ޑރ އަފްރާސީމް އަވަހާރަކޮށްލި ހަމަލާއަކީ އިސްލާމްދީނާއި ގައުމާއި ދެކޮޅަށްދިން ހަމަލާއެއްކަމަށް ޕީޕީއެމްގެ އިންތިގާލީ ރައީސް އަދި ކުރީގެ ރައީސް މައުމޫނު އަބްދުލްޤައްޔޫމް ވިދާޅުވެއްޖެއެވެ.
ރޭ އުނގޫފާރުގައި ޕީޕީއެމްއިންބޭއްވި އަފްރާސީމްގެ ތައުބީންގެ ޖަލްސާގައި ވާހަކަފުޅު ދައްކަވަމުން މައުމޫން ވިދާޅުވީ ޑރ އަފްރާސީމަކީ ކުރުމުއްދަތެއްގެ ތެރޭގައި ގިނަގުނަ ހިދުމަތްތަކެއް ކުރެއްވި ޢިލްމުވެރިއެއްކަމުގައެވެ. އަދި އަފްރާސީމް ކިޔަވާ ވިދާޅުވުމަށްފަހު ރާއްޖެ ވަޑައިގެން ހިދުމަތް ކުރެއްވި ފަސް އަހަރަކީ އެހެންބަޔަކު 50 އަހަރު ހިދުމަތް ކުރެއްވުމާއި ނުބައްދަލު ހިދުމަތެއްކަމަށްވެސް މައުމޫން ވިދާޅުވިއެވެ.
އަދި ޓީވީއާއި ރޭޑިއޯއިން ކޮންމެ ދުވަހަކުމެ ޑރ އަފްރާސީމްގެ ދަރުސްތަކާއި އިރުޝާދުތައް އަޑުއިވެމުން ދިޔަކަމަށްވެސް މައުމޫން ވިދާޅުވިއެވެ.
ޑރ އަފްރާސީމް ގެންދެވީ އިސްލާމްދީނަކީ ހަރުކަށި ދީނެއް ނޫން ކަމާއި މެދުމިނުގެ އަންގާދިނުމަށްޓަކައި މަސައްކަތް ކުރަމުންކަމަށާއި އެކަން ކުރައްވަމުން ގެންދެވިއިރު އެކި ފަރާތްތަކުން ކިޔަމުން ގެންދިޔަ ފާޑުކިޔުންތަކަށް އަފްރާސީމް ބައްލަވާފައި ނުވާކަމަށްވެސް މައުމޫން ވިދާޅުވިއެވެ.
އަދި ޑރ އަފްރާސީމް ލިއުއްވާ ލިއުއްވުމެއް ނުވަތަ ފޮތެއް އިތުރަށް ކުއްފިލުވަން "ތިމަންމަނިކުފާނަށް" ޖެހިވަޑައި ނުގަންނަވާނެކަމަށްވެސް ރައީސް މައުމޫން ރޭ ވިދާޅުވިއެވެ.
ޑރ އަފްރާސީމަށް ދެވުނު މަރުގެ ހަމަލާއަކީ ހަމައެކަނި އަފްރާސީމަށް ދެވުނު ހަމަލާއެއްކަމަށް ގަބޫލުފުޅު ނުކުރައްވާކަމަށާއި އެހަމަލާއަކީ ގައުމަށާއި ދީނަށް ދެވުނު ހަމަލާއެއްކަމަށްވެސް މައުމޫން ވިދާޅުވިއެވެ.