްޓްރީގެ ފަރާތުން ބަލަހައްޓަމުންދާ ދެ ފަންޑުކަމުގައިވާ ދީނީ ފަންޑާއި، ވަޤުފް ފަންޑުގެ ފަންޑު ފޮށިތަށް މި ފެއާގައި ބެހެއްޓިފައި ހުންނާނެ ކަމަށާއި، އަދި މި ފަންޑުތަކަށް އެހީވާން ބޭނުންފުޅުވާ ފަރާތްތަކަށް އެފުރުޞަތުވެސް މިފެއާގައި ހުޅުވާލެވިފައި ހުންނާނެ ކަމަށް، އިސްލާމިކް މިނިސްޓްރީން ހާމަކުރެއެވެ.
މި ފެއަރގައި އިސްލާމީ މަރުކަޒުގެ ހޯލް ޚާއްޞަ ކުރެވިފައިވާނީ އިސްލާމީ ތާރީޚް ދައްކުވައިދޭ އާރޓް ގެލެރީއަކަށެވެ. ފެއާ ހިނގަމުންދާއިރު ކުޑަކުދިންނަށް ޙާއްޞަކޮށްގެން ސްޓޭޖް ހަރަކާތްތަކެއް ކުރިއަށް ގެންދިޔުމަށް ވެސް ވަނީ ނިންމާފައެވެ، އަދިކުޑަކުދިން ޝަޢުޤުވެރިވާކަހަލަ ގޭމް ހަރަކާތްތަށް ކުރިއަށްދާ އެކި ސްޓޯލްތަށް އިސްލާމީ މަރުކަޒު މައިދާނުގައި ބެހެއްޓިފައި ހުންނާނެ ކަމަށްވެސް، އިސްލާމިކް މިނިސްޓްރީން ހާމަކުރެއެވެ.
މި ފެއާ ކުރިއަށްދާނީ ތިންދުވަހުގެވެސް ހަވީރު ހަތަރަކުން ހަޔަކަށް އަދި ރޭގަނޑު އަށަކުން ދިހަޔަކަށެވެ.