ހުރިހާ މަޝްރޫއުތަކެއްގެ ތަފުސީލު ހާމަކޮށްފައި ނެތް ނަމަވެސް، އަންނަ އަހަރު ރާއްޖޭގެ ހުރިހާ ރަށެއްގައި ޕްރޮޖެކްޓްތައް ހިންގާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.
މަޖިލީހުގައި މިހާރު ކުރިއަށްދާ އަންނަ އަހަރަށް ލަފާކޮށް ހުށަހަޅާފައިވާ ބަޖެޓް ބަހުސްގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ ޕްރޮޖެކްޓް ލިސްޓެއް ކަނޑައަޅައިގެން، ކުޑަ އަގެއް ޖަހައިގެން ގިނަ ޕްރޮޖެކްޓުތަކެއް ފެށުމުން، ޕްރޮޖެކްޓްތައް ކުރިއަށް ނުގޮސް ހުއްޓިފައިވާ ކަމަށެވެ. އެއީ ބަޖެޓް ނެތިގެން ނުވަތަ ކޭޝްފްލޯ ނެތިގެން ނުވަތަ ހަވާލުކުރެވޭ ކުންފުންޏަށް އެ މަސައްކަތް ކުރިއަށް ނުގެންދެވިގެން ކަމަށެވެ.
"އަޅުގަނޑުމެންނަށް ފެނިގެން ދިޔަ އަހަރުތަކެއް ކުރީން އެމްޓީސީސީއަށް ވެސް ކޮންމެ ދުވަހަކު ވެސް ޕްރޮޖެކްޓެއް ހަވާލު ކުރެވިގެން އެންމެ ފަހުން ނިމިގެން ދިޔައިރު އެމްޓީސީސީގެ ޕައިޕްލައިންގައި ވެސް އެބައުޅޭ ގާތްގަނޑަކަށް 18 ބިލިއަން ރުފިޔާ ފައިނޭންސް ކުރެވޭނެ ގޮތެއް ނެތި،" މިނިސްޓަރު ވިދާޅުވިއެވެ.
ޒަމީރު ވިދާޅުވީ މިފަހަރުގެ ޕްރޮޖެކްޓްތައް ކުރިއަށް ގެންދާނީ ޕްރޮޖެކްޓްތަކަށް ބޭނުންވާ ފަންޑު ކަނޑައަޅައި، ރައީސް އިސްކަން ދެއްވާ ލިސްޓުގެ ތަރުތީބުން ކަމަށެވެ.
"އަޅުގަނޑުމެން ދޭނެ ޔަގީންކަމަކީ މިހާރު އަޅުގަނޑުމެން ގެންގުޅޭ ލިސްޓްގައި ވެސް އެއްވެސް ރަށެއް އުނިވެފައެއް ނޯންނާނެ. މިއަހަރު ވެސް ޕްރޮޖެކްޓް ފަށަން ރާއްޖޭގެ ހުރިހާ ރަށެއްގައި އިންކުލޫޑިން ސިޓީތަކާއި މާލެއާ ވެސް އެކުގައި އޮތީ އަޅުގަނޑުމެންގެ ޕްރޮގްރާމްގައި ރޭވިފައި،" މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ސަރުކާރުން ކުރިއަށް ގެންދަން ނިންމާފައިވާ ޕްރޮޖެކްޓްތައް އިއުލާނު ކުރާނެ ކަމަށާއި އެކަންކަން އިއުލާނު ކުރާނީ ބަޖެޓުން ޖާގަ ލިބިގެން ކުރިއަށް ގެންދެވޭނެ ގޮތް މަގުފަހިވުމުން ކަމަށެވެ. އަންނަ އަހަރަށް ލަފާކޮށް ހުށަހަޅާފައިވާ ބަޖެޓްގައިވާ ގޮތުން ޕީއެސްއައިޕީ މަޝްރޫއުތަކަށް 12.4 ބިލިއަން ރުފިޔާ ހިމަނާފައިވެއެވެ. ނަމަވެސް އެހެން އަހަރުތަކާ ހިލާފަށް، އެ ހުރިހާ މަޝްރޫއުތަކެއްގެ ތަފުސީލެއް ހާމަކޮށްފައެއް ނުވެއެވެ. އެކަމުގެ ކަންބޮޑުވުން ރައްޔިތުންގެ މަޖިލީހުގެ ބައެއް މެންބަރުންވެސް ވަނީ ފާޅުކުރައްވައިފައެވެ.
އަންނަ އަހަރު ޖުމުލަ 695 މަޝްރޫއެއްގެ މަސައްކަތް ކުރިއަށް ގެންދާން ހިމަނާފައިވާއިރު، އެ މަޝްރޫއުތަކުގެ ތެރޭގައި ހިމެނެނީ މިހާރު ވެސް ހިނގަމުންދާ 396 މަޝްރޫއަކާއި އަލަށް ފަށާ 299 މަޝްރޫއެކެވެ.
އަންނަ އަހަރުގެ ބަޖެޓުގައި އެކި ރަށްތަކުގައި ހިންގާ ބޯހިޔާވަހިކަމުގެ މަޝްރޫއުތަކަށް 1.8 ބިލިއަން ރުފިޔާ ހިމަނާފައިވާ އިރު، ގްރޭޓާ މާލެ ވޭސްޓް އެނާޖީ މަޝްރޫއުއަށް 524 މިލިއަން ރުފިޔާ، ގޮނޑުދޮށް ހިމާޔަތްކުރުމަށް 236 މިލިއަން ރުފިޔާ، ފެނާއި ނަރުދަމާގެ އެކިއެކި މަޝްރޫއުތަކަށް 867 މިލިއަން ރުފިޔާ އަދި ކުނި މެނޭޖުކުރުމުގެ މަޝްރޫއުތަކަށް 381 މިލިއަން ރުފިޔާ ހިމަނާފައިވެއެވެ.
އޭގެ އިތުރުން ބިން ހިއްކުމާއި މަގުހެދުމުގެ މަޝްރޫއުތަކަށް 644 މިލިއަން ރުފިޔާ، އެއާޕޯޓް ހެދުމަށް 1.3 ބިލިއަން ރުފިޔާ، ތިލަމާލެ ބްރިޖަށް 1.4 ބިލިއަން ރުފިޔާ އަދި ވެލާނާ އިންޓަނޭޝަނަލް އެއާޕޯޓްގެ ޓާމިނަލަށް 993 މިލިއަން ރުފިޔާ ހިމަނާފައިވާއިރު އިޔާދަކުރަނިވި ހަކަތައިގެ މަޝްރޫއުތަކަށް 523 މިލިއަން ރުފިޔާ ހިމަނާފައިވެއެވެ.
ތައުލީމީ ދާއިރާއަށް ބަލާއިރު ސްކޫލް ޔުނިވަސިޓީ އިމާރާތް ކުރުމަށް 419 މިލިއަން އަދި އަރަބިއްޔާގެ އާ ސްކޫލް އިމާރާތްކުރަން 80 މިލިއަން ރުފިޔާ ހިމަނާފައިވެއެވެ. އަދި ސިއްހީ ދާއިރާގެ އިންފްރާސްޓްރަކްޗާ މަޝްރޫއުތަކަށް 902 މިލިއަން، ކެންސަރު ހޮސްޕިޓަލަށް ހަދަން 62 މިލިއަން ބަޖެޓުގައި ޖަހާފައިވެއެވެ.