ކުރީ ސަރުކާރުގައި ރޯޑް ޑިވެލޮޕްމެންޓު ކޯޕަރޭޝަން (އާރްޑީސީ)ގެ ތެރޭގައި ހިންގި ކަމަށް ބުނާ ހިޔާނާތުގެ މައްސަލައިގެ ތަހުގީގާއި ގުޅިގެން އެ ކުންފުނީގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) އެ ކުންފުނީގެ ކުރީގެ ޗީފް ފައިނޭންޝަލް އޮފިސަރު މަގާމުގައި ހުރި ޔާސިރު ހަސަން ފުރުން މަނާކޮށްފި އެވެ.ފުލުހުންގެ ހިދުމަތުން ދެންމެ ބުނީ އެ އިދާރާއިން ތަހުގީގު ކުރަމުން ގެންދާ މައްސަލައަކާ ގުޅިގެން މޫކޭއާ ޔާސިރު ފުރުން މަނާކުރުމުގެ އަމުރެއް ނެރެފައިވާ ކަމަށެވެ. އަދި އެކަން އެދެ މީހުންނަށް އަންގާފައިވާ ކަމަށް ވެސް ބުންޏެވެ.މޫކޭއާއި އާއި ޔާސިރު ފުރުން މަނާކޮށް އަމުރު ނެރުނުއިރު އެ ދެ މީހުން ދިރިއުޅޭ އެޕާޓުމެންޓު ވެެސް ވަނީ ބަލައިފާސްކޮށްފައި އެވެ. ބަލާ ފާސްކުރީ ފާއިތުވި ދައުރުގައި އާރްޑީސީގެ އެކައުންޓުން އޭނާގެ އަމިއްލަ އެކައުންޓަށް 13 މިލިއަން ރުފިޔާ ޖޫރިމަނާކޮށް އެ ފައިސާ މަނީ ލޯންޑާކުރި ކަމުގެ ތުހުމަތުގަ އެވެ.  ރައީސް ސޯލިހްގެ ދައުރުގައި ފެންމަތިވި މި މައްސަލާގައި ފުލުހުން ތަހުގީގެއް ފެށީ މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)އިން އެ މައްސަލަ ފެންމަތިކުރުމާ ގުޅިގެން އެ ދެ އިދާރާ ގުޅިގެން ކުރާ ތަހުގީގެއް ގޮތުގަ އެވެ. މޫކޭ ނިސްބަތްވާ އިދިކޮޅު އެމްޑީޕީން ފުލުހުންގެ މި މަސައްކަތްތައް ސިފަކުރަނީ އިދިކޮޅު ފަރާތްތަކަށް ބިރުދައްކާ، މި ފަހުން ފެންމަތިވި ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ހިޔާނާތް އޮއްބާލަން ކުރާ ކަމެއްގެ ގޮތުގަ އެވެ.އާރުޑީސީގެ މައްސަލައާ ގުޅިގެން މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ފައްޔާޒް އިސްމާއިލްއާ ފުލުހުން ސުވާލުކޮށްފައިވެ އެވެ. ނަމަވެސް އޭނާގެ މައްޗަށް ޖިނާއީ ކުށެއްގެ ތުހުމަތެއް ކުރާ ކަމަކަށް ފުލުހުން އަދި ނުބުނެ އެވެ.