0-3 ގެ ނަތީޖާއަކުން މެންޗެސްޓަރ ޔުނައިޓެޑްގެ މައްޗަށް ކުރި ހޯދާ މެންޗެސްޓަރ ސިޓީ ލީގުގެ ދެވަނަ މަގާމަށް ޖެހިލައިފިއެވެ.
ސިޓީ ލީގުގެ ދެވަނަ މަގާމުގައި އޮތީ 66 ޕޮއިންޓާއެކީގައެވެ.ލީގުގެ އެއްވަނައިގައި 69 ޕޮއިންޓާއެކީ ޗެލްސީ އޮތީ ސިޓީއަށް ވުރެ އިތުރަށް 2 މެޗް ކުޅެގެންނެވެ. މި މެޗުން ބަލިވި ޔުނައިޓެޑް އޮތީ 51 ޕޮއިންޓާއެކީ ލީގުގެ 5 ވަނައިގައެވެ.
ޔުނައިޓެޑްގެ ދަނޑުގައި ކުޅުނު މި މެޗުގައި ސިޓީގެ ފަރާތުން މޮޅު ކުޅުމެއް ދައްކާ ވަނީ ޔުނައިޓެޑްގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.
މި މެޗުގެ ފުރަތަމަ ގޯލް މެޗުގެ ފުރަތަމަ މިނެޓްގައި ކާމިޔާބުކޮށްދިނީ އެޓީމުގެ ފޯވާޑް އެޑިން ޒެކޯއެވެ.
ސިޓީގެ ދެވަނަ ގޯލްޖެހީ މެޗުގެ 56 މިނެޓްގައެވެ.ނަސްރީ ޕެނަލްޓީ އޭރިއާގެ ތެރެއަށް ނަގައިދިން ކޯނަރެއް ފައިން ޖަހާ ގޯލުގެ ތެރެއަށް ފޮނުވާލައިގެން ސިޓީގެ ދެވަނަ ގޯލް ކާމިޔާބުކޮށްދިނީ އެޓީމުގެ ފުރަތަމަ ގޯލްވެސް ކާމިޔާބުކޮށްދިން ޒެކޯއެވެ.އަދި ސިޓީގެ ތިންވަނަ ގޯލް މެޗުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ މިޑްފިލްޑަރ ޔާޔާ ޓޫރޭއެވެ.
މެޗަށްފަހު ވާހަކަދައްކަމުން ސިޓީގެ ކެޕްޓަން ވިންސެންޓް ކޮމްޕެނީ މިއީ ވަރަށް އުނދަގޫ މެޗެއް ކަމަށާއި މި މެޗުން މޮޅުވީ ޓީމުގެ ހުރިހާ ކުޅުންތެރިންވެސް ކުރި ބުރަ މަސައްކަތުން ކަމަށެވެ. އަދި ސީޒަނުގެ ފަހުކޮޅަށް އެޅިފައިވާއިރު މިހާރު ކޮންމެ މެޗަކުން ވެސް މޮޅުވުމަކީ މަޖުބޫރު ކަމެއް ކަމަަށް ވެސް ކޮމްޕެނީ ބުޏްނެވެ.
"މި މޮޅުވީ ވަރަށް އުނދަގޫ މެޗަކުން.މި މެޗުން މޮޅުވީ ޓީމުގެ ހުރިހާ ކުޅުންތެރިން ވެސް ކުރި ބުރަ މަސައްކަތުން" ކޮމްޕެނީ ބުޏްނެވެ.