މާލޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަންސް (ކާވާ) މެންސް ޗެންޕިއަންސް ލީގުގެ ޗެންޕިއަންކަން ކަޒަކިސްތާނުގެ ލީގު ޗެމްޕިއަން ޒައިކް ވޮލީ ކުލަބުން ހޯދައިފިއެވެ.
މުބާރާތުގެ ޗެންޕިއަންކަން ޒައިކް ވޮލީ ކުލަބުން ޗެންޕިއަންކަން ހޯދީ ރޭ ކުޅުނު ފައިނަލް މެޗުގައި ކިރްގިސްތާނުގެ ބިޝްކެކް 3-1 ގެ ނަތީޖާއަކުން ބަލިކުރުމަށްފަހު އެވެ.
މުބާރާތުގެ ފައިނަލުން ޒައިކް ޖާގަހޯދީ ލީގުބުރުގައި ކުޅުނު ފަސް މެޗުން ހޯދި 13 ޕޮއިންޓާއެކު ލީގުބުރުގެ އެއްވަނަ ޓީމުގެ ގޮތުގައެވެ. އަދި ބިޝްކެކް ފައިނަލުން ޖާގަހޯދީލީގުބުރުގައި ކުޅުނު ފަސް މެޗުން ހޯދި 11 ޕޮއިންޓާއެކު ލީގުބުރުގެ ދެވަަނަ ޓީމުގެ ގޮތުގައެވެ. އަދި މިދެޓީމު ލީގުބުރުގައި ވާދަކުރި މެޗު ސީދާ ތިން ސެޓުން ކާމިޔާބުކުރީ ޒައިކް އިންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ދެ ސެޓް 26-24 އަދި ި21-25 ގެ ނަތީޖާއަކުން ކާމިޔާބުކުރީ ޒައިކް އިންނެވެ. ނަމަވެސް ޖެހިގެންއައި ތިންވަނަ ސެޓް ފަސް ޕޮއިންޓްގެ ލީޑަކާއެކު 20-25 ގެ ނަތީޖާއަކުން ކާމިޔާބުކޮށް ބިޝްކެކް އިންނެވެ.
ނަމަވެސް މެޗުގެ ހަތަރުވަނަ ސެޓް 22-25 ގެ ނަތީޖާއަކުން ކާމިޔާބުކޮށް ޒައިކް އިން ވަނީ އެކުލަބުގެ ތާރީޚުގައި ވެސް މިހާތަނަށް ހޯދި އެންމެ ބޮޑު ކާމިޔާބީ ހޯދާފައެވެ. އަދި މިއީ ކަޒަކިސްތާނުގެ ކުލަބު ވޮލީގައި ވެސް އެގައުމުގެ ކުލަބަކުން މިހާތަނަށް ހޯދި އެންމެ ބޮޑު ކާމިޔާބީއެވެ.
މީގެ އިތުރުން މި ކާމިޔާބީއާއެކު ޒައިކް ވީސީ ވަނީ އޭޝިއަން ވޮލީބޯލް ކޮންފެޑެރޭޝަންގެ އެންމެ ބޮޑު ކުލަބު މުބާރާތް ކަމަށްވާ ޗެންޕިއަންސް ލީގަށް ވެސް ކޮލިފައިވެފައެވެ
މި މުބާރާތުގެ ޑްރީމްޓީމު ހިމެނުނު ކުޅުންތެރިންނަކީ ބެސްޓް އައުޓްސައިޑް ހިޓާ - މުރާދު ޖެހާން (ނޭޕާލް)، ބެސްޓް އައުޓްސައިޑް ހިޓާ - އޮމުރްބެކް ޒުނޫސޮވް (ކަޒަކިސްތާނު)، ބެސްޓް މިޑްލް ބްލޮކަރ - ނުރިސްލާމް މެޑެޓްބެކް އުލޫ (ކިރްގިސްތާން)، ބެސްޓް މިޑްލް ބްލޮކަރ - ޕޮރޮކޯފިން ވްލަޑިމިއާ (ކަޒަކިސްތާނު)، ބެސްޓް ސެޓަރ - ވޮލޮޑިމީރް ކޮވަލްޗުކް (ކަޒަކިސްތާނު) އަދި ބެސްޓް ލިބަރޯ - ސަންތޯޝް ރާއީ (ނޭޕާލް) އެވެ.
މީގެ އިތުރުން މުބާރާތުގެ އެންމެ މޮޅު އޮޕޮޒިޓް ކުޅުންތެރިޔާގެ މަގާމުގެ އިތުރުން އެންމެ މޮޅު ކުޅުންތެރިޔަކަށް ހޮވުނީ ވެސް ކަޒަކިސްތާމުގެ ވިޓަލީ އެރްޑްޝްޓެއިން އެވެ.
17 ޖުލައި 2025 އިން 23 ޖުލައި 2025 ގެ ނިޔަލަށް ކުރިއަށްދާ މިމުބާރާތުގައި ޖުމްލަ ހަ ޓީމަކުން ވާދަކުރަމުން އަންނައިރު، އޭގެ ތެރޭގައި ހިމެނެނީ ރާއްޖޭގެ ޤައުމީ ޗެންޕިއަން ދިވެހި ސިފައިންގެ ކުލަބު (ޑީއެސްސީ) އަދި ރަނަރަޕްގެ ހައުސިންގ ޑިވޮލަޕްމަންޓް ކޯޕަރޭޝަން (އެޗްޑީސީ) ގެ އިތުރުން ސްރީލަންކާ ޕޯޓްސް އޮތޯރެޓީ، ނޭޕާލްގެ ހެލްޕް ނޭޕާލް ސްޕޯޓްސް ކުލަބު، ކިރްގިސްތާނުގެ ބިޝްކެކް އަދި ކަޒަކިސްތާނުގެ ޒައިކް ވޮލީ ކުލަބް އެވެ.