ދިގު އިންތިޒާރަކަށް ފަހު ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ފީފާ ވޯލްޑް ކަޕުން އިރާގަށް ޖާގަ ލިބުމާ ގުޅިގެން، އެ ގައުމުގެ ސަރުކާރުން އިއްޔެ އާއި މިއަދު ރަސްމީ ބަންދު ދުވަހުގެ ގޮތުގައި ކަނޑައަޅައިފިއެވެ. އިރާގުގެ ބޮޑުވަޒީރު މުހައްމަދު ޝިއާލް ސޫދާނީ މިގޮތަށް ނިންމެވީ، 40 އަހަރުގެ މެދުކެނޑުމަކަށް ފަހު ލިބުނު މި ތާރީހީ ކާމިޔާބީ މުޅި ގައުމީ ފެންވަރުގައި ފާހަގަކުރުމުގެ ފުރުސަތު ރައްޔިތުންނަށް ދިނުމުގެ ގޮތުންނެވެ. އިރާގު މުބާރާތަށް ކޮލިފައިވީ މެކްސިކޯގައި ކުޅުނު އިންޓަ-ކޮންޓިނެންޓަލް ކަޕްގެ ފައިނަލުގައި ބޮލީވިއާ ބަލިކުރުމުންނެވެ. މިއާއެކު އިރާގުގެ އެކި ކަންކޮޅުތަކުގައި ކުދިބޮޑު އެންމެން މަގުތަކަށް ނުކުމެ އަންނަނީ ކުލަގަދަކޮށް އުފާފާޅުކުރަމުންނެވެ. މިއަހަރުގެ ޖޫން މަހު އެމެރިކާ، މެކްސިކޯ އަދި ކެނެޑާ ގުޅިގެން ބާއްވާ ވޯލްޑް ކަޕްގައި އިރާގު ވާދަކުރާނީ ގްރޫޕް 'އައި' ގައެވެ. މި ގްރޫޕްގައި ދެން ހިމެނެނީ ވަރުގަދަ ފްރާންސާއި ނޯވޭގެ އިތުރުން ސެނެގާލް އެވެ. މިއީ އިރާގުން ވޯލްޑް ކަޕްގައި ވާދަކުރާ ދެވަނަ ފަހަރެވެ. މީގެ ކުރިން އެ ގައުމުން ވާދަކުރީ 1986 ވަނަ އަހަރު މެކްސިކޯގައި ބޭއްވި މުބާރާތުގައެވެ. އެފަހަރު ކުޅުނު ތިން މެޗުން ވެސް ބަލިވި ނަމަވެސް، މިފަހަރުގެ މުބާރާތަށް އިރާގުން ނުކުންނަނީ އާ އުއްމީދުތަކަކާއެކުގައެވެ. އިރާގުގެ ފުޓްބޯޅަ ތާރީހުގައި މިހާތަނަށް ހޯދި އެންމެ ބޮޑު ކާމިޔާބީއަކީ 2007 ވަނަ އަހަރުގެ އޭޝިއަން ކަޕް ކާމިޔާބުކުރުމެވެ. މިފަހަރުގެ ކޮލިފައިންގައި އިރާގަށް ކުރިމަތިލާންޖެހުނީ ހަމައެކަނި ދަނޑުމަތީގެ ގޮންޖެހުންތަކެއް ނޫނެވެ. ސަރަހައްދީ ހަނގުރާމައިގެ ސަބަބުން މެދުއިރުމަތީގެ ވައިގެ ސަރަހައްދުތައް ބަންދުވެފައި އޮތުމުން، ކޯޗު ގްރެހަމް އާނޮލްޑާއި ކުޅުންތެރިންނަށް އެކަށީގެންވާ ޕްރެކްޓިސްތައް ކުރިއަށް ގެންދިއުމުގައި ބޮޑެތި ހުރަސްތަކެއް ކުރިމަތިވިއެވެ. ޓީމުގެ ކުޅުންތެރިން އެކި ގައުމުތަކުގައި ތިބެންޖެހުމުގެ ސަބަބުން ދިމާވި ދަތިތަކާއެކު ވެސް، އިރާގުން ދެއްކި ސާބިތުކަމަށް ގިނަ ބައެއްގެ ތައުރީފު އަންނަނީ ލިބެމުންނެވެ. މަޝްހޫރު ނޫސްވެރިޔާ އޮމަރް ގަހްތާން ފާހަގަކުރި ގޮތުގައި، މި ކާމިޔާބީއަކީ ހިތްދަތި ދުވަސްތަކެއް ތަހައްމަލު ކުރަމުންދާ އިރާގުގެ ރައްޔިތުންނަށް ލިބުނު ވަރަށް ބޮޑު ހިތްހަމަޖެހުމެކެވެ.