ގެއްލިގެން ހޯދަމުން ދިޔަ 63 އަހަރުގެ އުމްރާވެރިޔާ ފެނިއްޖެއެވެ.
ގެއްލިގެން އުޅުން ފަރާތަކީ ޔަލަމްލަމްގެ ހަވާލުގައި އުމްރާއަށް ދިޔަ ޏ. ފުވައްމުލައް، ސްޓެއްލާ (ދޫނޑިގަން)، ހުސައިން މުހައްމަދު ދީދީ (A026495)އެވެ.
ޔަލަމްލަމް ގުރޫޕުން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނެފައިވަނީ ހުސައިން މުހައްމަދު ދީދީ ހެޔޮ ހާލުގައި ހުއްޓާ ފެނިފައިވާކަމަށެވެ. އަދި އޭނާ ހޯދުމަށް އެހީތެރި ވި އަދި ހެޔޮ ދުއާ ކޮށްދިން ހުރިހާ ފަރާތްތަކަށް އެ ޖަމިއްޔާއިން ވަނީ ޝުކުރު އަދާކޮށްފައެވެ.
ހުސައިން މުހައްމަދު ދީދީ ގެއްލިގެން ހޯދަން ފަށާފައިވަނީ އިއްޔެ ހަވީރުގެ ވަގުތެއްގައެވެ. އަދި ޔަލަމްލަމްއިން ބުނީ އެ ޖަމާއަތުގެ ހަވާލުގައި އުމްރާގެ އަޅުކަން އަދާ ކުރުމަށް ސައުދީ އަރަބިއްޔާގެ މައްކާއަށް އިއްޔެ މެންދުރުފަހު ސައުދީ ފްލައިޓް (SV839) އިން ދަތުރު ކުރި އުމްރާވެރިޔާ ހުސައިން މުހައްމަދު ދީދީ ގެއްލިފައި ވަނީ އުމްރާގެ އަޅުކަން ފުރިހަމަ ކުރުމަށް ސަޢީ ކުރަމުން ދަނިކޮށް ކަމަށެވެ.
ހުސައިން މުހައްމަދު ދީދީ ގެއްލުނު އިރު ހުރީ އިހްރާމްގައެވެ. އަދި ކަރުގައި ޔަލަމްލަމްގެ ފާސްވެސް އަޅާފައި އޮތް ކަމަށް އެ ޖަމިއްޔާއިން ބުނެއެވެ.
ފާހަގަކޮށްލެވޭ ގޮތުގައި މީގެ ކުރިން ވެސް އުމްރާއަށްދާ ބައެއް މީހުން ގެއްލިގެން ހޯދާފައިވެއެވެ.