ނެޓްބޯލް އެސޯސިއޭޝަން އޮފް މޯލްޑިވްސް އިން އިންތިޒާމްކޮށްގެން ކުރިއަށްގެންދާ އިންޓަރ އޮފީސް ނެޓްބޯޅަ މުބާރާތުގައި މިއަދު ހަވީރު ކުޅުނު މެޗުތަކުން ހައުސިންގް މިނިސްޓްރީގެ ޓީމާއި އެޗްޑީސީ މޮޅުވެއްޖެ އެވެ.
ޒުވާނުންގެ މަރުކަޒުގެ ބޭރު ކޯޓުގައި މިއަދު ހަވީރު ކުޅުނު ފުރަތަމަ މެޗުގައި ބައްދަލުކޮށްފައިވަނީ މިނިސްޓްރީ އޮފް ހައުސިންގް އެންޑް އިންފްރާސްޓްރަކްޗާ އާއި އާސަންދަ ކޮމްޕެނީ އެވެ. އެ މެޗު 30 ޕޮއިންޓް 22 ޕޮއިންޓުން ހައުސިންގް މިނިސްޓްރީގެ ޓީމް ކާމިޔާބުކުރިއިރު މެޗުގެ މޮޅު ކުޅުންތެރިއާގެ މަގާމް ހޯދީ އައިޝަތު ހަނާން އެވެ.
ހަނާން ވަނީ ރޭ ހައުސިންގް މިނިސްޓްރީ އާއި ރައީސް އޮފީސް ވާދަކޮށް ހައުސިންގް މޮޅުވި މެޗުގެ މޮޅު ކުޅުންތެރިއާގެ މަގާމްވެސް ހޯދާފަ އެވެ.
މިއަދު ހަވީރު ކުޅުނު ދެވަނަ މެޗުގައި ހައުސިންގް ޑެވެލޮޕްމެންޓް ކޯޕެރޭޝަން ވަނީ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގެ މައްޗަށް ކުރިހޯދާފަ އެވެ. އެޗްޑީސީން މެޗު ކާމިޔާބުކޮށްފައިވަނީ 24 ޕޮއިންޓް 14 ޕޮއިންޓުންނެވެ. މެޗުގެ މޮޅު ކުޅުންތެރިއާ އަކަށް ހޮވުނީ އެޗްޑީސީގެ ހައްވާ ރާޝިދާ އެވެ.
މިފަހަރުގެ މުބާރާތުގައި ޖުމްލަ 15 ޓީމެއް ވަނީ ބައިވެރިވެފަ އެވެ. އެ ޓީމުތަކަކީ، އެމްއެމްއޭ ސޯޝަލް ކްލަބު،ފިޝަރީޒް މިނިސްޓްރީ، އެއްއޭސީއެލް، ކްލަބު އާސަންދަ،އެޗްޑީސީ، ބީއެމްއެލް، އިމިގްރޭޝަން، އެންވަޔަރަމެންޓް މިނިސްޓްރީ، ހައުސިން މިނިސްޓްރީ، މީރާ، ކްލަބު 220 (ޕީޖީ އޮފީސް)، ރައީސް އޮފީސް، މީޑިއާ ނެޓްގެ އިތުރުން އެމްއެންޑީއެފް އަދި ޓީމް އެސްޓީއޯ އެވެ.
މި މުބާރާތުގެ ފުރަތަމަ ޑިިވިޝަނުގައި ވާދަކުރާނީ މިދިޔަ އަހަރު ކުރިއަށްދިޔަ އޮފީސް ކޮމްޕެނީ ނެޓްބޯޅަ މުބާރާތުގައި ވާދަކުރި ޓީމުތަކުގެ ތެރެއިން ގަދަ ހަތަރެއްގައި ހިމެނުނު 4 ޓީމެވެ. އެއީ ކްލަބު އިމިގްރޭޝަން، ކަސްޓަމްސް ރެކްރިއޭޝަން ކްލަބު، މިނިސްޓްރީ އޮފް ހެލްތް އަދި ބޭންކް އޮފް މޯލްޑިވްސް އެވެ.
މިދިޔަ އަހަރު ވާދަކުރި ޓީމުތަކުގެ ތެރެއިން މި ހަތަރު ޓީމު ފިޔަވާ ދެން ވާދަކުރި ޓީމުތަކާއި އަލަށް ބައިވެރިވި ޓީމުތައް ވާދަކުރަން ޖެހޭނީ ދެވަނަ ޑިވިޝަނުގަ އެވެ. ދެވަނަ ޑިވިޝަންގެ ކުޅުން މިއަދު ފެށިއިރު، ދެވަނަ ޑިވިޝަންގެ މެޗުތައް ކުޅެ ނިމުމުން އެ ޑިވިޝަނުގެ ގަދަ 4 ޓީމު ފުރަތަމަ ޑިވިޝަނަށް ކޮލިފައިވާނެއެވެ. އެގޮތުން ފުރަތަމަ ޑިވިޝަނުގެ ކުޅުން ކުރިއަށްދާނީ ޖުމްލަ 8 ޓީމާއެކު އެވެ.